വേലിയില്‍ ഇരുന്ന കെ സുധാകരന്റെ വിവാദ പ്രസ്താവനയെ എവിടയോ എടുത്ത് വച്ച അവസ്ഥ പോലെയാണ് കോണ്‍ഗ്രസിന്. കെ. സുധാകരന്‍ നടത്തിയ വിവാദ പ്രസ്താവനയ്‌ക്കെതിരെ ഷാനിമോള്‍ ഉസ്മാന്‍ തുടങ്ങിവച്ച മാപ്പ് മറ്റ് കോണ്‍ഗ്രസ് നേതാക്കളും ഏറ്റെടുത്തതോടെ കാര്യങ്ങള്‍ വഷളാകുകയാണ്. കെ. സുധാകരനെതിരെ നടപടിയെടുക്കാന്‍ കോണ്‍ഗ്രസില്‍ സമ്മര്‍ദ്ദം ഉയരുകയാണ്. അതേസമയം തന്നെ തൊട്ടാല്‍ കടുത്ത തീരുമാനങ്ങളിലേക്ക് നീങ്ങുമെന്ന് സുധാകരനും മുന്നറിയിപ്പ് നല്‍കിയിട്ടുണ്ട്. അതിന് പിന്നാലെയാണ് രമേശ് ചെന്നിത്തലയ്‌ക്കെതിരെ സുധാകരന്‍ ആഞ്ഞടിച്ചത്. തന്റെ മനസിലിരുപ്പ് രാഹുല്‍ ഗാന്ധിയെ കണ്ടപ്പോഴും സുധാകരന്‍ ആവര്‍ത്തിച്ചു.

മുഖ്യമന്ത്രിക്ക് എതിരായ വിവാദപരാമര്‍ശത്തില്‍ പിന്നോട്ടില്ലെന്ന നിലപാടിലുറച്ച കെ സുധാകരന്‍ കോണ്‍ഗ്രസിനെ വെട്ടിലാക്കിയിരിക്കുകയാണ്. വിവാദത്തിന് പിന്നില്‍ പാര്‍ട്ടിയിലുളള ചിലര്‍ തന്നെയെന്നാണ് സുധാകരന്റെ ഒടുവിലത്തെ പ്രതികരണം. ഹൈക്കമാന്‍ഡ് പ്രതിനിധിക്കും പ്രതിപക്ഷ നേതാവിനും എതിരായ വിമര്‍ശനങ്ങളിലും സുധാകരന്‍ ഉറച്ചു നില്‍ക്കുകയാണ്. കെ പി സി സി അദ്ധ്യക്ഷ സ്ഥാനം കിട്ടാതെ പോയതിന് ശേഷം നേതൃത്വവുമായി തെറ്റി നില്‍ക്കുന്ന സുധാകരനെതിരെ നടപടിയെടുക്കണമെന്നും പാര്‍ട്ടിയിലെ ഒരു വിഭാഗം വാദിക്കുന്നു.

മുഖ്യമന്ത്രിയെ രാഷ്ട്രീയമായി വിമര്‍ശിച്ചതിന്റെ പേരില്‍ പാര്‍ട്ടിയില്‍ ഒറ്റപ്പെടുത്തിയെന്നാണ് സുധാകരന്റെ പരാതി. പ്രതിപക്ഷ നേതാവിനെയും എ ഐ സി സി സെക്രട്ടറിയെയും അടക്കം വിമര്‍ശിച്ച സാഹചര്യത്തില്‍ സുധാകരന് എതിരെ നടപടി എടുക്കാതെ മുന്നോട്ട് പോകാനാകില്ലെന്ന നിലയിലാണ് നേതൃത്വം. നേതാക്കളെ വിമര്‍ശിച്ചതിന്റെ പേരില്‍ പാര്‍ട്ടി നടപടിയിലേക്ക് നീങ്ങിയാല്‍, കടുത്ത നിലപാടിലേക്ക് കടക്കാന്‍ തന്നെയാണ് സുധാകരന്റെയും തീരുമാനം. മുഖ്യമന്ത്രിക്ക് എതിരായ പരാമര്‍ശം ജാതീയമല്ലെന്ന് വിശദീകരിക്കുന്ന സുധാകരന്‍ തിരുത്തില്ലെന്ന് ആവര്‍ത്തിക്കുന്നുമുണ്ട്. അതേസമയം, തിരഞ്ഞെടുപ്പ് അടുത്തുനില്‍ക്കെ ജനസ്വാധീനമുളള സുധാകരനെതിരെ നടപടിയെടുക്കുന്നത് പാര്‍ട്ടിക്ക് തിരിച്ചടിയാകുമെന്നും വിലയിരുത്തലുണ്ട്.


