മുഖ്യമന്ത്രി പിണറായി വിജയനെതിരെ നടത്തിയ പരാമര്‍ശം വിവാദമാക്കിയത് കോണ്‍ഗ്രസ് തന്നെ; ഷാനിമോള്‍ ഉസ്മാനും ചെന്നിത്തലയും പാര്‍ട്ടിക്കുള്ളിലെ ഏതോ ശക്തികളുടെ താല്‍പര്യത്തിനനുസരിച്ച്‌ പ്രവര്‍ത്തിക്കുകയാണ്; പരാമര്‍ശത്തില്‍ ഉറച്ച്‌ നില്‍ക്കുന്നതായി സുധാകരന്‍ കെ. സുധാകരന്‍
മുഖ്യമന്ത്രി പിണറായി വിജയനെതിരെ നടത്തിയ പരാമര്‍ശം വിവാദമാക്കിയത് കോണ്‍ഗ്രസ്സാണെന്നും താന്‍ ജാതിവെറിയനല്ലെന്നും കെ. സുധാകരന്‍. മാപ്പ് പറയണമെന്ന പ്രസ്താവനയുമായി ഇറങ്ങിയ ഷാനിമോള്‍ ഉസ്മാനും തന്‍റെ പ്രസ്താവനയെ ആദ്യം ന്യായീകരിക്കുകയും പിന്നീട് വിമര്‍ശിക്കുകയും ചെയ്ത ചെന്നിത്തലയും പാര്‍ട്ടിക്കുള്ളിലെ ഏതോ ശക്തികളുടെ താല്‍പര്യത്തിനനുസരിച്ച്‌ പ്രവര്‍ത്തിക്കുകയാണെന്നും സുധാകരന്‍ പറഞ്ഞു. ആദ്യം സുധാകരനെ ന്യായീകരിച്ച്‌ ചെന്നിത്തല പിന്നീട് പരാമര്‍ശം ഒഴിവാക്കേണ്ടിയിരുന്നതാണെന്ന് അഭിപ്രായപ്പെട്ടിരുന്നു. കഴിഞ്ഞ ദിവസം നടത്തിയ പ്രസംഗത്തില്‍ ചെത്തുകാരന്‍റെ കുടുംബത്തില്‍ നിന്നും വളര്‍ന്നു വന്ന് കേരളത്തിന്‍റെ മുഖ്യമന്ത്രിയായി സഞ്ചരിക്കാന്‍ ഹെലികോപ്റ്ററെടുത്ത ആദ്യത്തെ മുഖ്യമന്ത്രിയാണ് പിണറായി എന്നായിരുന്നു സുധാകരന്‍റെ വിവാദ പരാമര്‍ശം.
പിണറായി വിജയനെ കുറിച്ച്‌ ജാതീയമായി ഒന്നും പറഞ്ഞിട്ടില്ലെന്നും തൊഴിലും കുടുംബ പശ്ചാത്തലവുമാണ് സൂചിപ്പിച്ചതെന്നും കെ സുധാകരന്‍ പറഞ്ഞു. താന്‍ പറഞ്ഞതില്‍ തെറ്റില്ലെന്നും പരാമര്‍ശത്തില്‍ ഉറച്ച്‌ നില്‍ക്കുന്നതായും സുധാകരന്‍ വ്യക്തമാക്കി. ഇതില്‍ തന്നെ വിമര്‍ശിക്കുന്ന ഹൈക്കമാന്‍റിന്‍റെ താരിഖ് അന്‍വറിനെയും സുധാകരന്‍ വിമര്‍ശിച്ചു.
ഒരു തൊഴില്‍ വിഭാഗത്തെ കുറിച്ച്‌ പറഞ്ഞതില്‍ എന്താണ് തെറ്റ്. താന്‍ മര്യാദ ലംഘനം നടത്തിയിട്ടുണ്ടെങ്കില്‍ ചൂണ്ടിക്കാട്ടണം. ജാതീയമായി അധിക്ഷേപിച്ചിട്ടില്ല. ഇക്കാര്യത്തില്‍ സിപിഎമ്മിന് ഇല്ലാത്ത വിഷമമാണ് ഷാനിമോള്‍ ഉസ്മാനെ പോലെയുള്ളവര്‍ക്കെന്നും സുധാകരന്‍ പറയുന്നു. മാപ്പ് പറയണമെന്ന് ഷാനിമോള്‍ ആവശ്യപ്പെട്ടതിന് പിന്നില്‍ എന്താണെന്ന് മനസിലാകുന്നില്ല. കോണ്‍ഗ്രസ് നേതാക്കള്‍ക്കെതിരെ പ്രസ്താവന വന്നപ്പോള്‍ ഉണ്ടാകാതിരുന്ന രോഷം പിണറായിയെ കുറിച്ച്‌ പറഞ്ഞപ്പോള്‍ വന്നതില്‍ സംശയിക്കുന്നു.
https://www.facebook.com/Malayalivartha
