അങ്കം കൊഴുക്കുമ്പോള്... ഉറപ്പാണ് എല്ഡിഎഫ് കത്തിപ്പടരുമ്പോള് ആളിക്കത്തിച്ച് അറപ്പാണ് എല്ഡിഎഫുമായി കെ. സുരേന്ദ്രന്; കമ്യൂണിസ്റ്റ് പാര്ട്ടി തട്ടിപ്പുകാരുടെ പാര്ട്ടിയായി; നാല് ഭാഷകളില് ജനങ്ങളെ കൈയ്യിലെടുത്ത് നിര്മ്മല സീതാ രാമന്; സംസ്ഥാന സര്ക്കാരിനെതിരെ ആഞ്ഞടിച്ച് കേന്ദ്രമന്ത്രി
എല്ഡിഎഫിന്റെ പ്രചരണ മുദ്രാവാക്യമായ ഉറപ്പാണ് എല്ഡിഎഫ് വൈറലായിരിക്കുകയാണ്. എന്നാല് എതിരാളികള്ക്ക് വൈറല് നല്കി ബിജെപി അധ്യക്ഷന് കെ. സുരേന്ദ്രന് പുതിയ മുദ്രാവാക്യം നല്കിയിരിക്കുകയാണ്.
എല്ഡിഎഫിന്റെ നിയമസഭാ തെരഞ്ഞെടുപ്പ് പ്രചരണത്തിന്റെ മുദ്രാവാക്യത്തെ പരിഹസിച്ചാണ് കെ. സുരേന്ദ്രന് രംഗത്തെത്തിയത്. ഉറപ്പല്ല അറപ്പാണ് എല്ഡിഎഫ് എന്നാണ് വിജയയാത്രയ്ക്ക് തൃപ്പൂണിത്തുറയില് നല്കിയ സ്വീകരണ യോഗത്തില് അദ്ദേഹം പറഞ്ഞത്.
കേരള രാഷ്ട്രീയത്തെ മലീമസമാക്കിയവരാണ് എല്ഡിഎഫുകാര്. എങ്ങനെയാണ് കേരളത്തിന്റെ ഭരണവ്യവസ്ഥയില് കള്ളന്മാര്ക്ക് കയറി വരാന് സാധിക്കുന്നതെന്നും സുരേന്ദ്രന് ചോദിച്ചു. കമ്യൂണിസ്റ്റ് പാര്ട്ടി പൂര്ണ്ണമായും തട്ടിപ്പുകാരുടെ പാര്ട്ടിയായി മാറി. മണിച്ചന് മുതല് ഇങ്ങോട്ട് എല്ലാ കള്ളന്മാരുടെയും അധോലോകക്കാരുടേയും പണം വാങ്ങിയവരാണ് സിപിഎമ്മുകാര്.
യുഡിഎഫ് അഴിമതിയുടെ കാര്യത്തില് അതിനേക്കാള് മുകളിലാണ്. അഴിമതിയില് മുങ്ങി കുളിച്ച ഉമ്മന്ചാണ്ടിയെ മുന്പില്വയ്ക്കുകയാണവര്. എന്നാല് എന്ഡിഎ അഴിമതിക്കെതിരെ യുദ്ധം ചെയ്യുന്നവരെയാണ് മുന്പില് നിര്ത്തുന്നത്. ജേക്കബ് തോമസും ഇ. ശ്രീധരനുമെല്ലാം ബിജെപിക്കൊപ്പം നില്ക്കുന്നത് അഴിമതി തുടച്ച് നീക്കാനാണെന്നും സുരേന്ദ്രന് പറഞ്ഞു.
അതേസമയം നാല് ഭാഷകളില് സംസാരിച്ച് ജനത്തെ കൈയിലെടുത്ത് കേന്ദ്രധനമന്ത്രി നിര്മ്മല സീതാരാമന്. പരിഭാഷക്കെത്തിയ അഡ്വ.ഒ.എം. ശാലീനയ്ക്ക് ജോലി എളുപ്പവുമായി.
