കോവിഡ് രണ്ടാം തരംഗത്തില്‍ അടുത്ത സമ്ബര്‍ക്കമില്ലാതെയും രോഗം പകരുന്നതായാണ് കാണുന്നതെന്ന് മുഖ്യമന്ത്രി പിണറായി വിജയന്‍. രോഗാണു ഏറെ നേരം അന്തരീക്ഷത്തില്‍ തങ്ങിനില്‍ക്കുന്നു. ജനിതക വ്യതിയാനം വന്ന വൈറസിന് മനുഷ്യ ശരീരത്തിലേക്ക് കടക്കാന്‍ കഴിവ് കൂടുതലാണെന്നും മുഖ്യമന്ത്രി പറഞ്ഞു.

സംസ്ഥാനത്ത് കോവിഡ് ശമനമില്ലാതെ തുടരുന്ന സാഹചര്യത്തില്‍ കര്‍ശന നിയന്ത്രണങ്ങളിലേക്ക് കടക്കുകയാണ്. മേയ് നാല് മുതല്‍ ഒമ്ബത് വരെ ദിവസങ്ങളില്‍ കടുത്ത നിയന്ത്രണങ്ങളേര്‍പ്പെടുത്താനാണ് തീരുമാനം. ഇതിന്‍റെ വ്യക്തമായ മാനദണ്ഡങ്ങള്‍ പുറപ്പെടുവിക്കും.

സംസ്ഥാനത്ത് ഏറ്റവുമുയര്‍ന്ന പ്രതിദിന കോവിഡ് നിരക്കാണ് ഇന്ന് രേഖപ്പെടുത്തിയത്. ഇന്ന് 38,607 പേര്‍ക്കാണ് കോവിഡ് സ്ഥിരീകരിച്ചത്. 21,116 പേര്‍ രോഗമുക്തി നേടി. 24 മണിക്കൂറിനിടെ 1,57,548 സാമ്ബിളുകളാണ് പരിശോധിച്ചത്. ടെസ്റ്റ് പോസിറ്റിവിറ്റി നിരക്ക് 24.5 ആണ്. കഴിഞ്ഞ ദിവസങ്ങളിലുണ്ടായ 48 മരണങ്ങളാണ് കോവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 5259 ആയി.