ട്രോളിങ് നിരോധനം നാളെ അര്ധരാത്രിമുതല് നിലവില് വരും
കേരളതീരത്ത് യന്ത്രവത്കൃത ബോട്ടുകള്ക്കുള്ള മണ്സൂണ്കാല ട്രോളിങ് നിരോധനം ഞായറാഴ്ച അര്ദ്ധരാത്രി നിലവില് വരും. രാത്രി 12ന് നീണ്ടകര പാലത്തിന് താഴെ തൂണുകളില് ചങ്ങലയിട്ട് ബോട്ടുകള് കടലിലേക്ക് പ്രവേശിക്കുന്നത് തടയുന്നതോടെയാണ് സംസ്ഥാനത്ത് ട്രോളിങ് നിരോധനത്തിന് തുടക്കമാവുന്നത്. 47 ദിവസത്തേക്കാണ് ട്രോളിങ് നിരോധനം. ജൂലായ് 31ന് ശേഷമേ ഇനി ട്രോളിങ് അനുവദിക്കൂ. ജില്ലയില് 45,000ത്തോളം മത്സ്യത്തൊഴിലാളികളുടെ കുടുംബങ്ങളെ നിരോധനം ബാധിക്കും. അനുബന്ധ തൊഴിലാളികള് ഇതിനുപുറമേയാണ്.
നിരോധനം സംബന്ധിച്ച് 14ന് രാവിലെമുതല് കടലിലും കരയിലും ഉച്ചഭാഷിണിയില് അറിയിപ്പ് നല്കും. ചങ്ങല ഇടുന്നതിന് മുമ്പ് ബോട്ടുകളെല്ലാം നീണ്ടകര പാലത്തിന് കിഴക്കുഭാഗത്തേക്ക് മാറ്റിയിടണമെന്ന് അധികൃതര് നിര്ദ്ദേശിച്ചു. നിരോധനം തുടങ്ങിയശേഷം മടങ്ങിവരുന്ന ബോട്ടുകള് ശക്തികുളങ്ങരയിലെ മത്സ്യഫെഡ് ഡീസല് ബങ്ക് പ്രവര്ത്തിക്കുന്ന സ്ഥലത്ത് മത്സ്യം ഇറക്കണം. അന്യസംസ്ഥാന വള്ളങ്ങളെല്ലാം കേരളതീരം വിട്ടുപോകേണ്ടതാണെന്നും ഫിഷറീസ് ഡെപ്യൂട്ടി ഡയറക്ടര് സി.ടി.സുരേഷ്കുമാര് അറിയിച്ചു.
തീരദേശത്തുള്ള എല്ലാ പമ്പുകളും ജൂണ് 14 അര്ധരാത്രിമുതല് അടച്ചിടും. നിരോധനത്തിനുശേഷം ഇന്ധനം നിറയ്ക്കുന്നതിന് മൂന്നുദിവസം മുമ്പ് സൗകര്യം ഒരുക്കും.
ട്രോളിങ് നിരോധനം കണക്കിലെടുത്ത് കരയിലും കടലിലും സുരക്ഷാക്രമീകരണങ്ങള് ശക്തമാക്കി. രക്ഷാപ്രവര്ത്തനത്തിനും നിരീക്ഷണത്തിനുമായി മറൈന് എന്ഫോഴ്സ്മെന്റും തീരദേശ പോലീസും പട്രോളിങ് ശക്തമാക്കും. പ്രത്യേക പോലീസ് സേന നീണ്ടകര കോസ്റ്റല് പോലീസ് സ്റ്റേഷനില് എത്തുന്നുണ്ട്. തൊഴില്രഹിതരാകുന്ന മത്സ്യത്തൊഴിലാളികള്ക്കും അനുബന്ധ തൊഴിലാളികള്ക്കും സൗജന്യ റേഷന് അനുവദിക്കുന്നതിനുള്ള നടപടികള് സിവില് സപ്ലൈസ് വഴി തുടങ്ങി.
നിരോധനവേളയില് കായലിലും ട്രോളിങ് അനുവദിക്കില്ല. ചെറുവള്ളങ്ങള്ക്കും പരമ്പരാഗത മത്സ്യബന്ധന യാനങ്ങള്ക്കും കടലിലിറങ്ങുന്നതിന് അനുവാദം നല്കിയിട്ടുണ്ട്. അടിയന്തരഘട്ടങ്ങളില് ബന്ധപ്പെടുന്നതിനായി അഴീക്കലും നീണ്ടകരയിലും 24 മണിക്കൂറും കണ്ട്രോള് റൂം പ്രവര്ത്തിക്കും. (ഫോണ് നമ്പര്9447656462)
നിരോധനം ലംഘിച്ച് മത്സ്യബന്ധനത്തിലേര്പ്പെടുന്ന യന്ത്രവത്കൃത ബോട്ടുകള്ക്കെതിരെ കര്ശന നടപടി സ്വീകരിക്കുമെന്നും ഫിഷറീസ് അധികൃതര് അറിയിച്ചു. നീണ്ടകര പാലത്തിനുസമീപം ഇപ്പോള്ത്തന്നെ നിരവധി ബോട്ടുകള് കെട്ടിയിട്ടുകഴിഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
