വിദ്യാര്‍ഥികളുടെ പ്രതിഷേധത്തിനു നേരെ ലാത്തിചാര്‍ജ് ഉണ്ടായത് നേരില്‍ കണ്ട അനുഭവം നടി നോയ്‌ല ഫ്രാന്‍സി പങ്കുവച്ചു. 'ഒരുപാടു ദൂരെ നിന്നു പോലും വന്നവരുണ്ട്. ഞാന്‍ ഫ്‌ലൈറ്റിലാണ് വന്നത്. ആ ചെലവ് എനിക്ക് വഹിക്കാനാകും. പക്ഷേ, അധികം പൈസ പോലും ഇല്ലാതെ ഈ പ്രതിഷേധത്തിനായി ഇവിടെ വന്നവരുണ്ട്. അവര്‍ക്ക് വെള്ളമോ ഭക്ഷണമോ വാങ്ങാനുള്ള പണം പോലും കയ്യിലുണ്ടോ എന്ന് സംശയമാണ്. എന്റെ മുന്നിലൂടെ പലരേയും വലിച്ചിഴച്ച് കൊണ്ടു പോകുന്നത് കാണേണ്ടി വന്നു. വളരെ മോശം കാര്യങ്ങളാണ് സംഭവിച്ചുകൊണ്ടിരിക്കുന്നത്.

ഈ പ്രശ്‌നങ്ങള്‍ക്കിടയില്‍ അപകടമൊന്നും പറ്റാതെ സുരക്ഷിതയായി സംസാരിക്കാന്‍ കഴിയുന്നതില്‍ തന്നെ അദ്ഭുതമുണ്ട്. കാരണം, അത്രയും ക്രൂരമായിട്ടാണ് പൊലീസ് പൈരുമാറിയത്. തലങ്ങും വിലങ്ങും ആളുകളെ അടിക്കുകയായിരുന്നു അവര്‍. ഞങ്ങള്‍ സമാധാനമായി ഇരുന്ന് ധര്‍ണ ചെയ്തിരുന്നിടത്തേക്ക് പൊലീസ് എത്തി. ഞാന്‍ കരുതി ശരിക്കും പെട്ടുവെന്ന്! ഒരുപാടു പേര്‍ക്ക് പരുക്കേറ്റു. ചോര വാര്‍ന്നൊഴുകുന്ന അവരെ കാണുന്നത് സഹിക്കാന്‍ കഴിയുന്നുണ്ടായിരുന്നില്ല. ഈ നടക്കുന്നതൊന്നും ശരിയല്ല. മനസ്സാകെ മടുത്തു. ഈ പ്രതിഷേധം വിജയമാണോ പരാജയമാണോ എന്നു പറയാന്‍ എനിക്ക് അറിയില്ല. പക്ഷേ, ഒന്നുണ്ട് ഇങ്ങനെയല്ല ഒരു ജനാധിപത്യരാജ്യം പ്രവര്‍ത്തിക്കേണ്ടത്,' നോയ്!ല ഫ്രാന്‍സി പറഞ്ഞു.