വര്‍ക്കലയില്‍ മൂന്നംഗ കുടുംബത്തെ വീടിനുളളില്‍ കത്തിക്കരിഞ്ഞ നിലയില്‍ കണ്ടെത്തിയ സംഭവത്തില്‍ ആത്മഹത്യാക്കുറിപ്പ് കണ്ടെത്തി. സംഭവം നടന്ന വീട്ടില്‍ നിന്നാണ് പോലീസ് ആത്മഹത്യാ കുറിപ്പ് കണ്ടെത്തിയത്. സാമ്ബത്തിക ബാധ്യതയാണ് ആത്മഹത്യയിലേക്ക് നയിച്ചതെന്നാണ് കുറിപ്പില്‍ നിന്നും വ്യക്തമാകുന്നത്. സാമ്പത്തികമായി ചിലര്‍ തങ്ങളെ വഞ്ചിച്ചുവെന്നും കുറിപ്പില്‍ വ്യക്തമാക്കുന്നു. ഇവര്‍ അവരാരൊക്കെയെന്നും കുറിപ്പില്‍ വ്യ്കതമാക്കിയിട്ടുള്ളതായി പോലീസ് പറഞ്ഞു. ഈ സാഹചര്യത്തില്‍ ആണ് ആത്മഹത്യ ആണെന്ന നിഗമനത്തിലേക്ക് പോലീസ് എത്തിയത്.വെട്ടൂര്‍ സ്വദേശിയായ ശ്രീകുമാര്‍, ഭാര്യ മിനി, മകള്‍ അനന്ത ലക്ഷ്മി, എന്നിവരാണ് മരിച്ചത്.

പുലര്‍ച്ചെ 3.30 ന് വീട്ടില്‍ നിന്ന് നിലവിളി കേട്ടതായി നാട്ടുകാര്‍ പറയുന്നു. വീട്ടില്‍ നിന്ന് പുകയുയരുന്നതും ശ്രദ്ധയില്‍പെട്ടു. തുടര്‍ന്ന് വിവരം പൊലീസില്‍ അറിയിക്കുകയായിരുന്നു. ഉടന്‍ തന്നെ അഗ്‌നി രക്ഷാ സേനയെത്തി തീയണച്ചെങ്കിലും മൂന്ന് പേരും മരണപ്പെട്ടു. ശ്രീകുമാറിന്റെ മൃതദേഹം വീടിന്റെ ശുചിമുറിയിലും ഭാര്യയുടെയും മകളുടെയും മൃതദേഹം കിടപ്പു മുറിയിലുമാണ് കിടന്നിരുന്നത്.

ഐഎസ്ആര്‍ഒയിലെ കരാര്‍ ജോലികള്‍ ഏറ്റെടുത്തു ചെയ്യുകയായിരുന്നു ശ്രീകുമാര്‍. അടുത്തിടെ സാമ്ബത്തിക പ്രശ്‌നങ്ങള്‍ ഉണ്ടായിരുന്നെന്നും ആത്മഹത്യ മാത്രമാണ് പോംവഴിയെന്ന് പറഞ്ഞിരുന്നതായും ബന്ധുക്കളില്‍ ചിലര്‍ മൊഴി നല്‍കിയിട്ടുണ്ട്.