മുഖ്യമന്ത്രിക്കെതിരായ വിവാദപരാമര്‍ശത്തില്‍ ഹൈക്കമാന്‍ഡിനെയും പ്രതിപക്ഷ നേതാവിനെയും തള്ളിപ്പറഞ്ഞാന് കെ സുധാകരന്‍ രംഗത്തെത്തിയത്. താരീഖ് അന്‍വറിനെ മറ്റാരോ നിയന്ത്രിക്കുന്നുവെന്നും പ്രതിപക്ഷ നേതാവ് വാക്ക് മാറ്റിയെന്നും സുധാകരന്‍ ചാനല്‍ ചര്‍ച്ചകലില്‍ ആരോപിച്ചു. തനിക്കെതിരെ പാര്‍ട്ടിയില്‍ നീക്കം നടക്കുന്നുണ്ടെന്നും വിവാദത്തിന് പിന്നില്‍ സിപിഎം അല്ലെന്നും സുധാകരന്‍ പറഞ്ഞു.

പരാമര്‍ശത്തില്‍ ജാതിവെറിയില്ലെന്ന് സുധാകരന്‍ ന്യൂസ് അവറിലും ആവര്‍ത്തിച്ചു. ' ഞാനും അദ്ദേഹവും ഒരു ജാതിയാണ്. ഞാന്‍ നമ്പൂതിരിയോ ഭട്ടതിരിപ്പാടോ നായരോ ഒന്നുമല്ല ഈഴവനാണ് ' താന്‍ ഉദ്ദേശിച്ചത് താഴ്ന്ന സാമ്പത്തിക സാഹചര്യത്തില്‍ നിന്ന് ഉയര്‍ന്ന് വന്ന കമ്മ്യൂണിസ്റ്റ് നേതാവ് ആര്‍ഭാട ജീവിതം നയിക്കുന്നുവെന്നാണ്. സാമ്പത്തികമായി പിന്നോക്കം നില്‍ക്കുന്ന കുടുംബത്തില്‍ നിന്ന് ഉയര്‍ന്ന് വന്നയാള്‍ മുകളിലോട്ട് പോകുമ്പോള്‍ കാഴ്ചപ്പാട് മാറുന്നതെങ്ങനെയെന്ന് സഖാക്കള്‍ മനസിലാക്കണമെന്നാണ് സുധാകരന്‍ പറഞ്ഞു.

എന്ത് കൊണ്ടാണ് തന്റെ പ്രസ്താവനയെ തള്ളിപ്പറഞ്ഞതെന്ന് പ്രതിപക്ഷ നേതാവിനോട് ചോദിക്കണമെന്ന് സുധാകരന്‍ ആവശ്യപ്പെട്ടു. ഇന്നലെ രാത്രി സംസാരിച്ചപ്പോള്‍ അതില്‍ തെറ്റില്ലെന്ന് പറഞ്ഞയാള്‍ ഇന്ന് അത് മാറ്റിപ്പറയുന്നുണ്ടെങ്കില്‍ അതെന്ത് കൊണ്ടാണെന്ന് അദ്ദേഹത്തോട് ചോദിക്കണം. ഷാനിമോള്‍ ഉസ്മാന്റെ പ്രസ്താവന വന്നപ്പോള്‍ പ്രതിപക്ഷ നേതാവിനെ വിളിച്ചിരുന്നുവെന്നും അപ്പോള്‍ അദ്ദേഹം അനുകൂലിച്ചുവെന്നുമാണ് സുധാകരന്‍ പറയുന്നത്.

ഷാനിമോള്‍ ഉസ്മാന്റെ പ്രസ്താവനയാണ് വിവാദത്തിലേക്ക് നയിച്ചതെന്നും സുധാകരന്‍ ആരോപിച്ചു. സിപിഎമ്മിന്റെ ഒരു എംഎല്‍എയോ നേതാവോ പ്രതികരിക്കാതിരുന്നപ്പോഴാണ് പ്രസ്താവന വന്നതെന്നും സുധാകരന്‍ പറഞ്ഞു. കെപിസിസി പ്രസിഡന്റ് സ്ഥാനത്തേക്ക് തന്റെ പേര് ചര്‍ച്ച ചെയ്യപ്പെടുമ്പോള്‍ ഇങ്ങനെ ഒരു വിവാദമുണ്ടാക്കിയത് ഗൂഡാലോചനയുണ്ടോയെന്ന് സംശയിക്കുന്നതായും സുധാകരന്‍ പറഞ്ഞു. എന്തായാലും സുധാകരനെതിരെ എന്ത് നടപടി ഉണ്ടാകുമെന്നാണ് കേരളം കാതോര്‍ക്കുന്നത്. തെരഞ്ഞെടുപ്പ് വേളയില്‍ സുധാകരനെ തത്ക്കാലം പ്രകോപിക്കില്ല എന്നാണ് അറിയുന്നത്. പ്രകോപിപ്പിച്ചാല്‍ വിവരമറിയും.