ഇന്ന് ഓശാന ഞായര്‍.... യേശുക്രിസ്തുവിന്റെ ജറുസലേം പ്രവേശനത്തിന്റെ സ്മരണകളുമായി ക്രൈസ്തവ ദേവാലയങ്ങളില്‍ ഇന്ന് ഓശാന പെരുന്നാള്‍ ആചരിക്കും... പള്ളികളില്‍ പ്രത്യേക തിരുകര്‍മങ്ങളും കുരുത്തോല വെഞ്ചരിപ്പും പ്രദക്ഷിണവും ദിവ്യബലിയും .

കൊവിഡ് നിര്‍ദേശങ്ങള്‍ പാലിച്ചാകും ചടങ്ങുകള്‍. പാളയം സെന്റ് ജോസഫ്‌സ് മെട്രോ പൊളിറ്റന്‍ കത്തീഡ്രലില്‍ ഇന്ന് പുലര്‍ച്ചെ 5.45 ന് ദിവ്യബലിയോടെ ചടങ്ങുകള്‍ ആരംഭിച്ചു.

രാവിലെ 7ന് കുരത്തോല വെഞ്ചെരിപ്പും പ്രദക്ഷിണവും. 10.30 നും വൈകിട്ട് അഞ്ചിനും ദിവ്യബലി. ലത്തീന്‍ അതിരൂപതാ സഹായമെത്രാന്‍ ഡോ. ആര്‍.ക്രിസ്തുദാസ് ശുശ്രൂഷകള്‍ക്ക് മുഖ്യ കാര്‍മികത്വം വഹിക്കും.

പട്ടം സെന്റ് മേരീസ് കത്തീഡ്രലില്‍ നടക്കുന്ന ശുശ്രൂഷകള്‍ക്ക് കര്‍ദിനാള്‍ മാര്‍ ബസേലിയോസ് ക്ലീമിസ് കാതോലിക്കാ ബാവ നേതൃത്വം നല്‍കും. രാവിലെ 6.30 ന് കുരുത്തോല വാഴ്വ്, പ്രദക്ഷിണം, വി.കുര്‍ബാന, വൈകിട്ട് 6 ന് വാദെ ദല്‍ മീനോ, സന്ധ്യാ പ്രാര്‍ത്ഥന.

വെട്ടുകാട് മാദ്രെ ദെ ദേവൂസ് ദേവാലയത്തിലെ തിരുക്കര്‍മങ്ങള്‍ വികാരി ഫാ.ജോര്‍ജ് ഗോമസിന്റെ മുഖ്യകാര്‍മികത്വത്തില്‍ രാവിലെ 6 ന് ആരംഭിച്ചു. തുടര്‍ന്ന് കുരുത്തോല വെഞ്ചിരിപ്പ്, പ്രദക്ഷിണം, ദിവ്യബലി. രാവിലെ 10.30 നും വൈകിട്ട് അഞ്ചിനും വിശുദ്ധ കുര്‍ബാന. തുടര്‍ന്ന് കുരിശിന്റെ വഴിയും ഉണ്ടാകും.

പി.എം.ജി ലൂര്‍ദ് ഫൊറോന പള്ളിയില്‍ ചടങ്ങുകള്‍ പുലര്‍ച്ചെ 5.45 ന് ആരംഭിക്കും. ബിഷപ്പ് മാര്‍.തോമസ് തറയിലിന്റെ മുഖ്യകാര്‍മികത്വത്തില്‍ തിരുകര്‍മങ്ങള്‍ രാവിലെ 7.15 മുതല്‍ നടത്തും. രാവിലെ 9 നും 11 നും വൈകിട്ട് 5 നും കുര്‍ബാന.പാളയം സെന്റ് ജോര്‍ജ് ഓര്‍ത്തഡോക്‌സ് സിറിയന്‍ കത്തീഡ്രലില്‍ ഓശാന തിരുക്കര്‍മങ്ങള്‍ രാവിലെ ആറിനുള്ള പ്രഭാത നമസ്‌കാരത്തോടെ ആരംഭിച്ചു. തുടര്‍ന്ന് 7 ന് വിശുദ്ധ കുര്‍ബാന. വൈകിട്ട് 6ന് സന്ധ്യാ നമസ്‌കാരവും ധ്യാനപ്രസംഗവും.

പാളയം സമാധാന രാജ്ഞി ബസിലിക്കയില്‍ രാവിലെ 6.30ന് പ്രഭാത നമസ്‌കാരവും കുരുത്തോല വാഴ്വ് ശുശ്രൂഷയും. വൈകിട്ട് 5 ന് കുര്‍ബാന. പാളയം എം.എം പള്ളിയില്‍ രാവിലെ 8.30ന് കുരുത്തോല പ്രദക്ഷിണം നടക്കും.

പേരൂര്‍ക്കട തെക്കന്‍ പരുമല സെന്റ് ഗ്രിഗോറിയോസ് ഓര്‍ത്തഡോക്‌സ് വലിയപള്ളിയില്‍ രാവിലെ 6.15ന് പ്രഭാത നമസ്‌കാരം, 7ന് കുര്‍ബാന, 8.30 ന് ഓശാന ഞായര്‍ ശുശ്രൂഷകള്‍, വൈകിട്ട് 6 ന് സന്ധ്യാ നമസ്‌കാരം, 7ന് ധ്യാന പ്രസംഗം.

വട്ടിയൂര്‍ക്കാവ് സെന്റ് പീറ്റേഴ്‌സ് ആന്‍ഡ് സെന്റ് പോള്‍സ് ഓര്‍ത്തഡോക്‌സ് പള്ളിയില്‍ രാവിലെ 7ന് കുര്‍ബാന, 8ന് കുരുത്തോല വാഴ്വ് ശുശ്രൂഷ. ശ്രീകാര്യം മാര്‍ ബസേലിയോസ് മാര്‍ ഗ്രിഗോറിയോസ് ഓര്‍ത്തഡോക്‌സ് പള്ളിയില്‍ രാവിലെ 6.30ന് പ്രഭാത നമസ്‌കാരം തുടര്‍ന്ന് ഓശാന ശുശ്രൂഷകള്‍. വൈകിട്ട് 6 ന് സന്ധ്യാ നമസ്‌കാരം.

പാറ്റൂര്‍ സെന്റ് തോമസ് മാര്‍ത്തോമ പള്ളിയില്‍ രാവിലെ 7.30ന് കുര്‍ബാന. തിരുമല തിരുക്കുടുംബ ദേവാലയത്തില്‍ തിരുക്കര്‍മങ്ങള്‍ രാവിലെ 6.30 ന് ആരംഭിക്കും. രാവിലെ 9 നും വൈകിട്ട് 5 നും കുര്‍ബാനകള്‍ക്ക് വികാരി റവ.ഡോ. സോണി മുണ്ടുനടയ്ക്കല്‍ മുഖ്യകാര്‍മികനാകും. തമലം തിരുഹൃദയ മലങ്കര കത്തോലിക്കാ ദേവാലയത്തില്‍ രാവിലെ 6.30ന് ശുശ്രൂഷകള്‍ ആരംഭിച്ചു.