ഫേസ്ബുക്കില് മുഖ്യമന്ത്രിയെ വിമര്ശിച്ച വൈദ്യുതി വകുപ്പ് ജീവനക്കാരനെ സസ്പെന്റ് ചെയ്തു
മുഖ്യമന്ത്രിയെ വിമര്ശിച്ചുകൊണ്ട് ഫേസ് ബുക്കില് പോസ്റ്റ് ഇട്ടതിന് വൈദ്യൂതി ബോര്ഡ് ഡെപ്യൂട്ടി ചീഫ് എഞ്ചിനീയര് ആര് സുകുവിനെ സസ്പെന്റ് ചെയ്തു. സോളാര് വിഷയവുമായി ബന്ധപ്പെട്ടാണ് സുകു മുഖ്യമന്ത്രിക്കെതിരെ പോസ്റ്റിട്ടത്. ഇതോടെ സംസ്ഥാനത്ത് ഫേസ്ബുക്കില് അഭിപ്രായ പ്രകടനം നടത്തിയതിന്റെ പേരില് സസ്പെന്ഷനിലാകുന്ന സര്ക്കാര് ജീവനക്കാരുടെ എണ്ണം മൂന്നായി. കഴിഞ്ഞ ദിവസം സെക്രട്ടേറിയറ്റിലെ രണ്ട് ഉദ്യോഗസ്ഥരരേയും സസ്പെന്റ് ചെയ്തിരുന്നു. വൈദ്യുതിമന്ത്രി ആര്യാടന് മുഹമ്മദിന്റെ നിര്ദേശ പ്രകാരമാണ് സുകുവിനെ സസ്പെന്റ് ചെയ്തത്.
സോളാര് വിഷയത്തില് പത്ര-ദൃശ്യ മാധ്യമങ്ങളില് സര്ക്കാരിനെതിരെ വന് വിമര്ശനങ്ങള് ഉയര്ന്നു വരുമ്പോള് അതിനെ പ്രതിരോധിക്കാന് സര്ക്കാര് പാടുപെടുകയാണ്. അതിനിടയില് സോഷ്യല് നെറ്റ്വര്ക്കിംഗ് സൈറ്റുകളിലും സര്ക്കാരിനെതിരെ എതിരാളികള് ആഞ്ഞടിക്കുകയാണ്. ഉമ്മന്ചാണ്ടിക്കും, തിരുവഞ്ചൂരിനുമെതിരെ സഭ്യവും അസഭ്യവും നിറഞ്ഞ അനേകം പോസ്റ്റുകള് ഫേസ്ബുക്കില് വന്നുകൊണ്ടിരിക്കുകയാണ്. ഇതിനെ പ്രതിരോധിക്കാന് തെറ്റയില് വിഷയവുമായി സര്ക്കാര് അനുകൂലികളും എത്തുന്നുണ്ട്.
മുഖ്യമന്ത്രിയും ജോപ്പനും ഒരുമിച്ച് നില്ക്കുന്ന ഫോട്ടോയില് തൊപ്പിവെച്ച കള്ളനും,തൊപ്പിവെക്കാത്ത കള്ളനും എന്ന പോസ്റ്റാണ് വൈദ്യുതി ബോര്ഡ് എഞ്ചിനീയറായ സുകു ഫേസ്ബുക്കില് ഇട്ടത്. എന്നാല് പോസ്റ്റ് വിവാദമായതോടെ സുകു പോസ്റ്റ് പിന്വലിച്ചിരുന്നു. എന്നാല് വൈദ്യുതിബോര്ഡിന് ചീത്തപ്പേരുണ്ടാക്കി എന്നാരോപിച്ച് സുകുവിനെ സസ്പെന്റ് ചെയ്യുകയായിരുന്നു.
സര്ക്കാരിനെതിരെ മാധ്യമങ്ങളിലൂടെ വ്യാജപ്രചാരണം നടത്തിയാല് നടപടിയെടുക്കാവുന്ന ചട്ടപ്രകാരമാണ് മൂന്നു പേരേയും സസ്പെന്റ് ചെയ്തിരിക്കുന്നത്. എന്നാല് ഫേസ്ബുക്കിലൂടെയുള്ള അഭിപ്രായ പ്രകടനങ്ങള് വ്യാജപ്രചാരണത്തിന്റെ പരിധിയില് വരുമോ എന്നകാര്യത്തില് വ്യക്തതയില്ല. നിയമവിദഗ്ധര്ക്കിടയിലും ഇക്കാര്യത്തില് വ്യത്യസ്ത അഭിപ്രായമാണുള്ളത്. സെക്രട്ടേറിയറ്റിലെ പൊതുഭരണ വകുപ്പിലെ പ്രേമാനന്ദന്, നിയമവകുപ്പിലെ ചന്ദ്രപ്രസാദ് എന്നിവരാണ് മുന്പ് സസ്പെന്ഷനിലായവര്. ഇത്തരം സാഹചര്യത്തില് ആരോപണ വിധേയരായവരോട് ആദ്യം വിശദ്ദീകരണം ചോദിക്കണം എന്നാണ് ചട്ടം. എന്നാല് സസ്പെന്ഷനിലായ മൂന്നു പേരുടേയും കാര്യത്തില് ഈ ചട്ടം പാലിച്ചിട്ടില്ല എന്ന വിമര്ശനം ഉയര്ന്നു വന്നിട്ടുണ്ട്.
https://www.facebook.com/Malayalivartha
