പീച്ചി ഡാമിന്റെ സ്ലൂസ് തകരാര്‍ പരിഹരിക്കാന്‍ പ്രയത്‌നിക്കുന്ന നാവികസേന സംഘത്തിനും മുങ്ങല്‍ വിദഗ്ധ സംഘത്തിനും വെല്ലുവിളികളേറെയാണ്. ചേര്‍പ്പില്‍ നിന്നുള്ള ഈഗിള്‍ ടെക് സര്‍വീസ് സ്‌കൂബ ടീം തിങ്കളാഴ്ച രാത്രി 12 വരെ എമര്‍ജന്‍സി ഷട്ടര്‍ അടയ്ക്കാന്‍ ശ്രമിച്ചെങ്കിലും ഷട്ടറിലേക്കുള്ള ഗാഡിയില്‍ ഒരു മരക്കൊമ്പ് തടഞ്ഞുനില്‍ക്കുന്നത് ശ്രദ്ധയില്‍പ്പെട്ടു. സി.ഐ. ഷാനവാസ്, കെ.എ.ഷഫീര്‍, വി.എസ്. ബിപിന്‍ എന്നിവരടങ്ങുന്ന സ്‌കൂബ സംഘം ഇറങ്ങി കമ്പി ഉപയോഗിച്ചു മരക്കൊമ്പ് കുത്തിനീക്കി. 3 മീറ്റര്‍ നീളവും 6 ഇഞ്ച് കനവുമുള്ളതായിരുന്നു മരക്കൊമ്പ്.

തടസ്സം നീങ്ങിയതോടെ നാവികസേനയുടെ മേല്‍നോട്ടത്തില്‍ ഷട്ടറിനു മുകളില്‍ ഭാരം കയറ്റി താഴേക്ക് ഇറക്കാനുള്ള ശ്രമം തുടങ്ങി. രാവിലെ 10.30-ന് 250 കിലോ ഇരുമ്പ്, ഷട്ടറില്‍ വൈല്‍ഡ് ചെയ്തതിനു ശേഷം ദൗത്യം തുടങ്ങി. വെള്ളത്തിലിറങ്ങിയ സേനാംഗങ്ങള്‍ വെള്ളത്തിന്റെ മര്‍ദം പരിശോധിച്ചുറപ്പാക്കി. ദൗത്യം ക്യാമറയില്‍ പകര്‍ത്തി. ഭാരം കയറ്റിയിട്ടും കുറച്ചു ദൂരം മാത്രമേ ഷട്ടര്‍ താഴ്ന്നുള്ളൂ.

ഷട്ടറിനു മുകളിലെ ഭാരം ഉച്ചയോടെ 500 കിലോ ആക്കി വെല്‍ഡ് ചെയ്തുറപ്പിച്ചു. എന്നിട്ട് ഷട്ടര്‍ 18 മീറ്റര്‍ വരെ താഴെയെത്തിച്ചു. വൈകിട്ട് 5-ന് ഒരു മണിക്കൂര്‍ വലതുകര കനാല്‍ തുറന്നുവിട്ടു. വൈകുന്നേരത്തോടെ ഷട്ടര്‍ അടയ്ക്കുന്നതിനുള്ള പൂര്‍ണ ചുമതല നാവിക സേനാംഗങ്ങള്‍ ഏറ്റെടുത്തു. 6 മണിക്ക് 19.61 മീറ്റര്‍ താഴ്ചയില്‍ വരെ ഷട്ടര്‍ എത്തിച്ചു. 22 മീറ്ററില്‍ എത്തിയാല്‍ സ്‌ളൂസ് അടയും.

ഷട്ടറുകള്‍ക്കു മുകളില്‍ ഉരുക്കുവടം ഉപയോഗിച്ച് എമര്‍ജന്‍സി ഷട്ടര്‍ ഉയര്‍ത്താനും താഴ്ത്താനും രണ്ടുദിവസമായി പത്തോളം പേരുടെ നേതൃത്വത്തില്‍ ഉള്ള ശ്രമം നടക്കുകയാണ്. 100-ലധികം തവണ ഇത്തരത്തില്‍ മുകളിലേക്കും താഴേക്കും ഷട്ടര്‍ വലിച്ചു താഴ്ത്തുകയും മുകളിലേക്ക് കയറ്റുകയും ചെയ്തു. പെരിങ്ങല്‍കുത്ത് ഡാമിന്റെ ക്രസ്റ്റ് ഗേറ്റുകള്‍ അടച്ച് പുഴയിലേക്കുള്ള ഒഴുക്ക് നിയന്ത്രിച്ചു. ഇപ്പോള്‍ ഒരു സ്ലൂസ് ഗേറ്റു വഴി സെക്കന്‍ഡില്‍ 1.9 ലക്ഷം ലീറ്റര്‍ വെള്ളം മാത്രമാണു വിടുന്നത്.

ഡാമുകളില്‍ നിന്നുള്ള ഒഴുക്ക് നിലച്ചതോടെ ചാലക്കുടി പുഴയിലെ ജലനിരപ്പ് താഴ്ന്നു. എന്നാല്‍ പുഴയുടെ സമീപത്തുള്ളവര്‍ ജാഗ്രത പാലിക്കണമെന്ന് ഡാം സുരക്ഷാ വിഭാഗം അറിയിച്ചു. അപ്പര്‍, ലോവര്‍ ഷോളയാര്‍ ഡാമുകളുടെ ഷട്ടറുകളും നേരത്തെ അടച്ചിരുന്നു.