കേരള പോലീസിന്റെ പുതിയ ഡാന്‍സ് വീഡിയോ വളരെയധികം ഹിറ്റാകുകയാണ്. കോവിഡ് മഹാമാരിയെ സംബന്ധിച്ച്‌ ആളുകള്‍ക്കിടയില്‍ കൂടുതല്‍ ബോധവല്‍ക്കരണം നടത്തുക എന്ന ലക്ഷ്യത്തോടെയാണ് പുതിയ ഡാന്‍സ് വീഡിയോ കേരള പോലീസ് തയ്യാറാക്കിയിരിക്കുന്നത്. ഈയടുത്ത് ഹിറ്റായി മാറിയ 'എഞ്ജോയ് എഞ്ജാമി' എന്ന തമിഴ് ഗാനത്തിന്റെ പാരഡി ഗാനമാണ് ഡിപ്പാര്‍ട്ട്മെന്റ് ഇപ്പോൾ പുറത്തിറക്കിയിരിക്കുന്നത്.

ഒന്നര മിനിറ്റ് ദൈര്‍ഘ്യമുള്ള ഈ വീഡിയോയില്‍ യൂണിഫോം ധരിച്ച ഒന്‍പത് പോലീസ് ഉദ്യോഗസ്ഥര്‍ ഡാന്‍സ് ചെയ്യുന്നുണ്ട് . എങ്ങനെ മാസ്ക് ധരിക്കണം, സാമൂഹിക അകലം എങ്ങനെ പാലിക്കാം, സാനിറ്റൈസര്‍ ഉപയോഗിക്കണം തുടങ്ങിയ കോവിഡ് ബോധവല്‍ക്കരണവുമായി ബന്ധപ്പെട്ട സന്ദേശങ്ങളാണ് ഗാനത്തിന്റെ വരികളിൽ ഉൾക്കൊള്ളിച്ചിരിക്കുന്നത് .

കോവിഡ് പ്രതിരോധത്തിന്റെ ഭാഗമായി വാക്സിന്‍ സ്വീകരിക്കണമെന്നും ഈ ഗാനത്തിന്റെ വരികളിലൂടെ പോലീസ് ജനങ്ങളോട് ആവശ്യപ്പെടുന്നു. നിരവധി പേരാണ് കേരള പോലീസിന്റെ 'പരിഭ്രാന്തിയല്ല; ജാഗ്രതയാണ് ആവശ്യം' എന്ന തലക്കെട്ടോടെ പങ്കുവെച്ച ഈ വീഡിയോ സമൂഹ മാധ്യമങ്ങളില്‍ ഷെയര്‍ ചെയ്യുന്നത്.

'പ്രവര്‍ത്തിക്കാം നമുക്കൊരുമിച്ച്‌ പരിഭ്രാന്തിയല്ല; ജാഗ്രതയാണ് ആവശ്യം, കേരളാ പോലീസ് ഒപ്പമുണ്ട്' എന്നും കേരള പോലീസ് മീഡിയാ സെന്റര്‍ പുറത്തിറക്കിയ വീഡിയോയില്‍ അടിക്കുറിപ്പായി ചേര്‍ത്തിട്ടുണ്ട്. ഇതുവരെ മൂന്ന് ലക്ഷത്തിലധികം പേര്‍ ഈ വീഡിയോ കണ്ടു കഴിഞ്ഞു. 9,000 ഷെയറുകളും 15,000 ലൈക്കുകളും ഇതുവരെ ലഭിച്ചിട്ടുണ്ട്.

കഴിഞ്ഞ വര്‍ഷം മാര്‍ച്ചില്‍ പുറത്തിറക്കിയ 'കൈകഴുകുന്ന ഡാന്‍സ് വീഡിയോ' കേരള പോലീസ് പുറത്തിറക്കിയ കോവിഡ് ബോധവല്‍ക്കരണ വീഡിയോ വൈറലായിരുന്നു.

'അയ്യപ്പനും കോശിയും' എന്ന ചിത്രത്തിലെ കളക്കാത്ത എന്ന ഗാനത്തിനൊത്ത് ആറു പോലീസുകാര്‍ നൃത്തം ചെയ്യുന്ന വീഡിയോയായിരുന്നു ഇത്. ലോകാരോഗ്യ സംഘടന നിര്‍ദ്ദേശിക്കുന്ന വിധേന എങ്ങളെ കൈകഴുകാം എന്നും ആളുകളെ ഈ വീഡിയോ വഴി പഠിപ്പിക്കുകയായിരുന്നു പോലീസ്.

കേരള പോലീസ് മീഡിയാ സെന്ററിന്റെ ഡെപ്യൂട്ടി ഡയറക്ടറായ വി. പി. പ്രമോദ് കുമാറാണ് ഈ കോവിഡ് ബോധവല്‍ക്കരണ വീഡിയോ സംവിധാനം ചെയ്തിരിക്കുന്നത്.

ഹേമന്ദ് നായര്‍, ഷീഫിന്‍ സി. രാജ് എന്നിവരാണ് ദൃശ്യങ്ങള്‍ പകര്‍ത്തിയത്. ആദിത്യ എസ്. നായരും രാജേഷ് ലാല്‍ വംഷയും എഴുതിയ വരികള്‍ ആലപിച്ചിരിക്കുന്നത് നാഹൂം അബ്രഹാമും നിള ജോസഫുമാണ്.