ഇന്നലെ തൃപ്പൂണിത്തുറയിലെ പൊതുസമ്മേളനം ഉദ്ഘാടനം ചെയ്യാനെത്തിയ കേന്ദ്രമന്ത്രി ഇംഗ്ലീഷിലും ഹിന്ദിയിലും തമിഴിലും അല്പം മലയാളത്തിലുമായി പ്രസംഗം തുടര്ന്നപ്പോള് ബി.ജെ.പി പ്രവര്ത്തകര് ആവേശത്തിലുമായി. ക്രമസമാധാനത്തെക്കുറിച്ച് പറയുമ്പോള് ഇംഗ്ലീഷില് തുടങ്ങി തമിഴിലും പിന്നീട് മലയാളത്തിലുമായി പ്രസംഗം. മതമൗലികവാദികളുടെ മുദ്രാവാക്യമായ 21 ല് ഊരിയ വാള് അറബിക്കടലിലെറിഞ്ഞിട്ടില്ല എന്നത് തെറ്റാതെ മലയാളത്തില് പറഞ്ഞു. സുരേന്ദ്രന്റെ വിജയയാത്രയുടെ മുദ്രാവാക്യങ്ങളെക്കുറിച്ചും മലയാളത്തില് പ്രസംഗിച്ചു.
പ്രധാനമന്ത്രി നരേന്ദ്രമോദിയുടെ പ്രകടനത്തെക്കുറിച്ച് പറയുമ്പോള് ഹിന്ദിയിലും ഇംഗ്ലീഷിലും പ്രസംഗിച്ച നിര്മ്മല കേരളത്തിന് ബഡ്ജറ്റില് നല്കിയ ഫണ്ട് വിഹിതം ചൂണ്ടിക്കാട്ടിയപ്പോള് തമിഴിലും മലയാളത്തിലുമായി. ഒടുവില് പ്രസംഗം കഴിഞ്ഞപ്പോള് പരിഭാഷകയായിരുന്ന അഡ്വ. ഒ.എം.ശാലീന തന്നെ പ്രസംഗത്തിന് പരിഭാഷയുടെ ആവശ്യമുണ്ടോ എന്ന് ചോദിച്ചപ്പോള് ഹര്ഷാരവത്തോടെ വേണ്ടെന്നായിരുന്നു ജനങ്ങളുടെ മറുപടി.
അതേസമയം കേരള ബഡ്ജറ്റിനെ കേന്ദ്ര ധനമന്ത്രി നിര്മ്മല സീതാരാമന് രൂക്ഷമായി വിമര്ശിച്ചു. കേരളം അടിസ്ഥാന സൗകര്യവികസനത്തിനായി ഫണ്ട് കിഫ്ബി വഴി വിനിയോഗിക്കുന്നതിനെയാണ് കേന്ദ്രമന്ത്രി ചോദ്യം ചെയ്തത്.
കേരള സര്ക്കാരിന്റെ ബഡ്ജറ്റില് വികസന പദ്ധതികള്ക്കായി എല്ലാ തുകയും കിഫ്ബി എന്ന ഒരേ ഒരു ഏജന്സിക്കാണ് നല്കുന്നത്. ഇതെന്തൊരു സംവിധാനമാണ്. എനിക്കറിയില്ല. കേന്ദ്രസര്ക്കാരും ബഡ്ജറ്റ് അവതരിപ്പിക്കാറുണ്ട്. ഞങ്ങളാരും ഒരു ഏജന്സിക്ക് മാത്രമായി ഫണ്ട് നീക്കിവയ്ക്കാറില്ല. ഇതിന്റെ പേരില് കേരള ബഡ്ജറ്റിനെ സി.എ.ജി രൂക്ഷമായി വിമര്ശിച്ചിട്ടുണ്ട്. വലിയ കടക്കെണിയിലേക്കാണ് കേരളം നീങ്ങുന്നത്. ഇത് ചോദ്യം ചെയ്യപ്പെടുക തന്നെ വേണം എന്നും നിര്മ്മല സീതാരാമന് പറഞ്ഞു.
"
https://www.facebook.com/Malayalivartha
