തിരഞ്ഞെടുപ്പ് ഫലത്തെ കുറിച്ച് പ്രതികരിച്ച് എൻ ഡി എ സ്ഥാനാർത്ഥി കൃഷ്ണകുമാർ. ഫലം വരുന്നതിന് മുൻപുള്ള ഈ കാത്തിരിപ്പിന് ഒരു സുഖമുണ്ടെന്ന് എൻ ഡി എ സ്ഥാനാർത്ഥി കൃഷ്ണകുമാർ വ്യക്തമാക്കി . ചില ചിന്തകൾ മനസിലുണ്ടെന്നും, തള്ളി മറിയ്ക്കാൻ താൽപര്യമില്ലെന്നും അദ്ദേഹം പറഞ്ഞു.

സ്‌കൂളിലെ തിരഞ്ഞെടുപ്പിൽ പോലും മത്സരിക്കാത്ത താൻ നിയമസഭാ തിരഞ്ഞെടുപ്പിൽ മത്സരിക്കാനിറങ്ങിയത് ജീവിതത്തിലെ മറക്കാനാവാത്ത അനുഭവമായിരുന്നെന്നും കൃഷ്ണകുമാർ പറഞ്ഞു. 20 ദിവസത്തിനുള്ളിൽ പല പാഠങ്ങളും പഠിച്ചെന്നും അദ്ദേഹം പറഞ്ഞു.

'സ്ഥാനാർത്ഥികൾക്ക് ഫലമറിയുന്നതു വരെ ടെൻഷനായിരിക്കുമോ, എങ്ങനെയാണ് അവർ കാത്തിരിക്കുന്നതെന്നൊക്കെയായിരുന്നു പണ്ട് ഞാൻ ആലോചിച്ചിരുന്നത്. എന്നാൽ കാത്തിരിപ്പിനൊരു സുഖമുണ്ടെന്ന് ഇപ്പോൾ മനസിലായി'- അദ്ദേഹം പറഞ്ഞു .

തിരുവനന്തപുരത്ത് ഇടത് വലത് മുന്നണികളെ ഞെട്ടിച്ച് എൻ ഡി എ സ്ഥാനാർത്ഥി കൃഷ്ണകുമാർ അപ്രതീക്ഷിത നീക്കം നടത്തിയിരുന്നു . വലിയതുറ തുറമുഖ സമിതി നേതാക്കളെ ഒപ്പം കൂട്ടി സ്ഥാനാർത്ഥിയായ കൃഷ്ണകുമാർ നടത്തിയ വാർത്താസമ്മേളനം നടത്തിയിരുന്നു . ഇത്തവണ കൃഷ്ണകുമാറിനാണ് തീരദേശത്തിന്റെ പിന്തുണയെന്ന് തുറമുഖ സമിതി നേതാക്കൾ വാര്‍ത്താ സമ്മേളനത്തില്‍ പരസ്യമായി പ്രഖ്യാപിക്കുകയും ചെയ്തിരുന്നു.

വലിയതുറയില്‍ മിനി ഫിഷിംഗ് ഹാര്‍ബര്‍ നിര്‍മിക്കണമെന്ന രണ്ടുപതിറ്റാണ്ടുകളായുള്ള ആവശ്യം അതേ പ്രാധാന്യത്തോട് കൂടി തന്നെ സ്വീകരിക്കുമെന്നും പരിഗണന നൽകുമെന്നും കൃഷ്ണ കുമാർ പ്രഖ്യാപിച്ചിരുന്നു. ഇതാണ് മത്സ്യത്തൊഴിലാളികൾ എൻ ഡി എയിലേക്ക് അടുക്കാൻ കാരണമായത്.

ഫിഷിംഗ് ഹാര്‍ബര്‍ എന്ന ആവശ്യം ഉന്നയിച്ച് കൃഷ്ണകുമാര്‍ പ്രധാനമന്ത്രിക്ക് നിവേദനം നല്‍കിയിരുന്നു. ഇതിൻ്റെ പശ്ചാത്തലത്തിൽ കേന്ദ്രമന്ത്രി പ്രഹ്‌ളാദ് ജോഷിയും വി മുരളീധരനും വലിയതുറ സന്ദര്‍ശിച്ചിരുന്നു. ഇതിൽ ഉടൻ തീരുമാനമാകുമെന്ന് കൃഷ്ണകുമാർ വാർത്താസമ്മേളനത്തിൽ പറഞ്ഞിരുന്നു .