സഹോദരന്‍ കുഴഞ്ഞുവീണ് മരിച്ചെന്ന വിവരമറിഞ്ഞതിന് പിന്നാലെ സഹോദരി ഹൃദയാഘാതം മൂലം മരിച്ചു . ഏലൂക്കര പതുവന പരേതനായ മുസ്തഫയുടെ മകന്‍ നാദിര്‍ഷ (42), സഹോദരിയും നെടുവന്നൂര്‍ മണിയന്‍പാറ എം.ഐ.അബുവിന്റെ ഭാര്യയുമായ നസീമ (48) എന്നിവരാണ് മരിച്ചത് .
അലുമിനിയം ഫാബ്രിക്കേഷന്‍ ജോലി ചെയ്യുന്നതിനിടെയാണ് നാദിര്‍ഷ ഇന്നലെ രാവിലെ 11 ഓടെ ആലങ്ങാട് വച്ച് കുഴഞ്ഞുവീണത് . ഉടനെ ആലുവയിലെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിക്കുകയായിരുന്നു .

സംഭവമറിഞ്ഞ് ഭര്‍ത്തൃഗൃഹത്തില്‍ നിന്ന് ഏലൂക്കരയിലേക്ക് വരുന്നതിനിടെ നസീമയ്ക്ക് നെഞ്ചുവേദനയുണ്ടായി . വഴിമധ്യേ ദേശത്തുള്ള സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല . അമീനയാണ് നാദിര്‍ഷായുടെ ഭാര്യ. ഏകമകള്‍: ഹസ ഖദീജ വിദ്യാര്‍ഥിനിയാണ്.