സാത്വികനായ കുമ്മനം രാജശേഖരനെ തികഞ്ഞ വര്‍ഗീയവാദിയായി ചിത്രീകരിച്ച് തോല്‍പ്പിക്കുക എന്നത് എല്ലാ പാര്‍ട്ടികളുടേയും ഒരു തന്ത്രമാണ്. അല്ലെങ്കില്‍ നോക്കണേ വട്ടിയൂര്‍ക്കാവ് നിയമസഭാ മണ്ഡലത്തിലും തിരുവനന്തപുരം ലോക്‌സഭാ മണ്ഡലത്തിലും കുമ്മനം ജയിക്കുമായിരുന്നു.

എന്നാല്‍ ഒരു കൂട്ടര്‍ കുമ്മനത്തെ തോല്‍പ്പിക്കാനായി കോണ്‍ഗ്രസിന് വോട്ട് മറിച്ചു. ഇപ്പോഴിതാ നേമത്തെ സിറ്റിംഗ് സീറ്റില്‍ വന്നപ്പോഴും അതാണ് സ്ഥിതി. കുമ്മനത്തെ നിയമസഭയില്‍ എത്തിപ്പിക്കില്ല എന്ന വാശിയിലാണ് എല്ലാവരും.

നേമത്തും കഴക്കൂട്ടത്തും സി.പി.എം സ്ഥാനാര്‍ത്ഥികള്‍ക്ക് എസ്.ഡി.പി.ഐ വോട്ടുകള്‍ മറിച്ചുനല്‍കിയതായി വെളിപ്പെടുത്തല്‍. എല്‍.ഡി.എഫ് നേതൃത്വവും സ്ഥാനാര്‍ത്ഥികളും പിന്തുണയ്ക്കായി സമീപിച്ചിരുന്നുവെന്നും എസ്.ഡി.പി.ഐ തിരുവനന്തപുരം ജില്ലാ പ്രസിഡന്റ് സിയാദ് കണ്ടല ഒരു സ്വകാര്യ വാര്‍ത്താ ചാനലിനോട് പറഞ്ഞു.

നേമത്ത് പതിനായിരത്തോളം പാര്‍ട്ടി വോട്ടുണ്ടെന്നും ഇതു ശിവന്‍കുട്ടിക്ക് നല്‍കിയെന്നുമാണ് എസ്.ഡി.പി.ഐ നേതാവിന്റെ വെളിപ്പെടുത്തല്‍. നേമത്ത് പാര്‍ട്ടിയുടെ അന്വേഷണത്തില്‍ ബി.ജെ.പി വരാതിരിക്കാന്‍ മുന്‍തൂക്കമുളള സ്ഥാനാര്‍ത്ഥിയെ പിന്തുണയ്ക്കുക എന്ന നിലപാടാണ് സ്വീകരിച്ചത്. ഇതനുസരിച്ച് എല്‍.ഡി.എഫിനാണ് പിന്തുണ നല്‍കിയതെന്നും സിയാദ് കണ്ടല വ്യക്തമാക്കി.

സി.പി.എം വോട്ടുമറിച്ചതിന്റെ തെളിവാണ് എസ്.ഡി.പി.ഐ നേതാവിന്റെ വെളിപ്പെടുത്തലെന്ന് കെ.പി.സി.സി അദ്ധ്യക്ഷന്‍ മുല്ലപ്പളളി രാമചന്ദ്രന്‍ പ്രതികരിച്ചു. സി.പി.എം എന്തും ചെയ്യും. കാരണം സി.പി.എമ്മിനെ നയിക്കുന്നത് പാര്‍ട്ടിയുടെ പൊളിറ്റ് ബ്യൂറോയോ സെന്‍ട്രല്‍ കമ്മിറ്റിയോ ഒന്നുമല്ല, ക്യാപ്റ്റന്‍ പണറായി വിജയനാണ്. അദ്ദേഹം ഏതറ്റംവരെയും പോകുമെന്നും മുല്ലപ്പളളി പറഞ്ഞു.

