ആറ്റുകാല്‍ ഭഗവതി ക്ഷേത്രത്തിലെ പൊങ്കാല ഉത്സവത്തിന് ഇന്ന് തുടക്കം. രാവിലെ 9.45ന് ദേവിയെ കാപ്പുകെട്ടി കുടിയിരുത്തുന്നതോടുകൂടി ഉത്സവം തുടങ്ങും. പച്ചപ്പന്തലില്‍ തോറ്റംപാട്ടും ആരംഭിക്കും. ഇതിന് ശേഷം മാത്രമേ ഭക്തരെ ക്ഷേത്രത്തിനുള്ളില്‍ പ്രവേശിപ്പിക്കൂവെന്ന് ക്ഷേത്ര ഭാരവാഹികള്‍ അറിയിച്ചു.

വൈകിട്ട് 6.30ന് പ്രധാന വേദിയായ അംബാ ഓഡിറ്റോറിയത്തില്‍ കലാപരിപാടികളുടെ ഉദ്ഘാടനം നടന്‍ നെടുമുടി വേണു നിര്‍വഹിക്കും. ആറ്റുകാല്‍ അംബാ പുരസ്‌കാരം അദ്ദേഹത്തിന് സമ്മാനിക്കും. രാത്രി 8ന് ശ്രീരഞ്ജിനി കോടമ്പള്ളിയുടെ സംഗീതക്കച്ചേരി, 10.30ന് നൃത്താര്‍ച്ചന എന്നിവയുമുണ്ടാകും.

അംബാലിക ഓഡിറ്റോറിയത്തില്‍ രാവിലെ 5.30ന് ഭജന, വൈകിട്ട് അഞ്ചിന് ചാക്യാര്‍കൂത്ത്, ആറിന് ശാസ്ത്രീയനൃത്തം, ഏഴിന് നങ്ങ്യാര്‍കൂത്ത്, എട്ടിന് ഭക്തിഗാനസുധ, ഒന്‍പതിന് സംഗീതാര്‍ച്ചന എന്നിവയും നടക്കും. അംബാ ഓഡിറ്റോറിയത്തില്‍ രാവിലെ 10.30 മുതല്‍ പ്രസാദ് ഊട്ട് ഉണ്ടായിരിക്കും.

27നാണ് പൊങ്കാല. 28ന് രാത്രി കുരുതി തര്‍പ്പണത്തോടുകൂടി ഉത്സവം സമാപിക്കും. കൊവിഡ് വ്യാപനത്തെ തുടര്‍ന്ന് ക്ഷേത്രത്തിലെ പണ്ടാരയടുപ്പില്‍ മാത്രമായിരിക്കും പൊങ്കാല.

ദര്‍ശനത്തിനായി എത്തുമ്പോള്‍ അകലം പാലിക്കുന്നതിനായി താത്കാലിക ബാരിക്കേഡുകള്‍ സജ്ജമാക്കി . മാസ്‌ക് നിര്‍ബന്ധമാക്കി. കൈകള്‍ വൃത്തിയാക്കുന്നതിനും ശരീരോഷ്മാവ് പരിശോധിക്കുന്നതിനും സൗകര്യമുറപ്പാക്കി.

പത്ത് വയസിന് താഴെയുള്ളവരും 65 വയസിന് മുകളിലുള്ളവരും ദര്‍ശനത്തിനെത്തരുത്. ദര്‍ശനത്തിനെത്തുന്നവര്‍ മെയിന്‍ ഗേറ്റിലൂടെ പ്രവേശിച്ച് തൊഴുതതിന് ശേഷം കിഴക്ക് ഭാഗത്തുള്ള ഗേറ്റിലൂടെ പുറത്തിറങ്ങേണ്ടത്. അധികസമയം കോമ്പൗണ്ടിനുള്ളില്‍ ചെലവഴിക്കരുത്. 190 വോളണ്ടിയര്‍മാരും പൊലീസും ഭക്തരെ നിയന്ത്രിക്കും.

പ്രധാന കവാടത്തിലൂടെ മാത്രമേ ക്ഷേത്രത്തില്‍ പ്രവേശിക്കാന്‍ പാടുള്ളു. കലാപരിപാടികള്‍ നടക്കുന്ന വേദിയില്‍ 200 പേര്‍ക്ക് ഇരിക്കാം. മെഡിക്കല്‍, ഫയര്‍ഫോഴ്‌സ് സംഘത്തിന്റെ സേവനം ലഭ്യം.

വിപുലമായ സുരക്ഷാ ക്രമീകരണങ്ങള്‍ ഏര്‍പ്പെടുത്തിയതായി സിറ്റി പൊലീസ് കമ്മിഷണര്‍ ബല്‍റാംകുമാര്‍ ഉപാദ്ധ്യായ അറിയിച്ചു. രണ്ട് ഘട്ടങ്ങളിലായി 1500 പൊലീസ് ഉദ്യോഗസ്ഥരെയാണ് സുരക്ഷയ്ക്ക് നിയോഗിക്കുക. ഇന്ന് മുതലുളള ആദ്യഘട്ടത്തില്‍ 500 പൊലീസുകാരെയും 26 മുതലുള്ള രണ്ടാം ഘട്ടത്തില്‍ അധികമായി 1000 പൊലീസുകാരെയുമാണ് വിന്യസിക്കുന്നത്.

നാല് അസിസ്റ്റന്റ് കമ്മിഷണര്‍മാരും 22 ഇന്‍സ്പെക്ടര്‍മാരും നേതൃത്വം നല്‍കും. ഡെപ്യൂട്ടി പൊലീസ് കമ്മിഷണര്‍ ഡോ. വൈഭവ് സക്സേനയ്ക്കാണ് ക്രമീകരണങ്ങളുടെ പൂര്‍ണ ചുമതല.

ദര്‍ശനത്തിന് വരുന്നവരുടെ വാഹനങ്ങള്‍ പാടശേരി ഭാഗത്ത് ക്രമീകരിച്ചിട്ടുളള പാര്‍ക്കിംഗ് ഏരിയയില്‍ മാത്രമേ പാര്‍ക്ക് ചെയ്യാന്‍ പാടുള്ളൂ.പ്രധാനപ്പെട്ട സ്ഥലങ്ങളില്‍ നിരീക്ഷണ കാമറകളും ഡ്രോണ്‍ കാമറ സംവിധാനവും ഏര്‍പ്പെടുത്തിയിട്ടുണ്ട്.