നിയമസഭാ തെരഞ്ഞെടുപ്പിന് ഇനി ദിവസങ്ങളില്ല. ശക്തമായ പോരാട്ടമാണ് നടക്കുന്നത്. അതിനിടെ നിലപാട് വ്യക്തമാക്കുകയാണ് ബിജെപി അധ്യക്ഷന്‍ കെ സുരേന്ദ്രന്‍. നിയമസഭാ തിരഞ്ഞെടുപ്പ് കഴിയുമ്പോള്‍ കേരളത്തിലെ രണ്ട് മുന്നണി രാഷ്ട്രീയത്തിന് അന്ത്യം കുറിക്കുമെന്നും ബി.ജെ.പിയുടെ നേതൃത്വത്തില്‍ എന്‍.ഡി.എ സംസ്ഥാന രാഷ്ട്രീയത്തില്‍ നിര്‍ണായക ശക്തിയായി മാറുമെന്നും ബി.ജെ.പി അദ്ധ്യക്ഷന്‍ കെ.സുരേന്ദ്രന്‍ പറയുന്നു.

കേരളത്തിന്റെ വികസനത്തിന് നരേന്ദ്രമോദി സര്‍ക്കാരിന്റെ നയങ്ങളെ പിന്തുണയ്ക്കുന്ന ആരുമായും സഹകരിക്കും.അക്കാര്യത്തില്‍ മുസ്ലിം ലീഗിനോടെന്നല്ല , ആരോടും അയിത്തമില്ലെന്നും സുരേന്ദ്രന്‍ വ്യക്തമാക്കി.

രാഷ്ട്രീയത്തില്‍ ആരോടും തൊട്ടുകൂടായ്മയില്ല. രാജ്യവ്യാപകമായി തകരുന്നതുപോലെ കേരളത്തിലും കോണ്‍ഗ്രസ് തകരും. എന്‍.ഡി.എ. ഈ തിരഞ്ഞെടുപ്പിലെ കറുത്ത കുതിരയാകുമെന്നും, ലൗ ജിഹാദിനെ എതിര്‍ക്കുന്നത് മിശ്രവിവാഹത്തെ എതിര്‍ക്കലല്ലെന്നും അദ്ദേഹം വിശദീകരിച്ചു.

ഹെലിക്കോപ്റ്ററില്‍ സഞ്ചരിക്കുന്നത് പാര്‍ട്ടി ഏല്‍പ്പിച്ച ഉത്തരവാദിത്വത്തിന്റ ഭാഗമായാണ്. അല്ലാതെ ആഡംബരമല്ല. രാഹുല്‍ഗാന്ധിയും മുഖ്യമന്ത്രിയും ഹെലിക്കോപ്റ്റര്‍ ഉപയോഗിക്കുന്നുണ്ട്.

സംസ്ഥാന അദ്ധ്യക്ഷന്‍ രണ്ടിടത്ത് മത്സരിക്കുന്നതിലൂടെ പാര്‍ട്ടിയുടെ സന്ദേശം കൂടുതല്‍ ജനങ്ങളിലേക്കെത്തിക്കാനും, ജയിച്ച് ലക്ഷ്യത്തിലെത്താനും സഹായകമാണെന്നതിനാലാണ് പാര്‍ട്ടി അങ്ങനെ തീരുമാനമെടുക്കുന്നത്.ശബരിമലയുമായി ബന്ധപ്പെട്ട് താങ്കളുടെ പേരിലുള്ള കേസുകള്‍ പിന്‍വലിച്ചോ?ഒന്നും പിന്‍വലിച്ചിട്ടില്ല.

