നീറ്റ് ചോദ്യപേപ്പര് ചോര്ച്ച: സിജെപി സമരത്തിന് പിന്തുണയുമായി രാഹുല് ഗാന്ധി ജന്തര് മന്തറില്
നീറ്റ് ചോദ്യപേപ്പര് ചോര്ച്ചയ്ക്കെതിരെ സിജെപി നടത്തുന്ന സമരത്തിന് പിന്തുണയുമായി രാഹുല് ഗാന്ധിയും കോണ്ഗ്രസ് നേതാക്കളും രംഗത്ത്. ലോക്സഭ പ്രതിപക്ഷ നേതാവ് രാഹുല് ഗാന്ധി, പ്രിയങ്കാ ഗാന്ധി, കോണ്ഗ്രസ് അദ്ധ്യക്ഷന് മല്ലികാര്ജുന് ഖാര്ഗെ എന്നിവരുടെ നേതൃത്വത്തില് കോണ്ഗ്രസ് എംപിമാര് ജന്തര് മന്തറിലെ സമരത്തിലെത്തി ഐക്യദാര്ഢ്യം പ്രഖ്യാപിച്ചു. പ്രധാനമന്ത്രിയുടെ വസതിയിലേക്ക് പ്രതിഷേധം നടത്താന് ശ്രമിച്ച കോണ്ഗ്രസ് എംപിമാരെ പൊലീസ് തടയുകയും ബലം പ്രയോഗിച്ച് അറസ്റ്റ് ചെയ്ത് നീക്കുകയും ചെയ്തു. കൈകള് കൂട്ടിക്കെട്ടിയായിരുന്നു രാഹുല് ഗാന്ധി അടക്കമുള്ള നേതാക്കളുടെ പ്രതിഷേധം.
വിഷയത്തില് പ്രധാനമന്ത്രിയും ആഭ്യന്തര മന്ത്രിയും രാജി വയ്ക്കണമെന്ന് രാഹുല് ഗാന്ധി ആവശ്യപ്പെട്ടു. യുവാക്കളെ ക്രൂരമായി ആക്രമിച്ചതിന് പ്രധാനമന്ത്രി മറുപടി പറയണമെന്നും നിലവിലെ സര്ക്കാര് രാജ്യത്തെ യുവജനങ്ങളുടെ ഭാവി നശിപ്പിക്കുകയാണെന്നും അദ്ദേഹം കുറ്റപ്പെടുത്തി. പ്രതിഷേധം കടുത്തതോടെ പ്രധാനമന്ത്രിയുടെ വസതിക്ക് മുന്നിലും പരിസരപ്രദേശങ്ങളിലും പൊലീസ് സുരക്ഷ ശക്തമാക്കിയിട്ടുണ്ട്.
ഡല്ഹിയില് സമരം ശക്തമായി നടക്കുമ്പോഴും തുടക്കത്തില് രാഹുല് ഗാന്ധി അടക്കമുള്ള മുതിര്ന്ന നേതാക്കള് വിഷയത്തില് വിമുഖത കാണിച്ചിരുന്നു. ശശി തരൂര് ഉള്പ്പെടെയുള്ള നേതാക്കള് നേരത്തെ തന്നെ സമരത്തെ പിന്തുണച്ചെങ്കിലും, ഏത് നിലപാട് സ്വീകരിക്കണമെന്നതില് കോണ്ഗ്രസിനുള്ളില് അഭിപ്രായവ്യത്യാസങ്ങള് നിലനിന്നിരുന്നു. എല്ലാ പ്രതിപക്ഷ പാര്ട്ടികളുടെയും പിന്തുണ ഉറപ്പാക്കാന് കഴിഞ്ഞത് സിജെപിയുടെ സമരത്തിന് ലഭിച്ച വലിയ വിജയമായാണ് വിലയിരുത്തപ്പെടുന്നത്.
https://www.facebook.com/Malayalivartha
