കരഞ്ഞ് തളര്ന്ന് ഒരു കുടുംബം... മലയാളികള് ഏറെ വേദനയോടെ കേട്ട മഞ്ജുഷയുടെ മരണത്തിന്റെ വേദന മാറും മുമ്പേ പിതാവും പോയി; മഞ്ജുഷയെ മരണത്തിലേക്ക് കൂട്ടിയ സ്കൂട്ടര് തന്നെ പിതാവിന്റെയും ജീവനെടുത്തു; ഓര്മ്മകള് വീണ്ടുമെത്തുമ്പോള്
മലയാളികള് ഏറെ വേദനയോട് കേട്ട ഒന്നായിരുന്നു റിയാലിറ്റി താരം മഞ്ജുഷ മോഹന്ദാസിന്റെ (26) മരണം. 2018 ജൂലായ് 28നാണ് മഞ്ജുഷ സ്കൂട്ടര് അപകടത്തില് മരിച്ചത്.
താന്നിപ്പുഴയില് സ്കൂട്ടറില് മിനിലോറിയിടിക്കുകയായിരുന്നു. കാലടി ശ്രീശങ്കര സംസ്കൃത സര്വകലാശാലയില് നൃത്ത ഗവേഷണവിദ്യാര്ത്ഥിയും ഗായികയുമായിരുന്ന മഞ്ജുഷ റിയാലിറ്റി ഷോയിലൂടെയാണ് ജനപ്രീതി നേടിയത്.
രണ്ടര വര്ഷം മുമ്പ് അപകടത്തിലൂടെ മഞ്ജുഷ മോഹന്റെ ജീവന് കവര്ന്ന അതേ സ്കൂട്ടര് മറ്റൊരപകടത്തിലൂടെ മഞ്ജുഷയുടെ പിതാവ് മോഹന്ദാസിന്റെയും (67) മരണത്തിനിടയാക്കി.
മോഹന്ദാസ് സഞ്ചരിച്ച സ്കൂട്ടറില് പെരുമ്പാവൂര് പുല്ലുവഴിയില് വച്ച് ഇന്നലെ രാവിലെ പത്ത് മണിയോടെ ബൊലേറോ പിക്ക്അപ്പ് ഇടിക്കുകയായിരുന്നു. ഉടന് പെരുമ്പാവൂര് സാന്ജോ ആശുപത്രിയില് പ്രവേശിപ്പിച്ചെങ്കിലും ഒരു മണിയോടെ മരിച്ചു. മത്സ്യഫെഡ് വില്പന കേന്ദ്രത്തില് നിന്ന് മീന് വാങ്ങി മടങ്ങുകയായിരുന്നു. തിരുവനന്തപുരം സ്വദേശിയാണ് മോഹന്ദാസ്.അപകടശേഷം നിര്ത്താതെപോയ പിക്ക്അപ്പ് പിന്നീട് പിടികൂടി.
ആനന്ദവല്ലിയാണ് മോഹന്ദാസിന്റെ ഭാര്യ. മകന് മിഥുന് മോഹന് കാനഡയിലാണ്.
സ്റ്റാര് സിങ്ങര് റിയാലിറ്റി ഷോ താരമായ മഞ്ജുഷ മോഹന് ദാസ് എംസി റോഡില് താന്നിപ്പുഴയില് അനിതാ വിദ്യാലയത്തിന് സമീപത്ത് വെച്ചായിരുന്നു അപകടത്തില് പെട്ടത്. മഞ്ജുഷയും സുഹൃത്ത് അഞ്ജനയും സ്കൂട്ടറില് കാലടി യൂനിവേഴ്സിറ്റിയിലേക്ക് പോകുമ്പോഴായിരുന്നു അപകടം നടന്നത്. ഉടന് തന്നെ ഇരുവരേയും അങ്കമാലി എല്എഫ് ആശുപത്രിയില് പ്രവേശിപ്പിച്ചു. മഞ്ജുഷയുടെ പരിക്ക് ഗുരുതരമായിരുന്നു.