ഇരുന്നൂറിലധികം കേസുകളുടെ അഫഡവിറ്റ് ഞാന്‍ കൊടുത്തിരിക്കുകയാണ്.പൗരത്വ പ്രക്ഷോഭവുമായി ബന്ധപ്പെട്ട കേസുകള്‍ പിന്‍വലിക്കാന്‍ സര്‍ക്കാര്‍ ഇരട്ടത്താപ്പ് കാട്ടുകയാണ്.ശബരിമലയില്‍ വിശ്വാസ സംരക്ഷണത്തിനായി നടത്തിയ സമരത്തില്‍ ഞാനാദ്യം അറസ്റ്റിലാകുന്നത് കോന്നി മണ്ഡലത്തിലെ ചിറ്റാര്‍ പൊലീസ് സ്‌റ്റേഷനിലായിരുന്നു.അതൊന്നും ജനങ്ങള്‍ മറന്നിട്ടില്ല.

എല്‍.ഡി.എഫും യു.ഡി.എഫും ന്യൂനപക്ഷങ്ങളെ സ്വാധീനിക്കാനുള്ള തന്ത്രം പയറ്റുകയാണ്.കേരളത്തിലെ ന്യൂനപക്ഷങ്ങള്‍ അത്ര വിഡ്ഢികളൊന്നുമല്ല.ഒരുകൂട്ടര്‍ പറയുന്നു ബി.ജെ.പി യു.ഡി.എഫിനാണ് വോട്ട് കൊടുക്കാന്‍ പോകുന്നതെന്ന്. മറുകൂട്ടര്‍ പറയുന്നു എല്‍.ഡി.എഫിനാണെന്ന്.അതില്‍ നിന്നു തന്നെ സത്യം മനസിലാകും. എന്തായാലും ബി.ജെ.പിയാണ് ഈ തിരഞ്ഞെടുപ്പിലെപ്രധാന ശ്രദ്ധാകേന്ദ്രമെന്ന് ഇതിലൂടെ വ്യക്തമാവുകയാണ്.

തൊട്ടടുത്ത ദിവസം വരെ സി.പിഎമ്മുകാരായിരുന്ന എട്ടുപേര്‍ ബി.ജെ.പിയുടെയും രണ്ടുപേര്‍ എന്‍.ഡി.എ ഘടകകക്ഷികളുടെയും സ്ഥാനാര്‍ത്ഥികളായി മത്സരിക്കുന്നത് കേരളത്തിലാണ്. സി.പിഎം സെക്രട്ടേറിയറ്റ് വിലയിരുത്തിയിരിക്കുന്നത് അവരുടെ ശക്തികേന്ദ്രങ്ങളില്‍ പല മുനിസിപ്പാലിറ്റികളിലും പഞ്ചായത്തുകളിലും ബി.ജെ.പി കടന്നുകയറിയെന്നാണ്.

കേരളത്തിന്റെ സാഹചര്യം മാറിക്കൊണ്ടിരിക്കുകയാണ്. നിര്‍ണായകകശക്തിയായി ഞങ്ങള്‍ വരുന്നതോടെ രണ്ട് മുന്നണികളിലും അന്തച്ഛിദ്രമുണ്ടാകും.

35 സീറ്റുകളില്‍ ജയിച്ചാല്‍ ഭരണം പിടിക്കുമെന്ന് പറഞ്ഞത് വെറുതെയാണോ എന്ന ചോദ്യത്തിന് ആരെങ്കിലും അങ്ങനെ വെറുതെ പറയുമോ എന്ന് സുരേന്ദ്രന്‍ ചോദിച്ചു. എത്രയോ സംസ്ഥാനങ്ങളില്‍ സംഭവിച്ചു. പുതുച്ചേരി ഏറ്റവും ഒടുവിലത്തെ ഉദാഹരണമല്ലേ. സി.പി.എമ്മും കോണ്‍ഗ്രസും മാത്രമല്ല. മറ്റു കക്ഷികളും ഇവിടെയുണ്ട്. അസംതൃപ്തരായവര്‍. മറ്റ് വഴികളില്ലാത്തതിനാലാണ് അവര്‍ ചാടാത്തത്. മൂന്നാമതൊരു കക്ഷിക്ക് നിര്‍ണായക സീറ്റുകള്‍ ലഭിച്ചാല്‍ അവര്‍ക്കൊക്കെ മാറ്റമുണ്ടാകുമെന്നും സുരേന്ദ്രന്‍ വ്യക്താക്കി.