സര്ക്കാര് മേഖലയിലെ മുഴുവന് ആരോഗ്യ പ്രവര്ത്തകരുടേയും അങ്കണവാടി ജീവനക്കാരുടേയും രജിസ്ട്രേഷന് പൂര്ത്തിയായി! സംസ്ഥാനത്ത് കോവിഡ് വാക്സിന് രജിസ്ട്രേഷന് അന്തിമഘട്ടത്തിലെന്ന് ആരോഗ്യമന്ത്രി കെ.കെ.ശൈലജ...
സംസ്ഥാനത്ത് കോവിഡ് വാക്സിന് രജിസ്ട്രേഷന് അന്തിമഘട്ടത്തിലെന്ന് ആരോഗ്യമന്ത്രി കെ.കെ.ശൈലജ. സര്ക്കാര് മേഖലയിലെ മുഴുവന് ആരോഗ്യ പ്രവര്ത്തകരുടേയും അങ്കണവാടി ജീവനക്കാരുടേയും രജിസ്ട്രേഷന് പൂര്ത്തിയായി. സര്ക്കാര് മേഖലയിലെ എല്ലാ സ്ഥാപനങ്ങളിലേയും (4064) സ്വകാര്യ മേഖലയിലെ 81 ശതമാനം സ്ഥാപനങ്ങളിലേയും (4557) ജീവനക്കാരുടെ ജില്ലാതല രജിസ്ട്രേഷന് ആണ് പൂര്ത്തിയായത്. തിരുവനന്തപുരം, ഇടുക്കി, പാലക്കാട്, മലപ്പുറം, കണ്ണൂര് എന്നീ ജില്ലകളിലെ എല്ലാ സ്വകാര്യ സ്ഥാപനങ്ങളിലേയും ജീവനക്കാര് രജിസ്ട്രേഷന് നടത്തിയിട്ടുണ്ട്. ബാക്കിയുള്ള സ്വകാര്യ സ്ഥാപനങ്ങളിലെ എല്ലാ ആരോഗ്യ പ്രവര്ത്തകരും എത്രയും വേഗം രജിസ്ട്രേഷന് പൂര്ത്തിയാക്കണമെന്നും മന്ത്രി അറിയിച്ചിട്ടുണ്ട്. ആദ്യ ഘട്ടത്തില് സര്ക്കാര്, സ്വകാര്യ മേഖലയിലുള്ള എല്ലാ വിഭാഗം ആരോഗ്യ പ്രവര്ത്തകര്ക്കും മെഡിക്കല് വിദ്യാര്ത്ഥികള്ക്കുമാണ് വാക്സിന് ലഭ്യമാക്കുക. മോഡേണ് മെഡിസിന്, ആയുഷ്, ഹോമിയോ തുടങ്ങിയ എല്ലാ വിഭാഗങ്ങളിലേയും സ്ഥിരവും താത്ക്കാലികവുമായി നിലവില് ജോലി ചെയ്യുന്ന എല്ലാവരും ഇതില് ഉള്പ്പെടും.
https://www.facebook.com/Malayalivartha
