തെരഞ്ഞെടുപ്പില് താന് മത്സരിക്കാനില്ല; എന്നാല് ട്വന്റി 20യില് ഏറെ പ്രതീക്ഷയുണ്ട്; കഴിഞ്ഞ ദിവസങ്ങളില് മലയാള സിനിമയില് നിന്ന് രാഷ്ട്രീയത്തിലെത്തിയവര് തിരികെ ശരിയായ വഴിയിലെത്തുമെന്നാണ് തന്റെ പ്രതീക്ഷ; പ്രതികരണവുമായി നടന് ശ്രീനിവാസന്
ട്വന്റി 20 കൂട്ടായ്മക്ക് പിന്തുണ നൽകി നടന് ശ്രീനിവാസന്. തെരഞ്ഞെടുപ്പില് താന് മത്സരിക്കാനില്ല. എന്നാല് ട്വന്റി 20യില് ഏറെ പ്രതീക്ഷയുണ്ടെന്നും കേരളത്തിന് മാതൃകയാണെന്നും അദ്ദേഹം പ്രതിക്കരിച്ചു.
ബിജെപിയില് അംഗത്വമെടുത്ത മെട്രോമാന് ഇ ശ്രീധരനും മുന് ഡിജിപി ജേക്കബ് തോമസും ട്വന്റി 20യില് വന്നെങ്കിലെന്ന് ആഗ്രഹിക്കുന്നുവെന്നും അദ്ദേഹം പറഞ്ഞു. ട്വന്റി 20ക്ക് നേതൃത്വം നല്കുന്ന സാബു ജേക്കബ് നല്ല വ്യക്തിയാണ്. ട്വന്റി 20 എറണാകുളത്ത് മത്സരിക്കുന്നുണ്ട്. വിജയിച്ചാല് കേരളത്തിനാകെ മാതൃകയാകുമെന്നും ശ്രീനിവാസന് അവകാശപ്പെടുകയും ചെയ്തു.
മതനിരപേക്ഷതയും സുസ്ഥിര വികസനവും തട്ടിപ്പാണെന്നും ശ്രീനിവാസന് പറഞ്ഞു. എല്ലാ മതങ്ങളും സംഘടിതരാണ്. തമ്മിലടിക്കണമെന്ന ചിന്തയാണുള്ളത്. അതാണോ മതനിരപേക്ഷതയെന്ന് ശ്രീനിവാസന് ചോദിച്ചു.
തദ്ദേശ തെരഞ്ഞെടുപ്പില് നാല് പഞ്ചായത്തുകളില് ഭരണം നേടാന് ട്വന്റി 20ക്ക് കഴിഞ്ഞു. കിഴക്കമ്പലം, ഐക്കരനാട്, മഴുവന്നൂര്, കുന്നുനാട് എന്നിവിടങ്ങളിലാണ് ട്വന്റി 20 ഭരണം പിടിച്ചത്.
കഴിഞ്ഞ ദിവസങ്ങളില് മലയാള സിനിമയില് നിന്ന് രാഷ്ട്രീയത്തിലെത്തിയവര് തിരികെ ശരിയായ വഴിയിലെത്തുമെന്നാണ് തന്റെ പ്രതീക്ഷയെന്നും ശ്രീനിവാസന് പറഞ്ഞു. ട്വന്റി 20 സ്ഥാനാര്ത്ഥിയായി ശ്രീനിവാസന് നിയമസഭ തെരെഞ്ഞെടുപ്പില് മത്സരിച്ചേക്കുമെന്നായിരുന്നു അഭ്യൂഹം.
ട്വന്റി 20 നേത്യത്വം പിറവം മണ്ഡലത്തില് മത്സരിയ്ക്കാന് ശ്രീനിവാസനെ സമീപിച്ചിരുന്നതായും വാര്ത്തകള് പുറത്ത് വന്നിരുന്നു. എന്നാല് മത്സര രംഗത്ത് ഉണ്ടാകില്ലെന്ന് അദ്ദേഹം തന്നെ വ്യക്തമാക്കി.
ട്വന്റി ട്വന്റിയുടെ പ്രവര്ത്തനം മികച്ചതാണെന്നും നിലവിലുള്ള മുന്നണികളുടെ രാഷ്ട്രീയ കാഴ്ചപ്പാടുകളോട് വിയോജിപ്പുണ്ടെന്നും ശ്രീനിവാസന് പറഞ്ഞിരുന്നു. ഒരു രാഷ്ട്രീയ പാര്ട്ടിയോടും വിരോധമില്ലെന്നും തദ്ദേശ തെരഞ്ഞെടുപ്പില് ട്വന്റി -ട്വന്റി ഉണ്ടാക്കിയ മുന്നേറ്റത്തെ കാണാതെ പോകരുതെന്നും അദ്ദേഹം പറഞ്ഞു.
https://www.facebook.com/Malayalivartha