ഇപ്പോള്‍ ഏതെങ്കിലും മണ്ഡലത്തില്‍ ശബരിമല ഉയരുന്നുണ്ടെങ്കില്‍ അത് കഴക്കൂട്ടത്ത് മാത്രമാണ്. ദേവസ്വം വകുപ്പ് മന്ത്രി കടകംപള്ളി സുരേന്ദ്രനെതിരെ ശബരിമല വിഷയത്തില്‍ വലിയ പ്രചരണമാണ് നടക്കുന്നത്. അതിനിടെ സ്വന്തം തട്ടകത്തില്‍ നിന്നുതന്നെ കടകംപള്ളിക്ക് കല്ലേറ് വരികയാണ്.

ശബരിമല സ്ത്രീ പ്രവേശന വിഷയത്തില്‍ നിലപാടു മാറ്റില്ലെന്നാണ് സിപിഐ നേതാവും ദേശീയ മഹിളാ ഫെഡറേഷന്‍ ജനറല്‍ സെക്രട്ടറിയുമായ ആനി രാജയാണ് വ്യക്തമാക്കിയത്.

ശബരിമലയില്‍ സ്ത്രീകള്‍ക്കു പ്രവേശനം അനുവദിച്ച വിധി ലിംഗസമത്വവുമായി ബന്ധപ്പെട്ടതാണ്. അടിസ്ഥാനപരമായ കാര്യമാണിത്. സംസ്ഥാനത്തെ ഒരു മന്ത്രി എന്തെങ്കിലും പറഞ്ഞതുകൊണ്ട് ഇടതുപക്ഷ നിലപാടു മാറില്ല. വിധിയെ ആദ്യം സ്വാഗതം ചെയ്തത് അമിത് ഷായും രാഹുല്‍ ഗാന്ധിയുമാണ്.

പിന്നീട് ഇരുവരും അതില്‍ മാറ്റം വരുത്തി. തിരഞ്ഞെടുപ്പ് ഉള്‍പ്പെടെ എല്ലാ കാര്യത്തിലും സ്ത്രീകള്‍ക്കു കൂടുതല്‍ അവസരം നല്‍കാന്‍ സിപിഐ അടക്കമുള്ള രാഷ്ട്രീയ പാര്‍ട്ടികള്‍ക്കു കഴിയണമെന്നും അവര്‍ പറഞ്ഞു.

അതേസമയം കഴക്കൂട്ടത്ത് പോരാട്ടം മുറുകുകയാണ്. മന്ത്രി കടകംപ്പള്ളി സുരേന്ദ്രനെതിരായ പൂതന പ്രയോഗം തിരുത്തില്ലെന്ന് ശോഭ സുരേന്ദ്രന്‍ വ്യക്തമാക്കി. അയ്യപ്പ വിശ്വാസികളെ ദ്രോഹിക്കാന്‍ വന്ന പൂതനയാണ് കടകംപ്പള്ളി സുരേന്ദ്രന്‍. കഴക്കൂട്ടത്തെ വിശ്വാസികള്‍ കൃഷ്ണന്‍മാരായി മാറുമെന്നും കടകംപ്പള്ളിയുടെ ഖേദപ്രകടനം വീണിടത്ത് കിടന്ന് ഉരുളല്‍ ആണെന്നും ശോഭ സുരേന്ദ്രന്‍ പറഞ്ഞു

കഴിഞ്ഞ ദിവസം കഴക്കൂട്ടത്ത് വലിയ സംഘര്‍ഷമുണ്ടായി. ശോഭ സുരേന്ദ്രന്‍ റോഡില്‍ കുത്തിയിരിക്കുകയും ചെയ്തു. അതേസമയം കഴക്കൂട്ടത്തെ എന്‍ഡിഎ സ്ഥാനാര്‍ത്ഥി ശോഭ സുരേന്ദ്രന് നേരെ ഉണ്ടായ അക്രമം ബിജെപി തന്നെ മനപ്പൂര്‍വം സൃഷ്ടിച്ചതാണെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. ബിജെപിക്കുള്ളിലെ പ്രശ്‌നങ്ങളാണ് ഇതിന് കാരണമെന്നും അത് സിപിഎമ്മിന്റെ മുകളില്‍ കെട്ടിവെക്കാന്‍ നോക്കേണ്ടെന്നും കടകംപള്ളി പറഞ്ഞു.

ആക്രമണം നടന്ന സ്ഥലം സിപിഎമ്മിന്റെ സ്വാധീന മേഖലയല്ല. പോലീസ് കസ്റ്റഡിയില്‍ എടുത്തില്ലായിരുന്നു എങ്കില്‍ സിപിഎം പ്രവര്‍ത്തകരെ ബിജെപി പ്രവര്‍ത്തകര്‍ മര്‍ദ്ദിക്കുമായിരുന്നുവെന്നും കടകംപള്ളി പറഞ്ഞു.

അതേസമയം, കടകംപള്ളിയ്ക്ക് മറുപടിയുമായി ശോഭ സുരേന്ദ്രന്‍ രംഗത്തെത്തി. ബിജെപിയ്ക്ക് ഉള്ളിലെ പ്രശ്‌നം പരിഹരിക്കാന്‍ കടകംപള്ളി വരേണ്ട. ബിജെപിയില്‍ നിലവില്‍ പ്രശ്‌നങ്ങള്‍ ഒന്നും ഇല്ലെന്നും സിപിഎമ്മിന് പരാജയ ഭീതിയാണെന്നും ശോഭ വ്യക്തമാക്കി.

കഴിഞ്ഞ ദിവസം രാത്രി ചെമ്പഴന്തി അണിയൂരില്‍ വെച്ചാണ് ശോഭ സുരേന്ദ്രന് നേരെ ചിലര്‍ അക്രമം അഴിച്ചു വിട്ടത്. രാത്രി 8.30 ഓടെ ശോഭ സുരേന്ദ്രന്റെ വാഹന റാലിക്ക് നേരെ ബൈക്ക് ഓടിച്ചു കയറ്റാന്‍ ശ്രമിക്കുകയായിരുന്നു.

പ്രതികളെ അറസ്റ്റ് ചെയ്യാതെ പിന്മാറില്ലെന്ന് ബിജെപി പ്രവര്‍ത്തകരും ശോഭ സുരേന്ദ്രനും നിലപാടെടുത്തതിനെ തുടര്‍ന്ന് പോലീസ് പ്രതികളെ അറസ്റ്റ് ചെയ്തു കൊണ്ടുപോയതോടെയാണ് സംഘര്‍ഷത്തിന് അയവ് വന്നത്.

ആനിരാജയുടെ പ്രസ്താവ വന്നതിനു ശേഷവും നല്ല ആത്മവിശ്വസമുണ്ടെന്നും കനത്ത ഭൂരിപക്ഷത്തില്‍ വിജയിക്കാന്‍ സാധിക്കുമെന്നും കടകംപള്ളി സുരേന്ദ്രന്‍ പറഞ്ഞു.

സര്‍ക്കാരിന് തുടര്‍ഭരണമെന്ന സര്‍വേകള്‍ സര്‍ക്കാര്‍ ഫണ്ട് വാങ്ങിയാണെന്ന രമേശ് ചെന്നിത്തലയുടെ ആരോപണങ്ങളെയും അദ്ദേഹം വിമര്‍ശിച്ചു. അങ്ങനെ ഫണ്ട് കൊടുത്ത് സര്‍വേ നടത്തുന്നവര്‍ക്കേ അത് പറയാന്‍ സാധിക്കുവെന്നും കടകംപള്ളി സുരേന്ദ്രന്‍ പ്രതികരിച്ചു.