ആര്‍ക്കും ഒരു ദോഷവുമില്ലാത്ത ഒരു പഴഞ്ചൊല്ല് പോസ്റ്റ് ഇത്ര വൈറല്‍ ആകുമെന്ന് ആരും കരുതിയില്ല. പോസ്റ്റ് ഹാക്കാണെന്ന് പറഞ്ഞിട്ടും ഡെലീറ്റ് ചെയ്തിട്ടും ഇപ്പോഴും അതിനെപ്പറ്റിയാണ് ചൂടേറിയ ചര്‍ച്ചകള്‍. ഒരുപക്ഷെ ഹാക്കായിരിക്കുമെന്ന് ജനങ്ങള്‍ വിശ്വസിച്ചിട്ടും പാര്‍ട്ടിക്കാര്‍ വിശ്വസിക്കാന്‍ തയ്യാറല്ല.

ഫേസ്ബുക് പോസ്റ്റ് വിഷയത്തില്‍ യു. പ്രതിഭ എംഎല്‍എയ്ക്ക് എതിരെ സിപിഎം നേതൃത്വം രംഗത്തെത്തിയിട്ടുണ്ട്. ആവശ്യമില്ലാത്ത പോസ്റ്റ് ഇടരുതെന്ന് പാര്‍ട്ടിയില്‍ പൊതുനിര്‍ദേശമുണ്ടെന്നും എംഎല്‍എയുടെ കുറിപ്പ് എന്ത് ഉദ്ദേശ്യത്തിലാണെന്ന് അറിയില്ലെന്നും ജില്ലാ സെക്രട്ടറി ആര്‍. നാസര്‍ പറഞ്ഞു.

ഇതിനു പിന്നാലെ, ഹാക്ക് ചെയ്യപ്പെട്ടെന്ന് പറയുന്ന അക്കൗണ്ടില്‍നിന്നു തന്നെ എംഎല്‍എയുടെ ഒരു പോസ്റ്റ് കൂടി പ്രത്യക്ഷപ്പെട്ടു. വിമര്‍ശകരെ പരിഹസിച്ചും യൂത്ത് കോണ്‍ഗ്രസിനെയും മാധ്യമങ്ങളെയും കുറ്റപ്പെടുത്തിയുമാണിത്. അക്കൗണ്ട് ഹാക്ക് ചെയ്യപ്പെട്ടിരുന്നതായി ഇതിലും ആവര്‍ത്തിക്കുന്നു.

ഫേസ്ബുക് അക്കൗണ്ട് ഹാക്ക് ചെയ്യപ്പെട്ടതായി ജില്ലാ പൊലീസ് മേധാവിക്ക് പരാതി നല്‍കിയിട്ടുണ്ടെന്ന് എംഎല്‍എയുടെ ഓഫിസ് അറിയിച്ചു. പരാതി അയച്ചിട്ടുണ്ടെന്ന് ചൊവ്വാഴ്ച രാത്രി എംഎല്‍എ ഫോണിലൂടെ അറിയിച്ചതായി ജില്ലാ പൊലീസ് മേധാവി ജി. ജയ്‌ദേവ് പറഞ്ഞു.

ചൊവ്വാഴ്ച രാത്രി എംഎല്‍എയുടേതായി വന്ന ഫേസ്ബുക് പോസ്‌റ്റോടെയാണു വിവാദത്തിന്റെ തുടക്കം. 'പൊട്ടനെ ചട്ടന്‍ ചതിച്ചാല്‍ ചട്ടനെ ദൈവം ചതിക്കും' എന്നായിരുന്നു പോസ്റ്റ്. അതിനെ സിപിഎമ്മിലെ പ്രശ്‌നങ്ങളുമായി ബന്ധപ്പെടുത്തിയും മറ്റും കമന്റുകള്‍ വന്നു തുടങ്ങിയതോടെ പോസ്റ്റ് പിന്‍വലിച്ചു. അക്കൗണ്ട് ഹാക്ക് ചെയ്യപ്പെട്ടു എന്നും ആ പോസ്റ്റ് തന്റേതല്ലെന്നുമുള്ള പ്രതിഭയുടെ വിശദീകരണം പിന്നാലെ എത്തി. അപ്പോഴും ഒട്ടേറെ കമന്റുകള്‍ വന്നതോടെ അതും പിന്‍വലിച്ചു.

സിപിഎം അനുഭാവികള്‍ തന്നെ ആദ്യ പോസ്റ്റിനെതിരെ പ്രതികരിച്ചിരുന്നു. എംഎല്‍എയ്ക്ക് അനുകൂലമായ പ്രതികരണങ്ങള്‍ കുറവായിരുന്നു. വിശദീകരണ പോസ്റ്റിനു പിന്തുണയുമായി ഒട്ടേറെപ്പേര്‍ എത്തുകയും ചെയ്തു.

ഇന്നലെ രാവിലെ സപ്പോര്‍ട്ട് അഡ്വ. പ്രതിഭ എന്ന ഫെയ്‌സ്ബുക് അക്കൗണ്ടില്‍ വീണ്ടും പ്രതിഭയുടെ വിശദീകരണം പ്രത്യക്ഷപ്പെട്ടു 'എന്റെ ഫെയ്‌സ്ബുക് അക്കൗണ്ട് ഹൈജാക്ക് ചെയ്ത് അപകീര്‍ത്തിപ്പെടുത്തുന്ന പോസ്റ്റുകള്‍ പ്രചരിക്കുന്നതായി ശ്രദ്ധയില്‍ പെട്ടു. വിഷയത്തില്‍ അടിയന്തരമായി ഇടപെട്ട് എന്റെ ഫെയ്‌സ്ബുക് പേജുകള്‍ ബ്ലോക്ക് ചെയ്യാനും അപകീര്‍ത്തിപ്പെടുത്താന്‍ ശ്രമിച്ചവരെ നിയമത്തിനു മുന്നില്‍ കൊണ്ടുവരാനും അടിയന്തര നടപടിയെടുക്കണം'. ഇതിനു ശേഷമാണ് സ്വന്തം അക്കൗണ്ടില്‍ പ്രതിഭ വിശദമായ കുറിപ്പെഴുതിയത്.

വിവാദ പോസ്റ്റിനു താഴെ വന്ന ചില കമന്റുകളും ഇതിനൊപ്പം ചേര്‍ത്തിട്ടുണ്ട്. വിവാദ പോസ്റ്റിലെ പഴഞ്ചൊല്ല് ജി. സുധാകരനെയാണോ കെ.ടി. ജലീലിനെയാണോ ലക്ഷ്യമിട്ടത് എന്ന മട്ടിലുള്ള കമന്റുകളും കൂട്ടത്തിലുണ്ടായിരുന്നു. അതിനു മറുപടിയെന്നവണ്ണം, സമര്‍ഥരും അഴിമതിയില്ലാത്തവരുമായ 2 മന്ത്രിമാരുടെ പേര് വലിച്ചിഴച്ചു എന്നും എംഎല്‍എ പറയുന്നുണ്ട്.

എംഎല്‍എ ബെംഗളൂരുവിലാണെന്ന് ഓഫിസ് അറിയിച്ചു. തെരഞ്ഞെടുപ്പ് ഫലം വരാനിരിക്കുന്നതേയുള്ളൂ. കായംകുളത്തെ ഫലം ഏറെ നിര്‍ണായകമാണ്. അന്നാണ് ഈ പഴഞ്ചൊല്ലിന്റെ യഥാര്‍ത്ഥ അവകാശികള്‍ പുറത്താകൂ.