കവി കുമാരനാശാന്റെ മുങ്ങിമരണത്തിന് ഇടയാക്കിയ റെഡീമര്‍ ബോട്ടിലെ കസേരയും ഇതേ ബോട്ടിന്റെ തടികള്‍ കൊണ്ടു നിര്‍മിച്ച ഫര്‍ണിച്ചറും പല്ലന കുമാരനാശാന്‍ സ്മാരക മന്ദിരത്തോട് അനുബന്ധിച്ചു സ്ഥാപിക്കുന്ന മ്യൂസിയത്തിന് ലഭിക്കും.

ബോട്ടിന്റെ ജനാലയുടെ ചട്ടം നേരത്തെ ലഭിച്ചിരുന്നു. ബോട്ടില്‍ ഉണ്ടായിരുന്ന ഒരു കസേര, ബോട്ടിലുണ്ടായിരുന്ന ഈട്ടിത്തടികൊണ്ടു നിര്‍മിച്ച മറ്റൊരു കസേര, രണ്ട് സ്റ്റൂള്‍, സോഫ എന്നിവയും കൈമാറും.

സ്മാരക സമിതി ചെയര്‍മാന്‍ രാജീവ് ആലുങ്കല്‍, സെക്രട്ടറി പ്രഫ.കെ.ഖാന്‍ എന്നിവരുടെ അഭ്യര്‍ഥന പ്രകാരമാണ് ചമ്പക്കുളം പയ്യനാട് പുത്തന്‍വേലില്‍ ജേക്കബ് തോമസിന്റെ ഉടമസ്ഥതയിലുള്ള ഉപകരണങ്ങള്‍ മ്യൂസിയത്തിനു നല്‍കുന്നത്.

ജേക്കബ് തോമസിന്റെ മകന്‍ ടോം ജേക്കബാണ് ഈ വിവരങ്ങള്‍ അറിയിച്ചത്. സ്മാരകത്തിനു സമീപം മ്യൂസിയം സ്ഥാപിക്കാനാണു സമിതി ലക്ഷ്യമിടുന്നത്.