തറയില്‍ വച്ചാല്‍ ഉറുമ്പരിക്കും തലയില്‍ വച്ചാല്‍ പേനരിക്കും എന്നതു പോലെയാണ് ബിനീഷിനേയും ബിനോയിയേയും മഹാനായ ആ അച്ഛന്‍ വളര്‍ത്തിയത്. ഒരു പേരുദോഷത്തിനും ഇടനല്‍കാതെ പാര്‍ട്ടിയുടെ വലിയ പദവിയിലെത്തിയ കോടിയേരി ബാലകൃഷ്ണന്‍ ആകെ വിഷമിച്ചത് മക്കളെ കുറിച്ചോര്‍ത്താണ്. മക്കള്‍ ചെയ്യുന്നതിനെല്ലാം ഉത്തരം പറയേണ്ടുന്ന ഒരു അച്ഛന്റെ ഗതികേട് ആര്‍ക്കും പറഞ്ഞു തരേണ്ടതില്ലല്ലോ. എത്രയൊക്കെ തള്ളിപ്പറഞ്ഞാലും എത്രയായാലും എന്‍ ഉണ്ണിയല്ലേ... അവന്‍ വിലപിടിക്കാത്ത നിധിയല്ലേ എന്ന പാട്ടുപോലെയല്ലേ ഓരോ മക്കളും.

സ്വാശ്രയ കോളേജ് സമരത്തില്‍ പോലീസിനെ ആക്രമിച്ച വിദ്യാര്‍ഥി നേതാവില്‍ നിന്ന് മയക്കുമരുന്ന് കേസിലെ സാമ്പത്തിക ഇടപാടില്‍ അറസ്റ്റിലാകുന്നതുവരെ ബിനീഷ് കോടിയേരി ഉള്‍പ്പെട്ട വിവാദങ്ങള്‍ നിരവധി. വിദേശകമ്പനിയില്‍ ലക്ഷങ്ങള്‍ പ്രതിഫലത്തില്‍ നിയമനം നേടിയത് മുതല്‍ സിനിമാ ബന്ധവും സെലിബ്രിറ്റി ക്രിക്കറ്റ് നടത്തിപ്പും പണമിടപാടുകളും ബിനീഷ് കോടിയേരിയെ എന്നും വിവാദങ്ങളുടെ തോഴനാക്കി.

എസ്.എഫ്.ഐ.യുടെ സമരങ്ങളില്‍ ഉണ്ടായിരുന്നെങ്കിലും ഇത് രാഷ്ട്രീയത്തിലേക്കുള്ള കാല്‍വെപ്പായില്ല. ക്രിമിനല്‍ കേസുകളില്‍ പ്രതിയായിരിക്കെ ബിനീഷ് പാസ്‌പോര്‍ട്ട് സ്വന്തമാക്കിയതാണ് ആദ്യവിവാദം. പോലീസിനെ ആക്രമിച്ച കേസുകള്‍ ഇടതുപക്ഷം അധികാരത്തില്‍ വന്നപ്പോള്‍ പിന്‍വലിക്കപ്പെട്ടു.

ദുബായ് കേന്ദ്രീകരിച്ച് ബിസിനസിലേക്ക് നീങ്ങിയ ബിനീഷ് പിന്നീട് പൊതുവേദികളില്‍ അധികം ഉണ്ടായിരുന്നില്ല. ബെംഗളൂരു മയക്കുമരുന്നു കേസില്‍ പിടിയിലായ അനൂപിന് സാമ്പത്തികസഹായം നല്‍കിയതാണ് ബിനീഷിനെ ഇപ്പോള്‍ കുടുക്കിയത്.