തലയില്‍ മുണ്ടിട്ട് ഭീകര സംഘടനകളുടെ വോട്ടുവാങ്ങേണ്ട ഗതികേടിലാണ് സി.പി.എമ്മെന്ന് ബി.ജെ.പി നേതാവ് ശോഭാ സുരേന്ദ്രന്‍ കുറ്റപ്പെടുത്തി. ഭീകരന്‍മാരുടെ പിന്തുണതേടാന്‍ ഒരു മടിയും മറയുമില്ലാത്ത ആളുകളാണ് ഇടതുപക്ഷത്തിനകത്തുളളത്. കാലാകാലങ്ങളില്‍ തലയില്‍ മുണ്ടിട്ട് കേരളത്തിന്റെ മുഖ്യമന്ത്രിവരെ ഭീകരവാദ സംഘടനകളുടെ നേതാക്കന്‍മാരുമായി കോഴിക്കോട് ഒരുമിച്ചിരുന്നത് നാലുകൊല്ലം മുന്‍പല്ലേയെന്നും ശോഭാ സുരേന്ദ്രന്‍ പ്രതികരിച്ചു.

അതേസമയം വാശിയേറിയ മത്സരം നടന്ന ബിജെപിയുടെ ഏക സിറ്റിംഗ് സീറ്റായ നേമത്ത് ഇത്തവണയും ബിജെപിക്ക് തന്നെയാണ് വിജയമെന്ന് കുമ്മനം രാജശേഖരന്‍ പറഞ്ഞു. കണക്കുകള്‍ പരിശോധിച്ചു, പ്രവര്‍ത്തകരോട് സംസാരിച്ചു. ഇതില്‍ നിന്ന് വിജയത്തെ കുറിച്ചുള്ള ആത്മവിശ്വാസം ആണ് കിട്ടുന്നത്. വോട്ട് കച്ചവടം എന്ന് ആരോപിച്ചത് എല്‍ഡിഎഫ് യുഡിഎഫ് നിലപാടുകള്‍ കണ്ട് എടുത്ത നിഗമനം ആണ്. ഓരോരുത്തരുടേയും വോട്ട് കണക്ക് വിശദമായി പഠിച്ച ശേഷം വിശദമായി രണ്ട് മൂന്ന് ദിവസത്തിനകം കാര്യങ്ങള്‍ വ്യക്തമാകുമെന്നും കുമ്മനം രാജശേഖരന്‍ പ്രതികരിച്ചു.

ഒ രാജഗോപാലിന്റെ വാക്കുകള്‍ തെരഞ്ഞെടുപ്പ് ദിനത്തില്‍ വളച്ചൊടിക്കപ്പെട്ടു. കെ മുരളീധരന്റെ വാഹനത്തിന് നേരെ കല്ലേറ് ഉണ്ടായത് ശരിയല്ലെന്നത് അടക്കം ഒ രാജഗോപാലിന്റെ വാക്കുകള്‍ വളച്ചൊടിക്കപ്പെട്ടെന്നാണ് കുമ്മനം പറയുന്നത്. അക്രമത്തെ കുറിച്ച് അറിയില്ലെന്ന് ഒ രാജഗോപാല്‍ പറഞ്ഞത് നേമത്തെ കുറിച്ച് അറിയില്ലെന്ന് വരെ വ്യാഖ്യാനിക്കപ്പെട്ടെന്നും കുമ്മനം പറഞ്ഞു.

എന്തായാലും കുമ്മനത്തെ തോല്‍പ്പിക്കാന്‍ ആര് ശ്രമിച്ചു എന്ന് ഫലം വരുമ്പോള്‍ വ്യക്തമാകും. അതെല്ലാം മറികടന്ന് കുമ്മനം ജയിച്ചാല്‍ അതൊരു മഹാ വിജയമായിരിക്കും.