രാജിക്കാര്യത്തില്‍ മാധ്യമങ്ങളോട് പ്രതികരിക്കാത്തതില്‍ ന്യായീകരണവുമായി മുന്‍ മന്ത്രി കെ.ടി. ജലീല്‍. ആരോഗ്യാവസ്ഥ നല്ലതല്ലാത്തതിനാല്‍ രാജിക്കാര്യം സംബന്ധിച്ചുള്ള തന്റെ പ്രതികരണം ചോദിക്കരുതെന്ന് മാദ്ധ്യമങ്ങളോട് ജലീല്‍ അഭ്യര്‍ത്ഥിച്ചു. കഴുത്തില്‍ കെട്ടിക്കിടന്ന ഫാറ്റ് നീക്കാനുള്ള ശസ്ത്രക്രിയ അടുത്തിടെയാണ് കഴിഞ്ഞതെന്നും മുഖത്ത് നീര്‍ക്കെട്ടുണ്ടെന്നും ജലീല്‍ പറഞ്ഞു. അതിനാലാണ് ഫേസ്ബുക്ക് വഴി താന്‍ രാജിവയ്ക്കുന്ന കാര്യം അറിയിച്ചതെന്നും ജലീല്‍ കൂട്ടിച്ചേര്‍ത്തു.

തൃശൂര്‍ അമലയില്‍ വെച്ച്‌ ഒരു സര്‍ജറി കഴിഞ്ഞിരുന്നു. മുഖത്ത് നീര്‍കെട്ടുള്ളതിനാല്‍ രണ്ടാഴ്ച വിശ്രമം വേണമെന്നാണ് ഡോക്ടര്‍ നിര്‍ദ്ദേശിച്ചത്. അസുഖം ഭേദമാകുന്ന മുറക്ക് നേരില്‍ കാണാമെന്നും,അതുവരെ തന്റെ അഭിപ്രായ പ്രകടനങ്ങള്‍ ഫേസ്ബുക്കില്‍ കുറിക്കാനേ കഴിയൂ എന്നും കെ.ടി. ജലീല്‍ പറഞ്ഞു.

പലരും ഫോണ്‍ വിളിച്ചിട്ടും എടുക്കാതിരുന്നത് സംസാരിക്കാന്‍ കഴിയാത്തതുകൊണ്ടാണ്. മാദ്ധ്യമപ്രവര്‍ത്തകര്‍ ബൈറ്റിനായി വരാതിരിക്കാന്‍ ശ്രദ്ധിക്കണമെന്നും സംസാരിക്കുമ്ബോള്‍ എല്ലാവരോടുമായി ഒരുമിച്ചേ സംസാരിക്കുകയുള്ളൂ എന്നും ജലീല്‍ പറഞ്ഞു.