ചെറിയ ചെറിയ വിവാദത്തില്‍ നിന്നാണ് ബിനീഷ് ഇപ്പോള്‍ വലിയ കേസില്‍ പെട്ടത്. ബെംഗളൂരുവില്‍ വിദേശ വനിതയ്‌ക്കൊപ്പം ബിനീഷിന്റെ പടം പ്രചരിച്ചത് ഏറെ വിവാദമായി. കടലില്‍ കുളിക്കുന്നവനെ ഉപ്പുവെള്ളം കാണിച്ച് പേടിപ്പിക്കരുതെന്നായിരുന്നു അന്നു ബിനീഷിന്റെ മറുപടി.
ഇഡി ബെംഗളൂരുവിലാണ് ഇപ്പോള്‍ ബിനീഷിനെ അറസ്റ്റു ചെയ്തതെങ്കില്‍ 2 വര്‍ഷം മുന്‍പ് ജ്യേഷ്ഠന്‍ ബിനോയിയെ അറസ്റ്റ് ചെയ്തു ജാമ്യത്തില്‍ വിട്ടയച്ചതു മുംബൈ ഓഷിവാര പൊലീസാണ്. ഇതിനു മുന്‍പാണ് ബിനോയിക്കെതിരെ ദുബായില്‍ കേസുണ്ടായത്.

10 ലക്ഷം ദിര്‍ഹത്തിന്റെ അതായത് 2 കോടിയിലേറെ രൂപ ചെക്ക് മടങ്ങിയ കേസില്‍ ബിനോയിക്കെതിരെ യുഎഇ സ്വദേശിയുടെ ജാസ് ടൂറിസം കമ്പനി കേസ് നല്‍കി. കോടതി ചെലവടക്കം 13 കോടി രൂപ നല്‍കാനുണ്ടെന്നു കാണിച്ചു യുഎഇ പൗരന്‍ സിപിഎം കേന്ദ്ര നേതൃത്വത്തെയും സമീപിച്ചു.

സാമ്പത്തികത്തട്ടിപ്പു കേസില്‍ യുഎഇ കോടതി വിധിച്ച 2 മാസം തടവില്‍ നിന്നു ബിനീഷ് രക്ഷപ്പെട്ടത് പണം തിരിച്ചടച്ച് ഒത്തുതീര്‍പ്പിലൂടെയാണ്.

സൗദി ആസ്ഥാനമായ സാംബ ഫിനാന്‍സിയേഴ്‌സിന്റെ ദുബായ് ശാഖയില്‍നിന്നെടുത്ത വായ്പ തിരിച്ചടച്ചയ്ക്കാതിരുന്നതിനെ തുടര്‍ന്നു ബര്‍ ദുബായ് പൊലീസ് സ്‌റ്റേഷനില്‍ ബിനീഷിനെതിരെ 2015 ഓഗസ്റ്റ് 6നു കേസ് റജിസ്റ്റര്‍ ചെയ്തു. 2,25,000 ദിര്‍ഹം ഏകദേശം 45.6 ലക്ഷം രൂപ അടയ്ക്കാനുണ്ടെന്നായിരുന്നു റിപ്പോര്‍ട്ട്.
2017 ഡിസംബര്‍ 10നു ബിനീഷിനു 2 മാസം തടവു വിധിച്ചു.

യുഎഇയിലെത്തിയാല്‍ അറസ്റ്റിലാകുമെന്ന സ്ഥിതിയായി. ദുബായ് പൊലീസിന്റെ പട്ടികയില്‍ ബിനീഷിനെ പിടികിട്ടാപ്പുള്ളി ആയി രേഖപ്പെടുത്തി. യുഎഇ ബാങ്കുകളില്‍ നിന്നു വായ്പ ലഭിക്കാത്ത തരത്തില്‍ വിലക്കുപട്ടികയില്‍ ഉള്‍പ്പെടുത്തുകയും ചെയ്തു. ഇതിനിടെ നാട്ടിലിരുന്നു തന്നെ, ഒത്തുതീര്‍പ്പ് വഴികള്‍ തേടിയ ബിനീഷ് അറസ്റ്റ് ഒഴിവാക്കുന്നതില്‍ വിജയിച്ചു. വായ്പാ തിരിച്ചടവുമായി ബന്ധപ്പെട്ട് മറ്റു രണ്ടു കേസുകള്‍ കൂടി ഇവിടെ ഉണ്ടായിരുന്നു. ഇതിന് പിന്നാലെയാണ് മയക്ക് മരുന്ന് കേസില്‍ അപ്രതീക്ഷിതമായി കുടുങ്ങിയത്.