തെരഞ്ഞെടുപ്പിൽ യുഡിഎഫുമായി സഹകരിക്കാനാണ് താത്പര്യമെന്ന് വെളിപ്പെടുത്തി പൂഞ്ഞാര്‍ എം എല്‍ എ പി സി ജോര്‍ജ്. കഴിഞ്ഞ തവണ ജനപക്ഷം സംസ്ഥാന കമ്മിറ്റി ചേര്‍ന്നപ്പോള്‍ ഭൂരിപക്ഷം പേരും യുഡിഎഫുമായി സഹകരിച്ചു പോകണമെന്നാണ് അദ്ദേഹം അഭിപ്രായപ്പെട്ടത്. യുഡിഎഫിന്റെ തീരുമാനം കൂടി കണക്കിലെടുത്തായിരിക്കും അക്കാര്യത്തില്‍ അന്തിമ തീരുമാനമെടുക്കുകയെന്നും പി സി ജോര്‍ജ്.  അടുത്ത ആഴ്ച ജനപക്ഷം കമ്മിറ്റി വിളിച്ചിട്ടുണ്ടെന്നും ഇതുസംബന്ധിച്ച വിഷയം അന്ന് ചര്‍ച്ച ചെയ്യുമെന്നും അതിന് ശേഷം തീരുമാനം ഔദ്യോഗികമായി അറിയിക്കുമെന്നും പി സി ജോര്‍ജ് അറിയിച്ചു.

എന്നാൽ പി സി തോമസിന്റെ യുഡിഎഫ് പ്രവേശനത്തെ പി സി ജോര്‍ജ് പിന്തുണച്ചു. പി സി തോമസിന് ബിജെപിയുമായി സഹകരിച്ച്‌ മുന്നോട്ടു പോകുക പ്രയാസമാണ്. കാരണം സംസ്ഥാനത്ത് ബിജെപിയുടെ അവസ്ഥ എങ്ങനെയാണെന്ന് ജനങ്ങള്‍ക്ക് അറിയാം. എല്‍ഡിഎഫുമായി സഹകരിച്ച്‌ പോകുക എന്നതും പി സി തോമസിനെ സംബന്ധിച്ചിടത്തോളം ബുദ്ധിമുട്ടാണ്. പി സി തോമസിന് എന്തുകൊണ്ടും യുഡിഎഫ് തന്നെയാണ് തല്ലതെന്നും പി സി ജോര്‍ജ് അഭിപ്രായപ്പെട്ടു. എൽഡിഎഫിലേക്കാണോ അദ്ദേഹം പോകുക എന്ന ചോദ്യങ്ങൾക്ക് അദ്ദേഹം തക്കതായ മറുപടി നൽകിയിരുന്നു. എൽഡിഎഫിലേക്ക് എന്റെ പട്ടി പോകുമെന്നായിരുന്നു അദ്ദേഹം പ്രതികരിച്ചത് .