2009 ല് ഏഷ്യാനെറ്റില് സംപ്രേഷണം ചെയ്ത ഐഡിയ സ്റ്റാര് സിങ്ങര് എന്ന റിയാലിറ്റി ഷോയിലെ മത്സരാര്ത്ഥിയായിരുന്നു. കാലടി സര്വ്വകലാശാലയില് രണ്ടാം വര്ഷം എംഎ നൃത്ത വിദ്യാര്ത്ഥിനിയായിരുന്നു.
മഞ്ജുഷ തന്റെ പ്രിയ ശിഷ്യയായിരുന്നെന്ന് അധ്യാപകനായ ആര്എല്വി രാമകൃഷ്ണന് ഫേസ്ബുക്കില് കുറിച്ചു. അപകടത്തില് പെടുന്നതിന് തലേദിവസം മഞ്ജുഷ തന്നോട് ഒരാഗ്രഹം പറഞ്ഞതായി ആര്എല്വി രാമകൃഷ്ണന് തന്റെ ഫേസ്ബുക്കില് വെളിപ്പെടുത്തി.
പ്രിയശിഷ്യ മഞ്ജുഷ ഓര്മ്മയായി. എനിക്ക് കാലടി സംസ്കൃത സര്വ്വകലാശാലയില് ഗസ്റ്റ്ലക്ചററായി ജോലി കിട്ടിയതു മുതലാണ് മഞ്ജുഷയെ പഠിപ്പിക്കാനുള്ള അവസരം ഉണ്ടായത്. ക്ലാസില് മിടുക്കിയായിരുന്നു മഞ്ജുഷ. ചില നിമിഷങ്ങള് ദൈവം നമ്മളെ കൊണ്ട് മുന്കൂട്ടി ചെയ്യിക്കും എന്നതു പോലെ.
കഴിഞ്ഞ ആഴ്ച ഒരു ദിവസം ഞാന് എം.എ മോഹിനിയാട്ട വിദ്യാര്ത്ഥികള്ക്ക് ക്ലാസെടുക്കാന് ചെന്നപ്പോള് മഞ്ജുഷ ഒരു സെല്ഫി എടുക്കാന് ആഗ്രഹം പറഞ്ഞത്. അത് പ്രകാരം ക്ലാസിലെ കുട്ടികള് എല്ലാം ചേര്ന്ന് ഫോട്ടോ എടുത്തു. അതിനു ശേഷം അവര്ക്കായി ഞാന് കൊറിയോഗ്രഫി ചെയ്ത ഇരയിമ്മന് തമ്പി രചിച്ച ഏഹി ഗോപാലകൃഷ്ണ എന്ന പദം പ്രാക്ടീസ് ചെയ്യിപ്പിച്ചു.
പ്രാക്ടീസ് കഴിഞ്ഞതിനു ശേഷം അരങ്ങ് എന്ന പ്രതിമാസ പരിപാടിയില് ഞാന് ഈ പദം ചെയ്തോട്ടെ മാഷെ എന്ന് ചോദിച്ചത് ഇപ്പോഴും മനസ്സില് മായാതെ വേദനയോടെ നില്ക്കുന്നു. അരങ്ങ് എന്ന പരിപാടിയില് ചിലങ്ക അണിയുന്നതിനുള്ള ഒരുക്കത്തിലായിരുന്നു മഞ്ജുഷ .അതിനിടയിലാണ് അപകടത്തിന്റെ രൂപത്തില് മരണം പ്രിയശിഷ്യയെ തട്ടിയെടുത്തത്.
ഇനി എം.എ ക്ലാസിലേക്ക് ചെല്ലുമ്പോള് മഞ്ജുഷ ഇല്ല എന്ന യാഥാര്ത്ഥ്യം മനസിനെ പറഞ്ഞ് പഠിപ്പിക്കേണ്ടിയിരിക്കുന്നു. പ്രിയശിഷ്യയുടെ വേര്പാട് ഞങ്ങള് ഗുരുക്കന്ന്മാര്ക്കും സഹപാഠികള്ക്കും വലിയ വേദനയുണ്ടാക്കുന്നു .... വേദനയോടെ പ്രിയ ശിഷ്യയ്ക്ക് യാത്രാമൊഴി...... എന്ന രാമകൃഷ്ണന്റെ കുറിപ്പ് മലയാളികളെ ഏറെ വേദനിപ്പിച്ചു.
"
https://www.facebook.com/Malayalivartha
