കേന്ദ്രമന്ത്രി സ്ഥാനം മോഹിച്ച് പോയ കുഞ്ഞാലിക്കുട്ടി ആ സ്വപ്നം നടക്കാതെ വന്നതോടെ രാജിവച്ച സീറ്റില്‍ അബ്ദുള്ള കുട്ടി വിജയിച്ചാല്‍ എന്തായിരിക്കും സ്ഥിതി.

ജയിപ്പിച്ച് വിട്ട കുഞ്ഞാലിക്കുട്ടി എന്തിന് രാജിവച്ചു എന്ന ചോദ്യം ജനം ചോദിച്ചാല്‍ ഉത്തരമില്ല. ആ ഒരു ഞെട്ടലിലാണ് കുഞ്ഞാലികുട്ടിയും മുസ്ലീം ലീഗും. എന്നും അത്ഭുതം കാട്ടുന്ന അബ്ദുള്ളകുട്ടി അത്ഭുതം കാട്ടില്ലെന്ന് ആരു കണ്ടു.

സഭകള്‍ ബിജെപിക്ക് വേണ്ടി വോട്ടുപിടിക്കുന്ന അപൂര്‍വ കാഴ്ചയാണ് കാണുന്നത്. ബിജെപിയുടെ വര്‍ഗീയ മുഖം തുറന്ന് കാട്ടിയാണ് ഇതുവരെ എല്‍ഡിഎഫും യുഡിഎഫും പിടിച്ചു നിന്നത്. ഇപ്പോള്‍ സംസ്ഥാനത്ത് ആദ്യമായി ബിജെപി ഒരു മുസ്ലീമിനെ തന്നെ നിര്‍ത്തിയിരിക്കുകയാണ്. വെറും മുസ്ലീമല്ല. എംപിയും എംഎല്‍എയുമായിരുന്ന അബ്ദുള്ള കുട്ടി. അതോടെ മലപ്പുറത്ത് തീ പാറും.

പാര്‍ട്ടി ദേശീയ ഉപാധ്യക്ഷന്‍ കൂടിയായ എ.പി.അബ്ദുല്ലക്കുട്ടിയെ കോഴിക്കോട് കുന്ദമംഗലം മണ്ഡലത്തില്‍ മത്സരിപ്പിക്കാനാണ് സംസ്ഥാന നേതൃത്വം തീരുമാനിച്ചത്. അതിന്റെ ഒരുക്കം പൂര്‍ത്തിയാകുന്നതിനിടെയാണു കേന്ദ്രനേതൃത്വം അദ്ദേഹത്തെ മലപ്പുറം ലോക്‌സഭാ മണ്ഡലത്തില്‍ സ്ഥാനാര്‍ഥിയാക്കിയത്.

പലപ്പോഴായി എംപിയും എംഎല്‍എയുമായ താന്‍ മത്സരിക്കാനില്ലെന്ന നിലപാടിലായിരുന്നു അബ്ദുല്ലക്കുട്ടി. പാര്‍ട്ടിയിലെ പുതുമുഖങ്ങള്‍ക്ക് അവസരം ലഭിക്കട്ടെ എന്നും നേതൃത്വത്തെ അറിയിച്ചു. എന്നാല്‍ സിപിഎമ്മിലും കോണ്‍ഗ്രസിലും പയറ്റിത്തെളിഞ്ഞ അദ്ദേഹം മത്സരിക്കണമെന്ന് സംസ്ഥാന നേതൃത്വം നിര്‍ദ്ദേശിച്ചു. മുതിര്‍ന്ന നേതാക്കളും ഇടപെട്ടതോടെ മത്സരത്തില്‍ തീരുമാനമായി.

കാസര്‍കോട്, മലപ്പുറം ജില്ലകളിലാണ് ആദ്യം പരിഗണിച്ചതെങ്കിലും സ്ഥാനാര്‍ഥി പരിഗണനാപട്ടികയില്‍ കുന്ദമംഗലത്ത് തീരുമാനിച്ചു. സംസ്ഥാന പ്രസിഡന്റ് കെ. സുരേന്ദ്രന്റെ വിജയയാത്ര പത്തനംതിട്ടയില്‍ എത്തിയപ്പോഴാണ് അബ്ദുല്ലക്കുട്ടി നിയമസഭയി നിന്ന് ലോക്‌സഭയിലേക്ക് മാറുന്നത്.

പാര്‍ട്ടി കേന്ദ്രനേതൃത്വം സംസ്ഥാന നേതൃത്വവുമായി സംസാരിച്ച് മലപ്പുറം ഉപതിരഞ്ഞെടുപ്പില്‍ അദ്ദേഹത്തെ സ്ഥാനാര്‍ഥിയാക്കാന്‍ ആലോചിക്കുന്ന കാര്യം വ്യക്തമാക്കി. വിജയ പരാജയങ്ങള്‍ക്കപ്പുറം രാഷ്ട്രീയ ശ്രദ്ധപിടിച്ചുപറ്റാന്‍ അദ്ദേഹം അവിടെ മത്സരിക്കേണ്ടത് ആവശ്യമാണെന്നാണു നേതൃത്വത്തിന്റെ വിലയിരുത്തല്‍.

സിപിഎമ്മില്‍ കണ്ണൂര്‍ ജില്ലാപഞ്ചായത്തില്‍ വളപട്ടണം ഡിവിഷനില്‍ 1994ല്‍ സിപിഎം സ്ഥാര്‍ഥിയായി മത്സരം ആരംഭിച്ച അബ്ദുല്ലക്കുട്ടി അതിന്റെ കാലാവധി പൂര്‍ത്തിയാകുന്നതിന് മുന്‍പ് കണ്ണൂര്‍ ലോക്‌സഭാ മണ്ഡലത്തില്‍ മത്സരിച്ച് മണ്ഡലം അടക്കിവാണിരുന്ന മുല്ലപ്പള്ളി രാമചന്ദ്രനെ തോല്‍പിച്ച് പാര്‍ലമെന്റിലെത്തിയാണു വിജയയാത്ര തുടങ്ങിയത്. 2004ല്‍ വീണ്ടും കണ്ണൂരില്‍ സ്ഥാനാര്‍ഥിയായി 80,000ലധികം ഭൂരിപക്ഷത്തിന് മുല്ലപ്പള്ളിയെ തോല്‍പ്പിച്ച് ലോക്‌സഭയിലെത്തി. അട്ടിമറി വിജയം ആവര്‍ത്തിച്ചതോടെ 'അദ്ഭുതക്കുട്ടി'യെന്നും അറിയപ്പെട്ടു.

പിന്നീട് കോണ്‍ഗ്രസിലെത്തിയ അബ്ദുല്ലക്കുട്ടി കെ.സുധാകരന്‍ എംഎല്‍എ ലോക്‌സഭയിലേക്ക് തിരഞ്ഞെടുക്കപ്പെട്ട ഒഴിവില്‍ നടന്ന നിയമസഭാ ഉപതിരഞ്ഞെടുപ്പില്‍ സിപിഎമ്മിലെ മുതിര്‍ന്ന നേതാവ് എം.വി. ജയരാജനെ തോല്‍പ്പിച്ച് കണ്ണൂരില്‍ നിന്ന് നിയമസഭയിലെത്തി.

20011ലെ നിയമസഭാ തിരഞ്ഞെടുപ്പിലും കണ്ണൂരില്‍ വിജയം ആവര്‍ത്തിച്ചെങ്കിലും 2016ല്‍ തലശേരി മണ്ഡലത്തില്‍ സിപിഎമ്മിനോട് തോറ്റു. പിന്നീട് നരേന്ദ്രമോദിയുടെ ആരാധകനായി മാറി, കേന്ദ്രത്തിന്റെ നയങ്ങളെ അനുകൂലിച്ചും വിശദീകരിച്ചും കഴിയുന്നതിനിടെ ലോക്‌സഭാതിരഞ്ഞെടുപ്പിനു ശേഷം അപ്രതീക്ഷിതമായി ബിജെപിയിലെത്തി. പാര്‍ട്ടി കേന്ദ്രനേതൃത്വം നേരിട്ട് ഇടപെട്ട് അദ്ദേഹത്തെ പാര്‍ട്ടിയിലെത്തിച്ചതു സംസ്ഥാന നേതൃത്വത്തെയും അദ്ഭുതപ്പെടുത്തിയ നടപടിയായിരുന്നു.

സിപിഎമ്മിലായിരിക്കുമ്പോള്‍തന്നെ മോദിയോടുളള സ്‌നേഹം തുടങ്ങിയിരുന്നു. കണ്ണൂര്‍ എംപിയായിരിക്കെ അബ്ദുല്ലക്കുട്ടി ഗള്‍ഫിലെ യോഗത്തില്‍ മോദിയുടെ ഗുജറാത്ത് മാതൃകാവികസനത്തെ പുകഴ്ത്തിയത് പാര്‍ട്ടിക്കുള്ളില്‍ ഉണ്ടാക്കിയ പ്രശ്‌നം ചെറുതൊന്നുമായിരുന്നില്ല.

പിന്നീട് കണ്ണൂര്‍ ശ്രീകണ്ഠപുരത്തുവച്ച്, ബന്ദും പണിമുടക്കും അവസാനിപ്പിച്ചില്ലെങ്കില്‍ കേരളത്തിന്റെ കാര്യം കട്ടപുകയാകുമെന്ന രീതിയിലുള്ള പ്രസംഗത്തോടെയാണ് ഭിന്നത വര്‍ധിച്ച് പാര്‍ട്ടിക്കു പുറത്തേക്കുളള വഴിയൊരുങ്ങിയത്. ഇപ്പോള്‍ അബ്ദുള്ള കുട്ടിയാണ് കേരളത്തിലെ താരം.