മാസങ്ങള്‍ക്ക് മുമ്പ് സംസ്ഥാനത്ത് കോവിഡ് ആര്‍.ടി.പി.സി.ആര്‍ പരിശോധനയ്ക്ക് 1500 രൂപയാക്കിയതാണ്. എന്നാല്‍ ലാബുകാര്‍ കോടതിയില്‍ പോയി 1700 രൂപയാക്കി.

ഇതോടെ മറ്റ് സംസ്ഥാനങ്ങളില്‍ 700 രൂപയ്ക്ക് വരെ ആര്‍.ടി.പി.സി.ആര്‍ ചെയ്യുന്നുവെന്ന വാര്‍ത്ത വന്നു. സ്വകാര്യ ലാബുകാരുടെ കൊള്ള ചാനലുകാര്‍ പുറത്ത് കൊണ്ടുവന്നതോടെ സര്‍ക്കാരും കര്‍ശനമായ നടപടി സ്വീകരിച്ചു. ആര്‍.ടി.പി.സി.ആര്‍ ടെസ്റ്റിന് 500 രൂപയാക്കി. ഇത്രയും നാള്‍ കൊള്ളയടിച്ചിട്ടും 500 പോരെന്നാണ് ലാബുകാര്‍ പറയുന്നത്.

ആര്‍.ടി.പി.സി.ആര്‍ പരിശോധനാ നിരക്ക് കുറച്ചതിനെതിരേ പരാതിയുമായി സ്വകാര്യ ലാബുകള്‍ രംഗത്തെത്തി. പരിശോധന നടത്താന്‍ 500 രൂപ അപര്യാപ്തമാണെന്നാണ് ലാബുകളുടെ പരാതി.

സര്‍ക്കാര്‍ ഉത്തരവു ലഭിച്ചില്ലെന്ന കാരണം ചൂണ്ടിക്കാട്ടി ഇന്നലെ പല ജില്ലകളിലും സ്വകാര്യ ലാബുകള്‍ ഉയര്‍ന്ന നിരക്കു തന്നെയാണ് ഈടാക്കിയത്. അതേസമയം, സര്‍ക്കാര്‍ ഉത്തരവു നടപ്പിലാക്കാനുള്ളതാണെന്നും ആവശ്യമായ തുടര്‍ നടപടികള്‍ കൈക്കൊള്ളുമെന്നും മുഖ്യമന്ത്രി പിണറായി വിജയന്‍ വ്യക്തമാക്കി.

ആര്‍.ടി.പി.സി.ആര്‍. നിരക്ക് 1700 രൂപയില്‍നിന്ന് 500 രൂപയാക്കിയാണ് സര്‍ക്കാര്‍ കുറച്ചത്. ഇത്ര കുറഞ്ഞ നിരക്കില്‍ പരിശോധന നടത്തിയാല്‍ ചെലവുകളുടെ ഒരുഭാഗം പോലും കണ്ടെത്താനാകില്ലെന്നാണു ലാബുകളുടെ പരാതി.

എന്നാല്‍, ഐ.സി.എം.ആര്‍. അംഗീകരിച്ച ടെസ്റ്റ് കിറ്റുകള്‍ കുറഞ്ഞ നിരക്കില്‍ ലഭ്യമായതിനാലാണ് നിരക്ക് കുറച്ചതെന്ന് സര്‍ക്കാര്‍ ഉത്തരവില്‍ വ്യക്തമാക്കുന്നു. ടെസ്റ്റ് കിറ്റ്, വ്യക്തിഗത സുരക്ഷാ ഉപകരണം, സ്വാബ് ചാര്‍ജ് എന്നിവ ഉള്‍പ്പെടെയാണു പുതിയ നിരക്ക്.

എന്നാല്‍, ഇന്നലെ സംസ്ഥാനത്തെ പല ലാബുകളിലും പഴയ നിരക്കില്‍ തന്നെയാണ് പരിശോധന നടത്തിയത്. സര്‍ക്കാര്‍ ഉത്തരവു ലഭിച്ചില്ലെന്ന കാരണമാണ് ലാബുകള്‍ പറഞ്ഞത്. സംസ്ഥാന വ്യാപകമായി പരാതി ഉയര്‍ന്നതോടെ മുഖ്യമന്ത്രി പിണറായി വിജയന്റെ പത്രസമ്മേളനത്തില്‍ ഈ വിഷയം ചോദ്യമായി ഉയര്‍ന്നു.

തുടര്‍ന്നാണ് സര്‍ക്കാര്‍ ഉത്തരവ് അംഗീകരിച്ചില്ലെങ്കില്‍ നടപടിയുണ്ടാകുമെന്നു മുഖ്യമന്ത്രി വ്യക്തമാക്കിയത്. സര്‍ക്കാര്‍ ആശുപത്രികളില്‍ ആര്‍.ടി.പി.സി.ആര്‍. പരിശോധന സൗജന്യമാണ്.കോവിഡ് പരിശോധനയ്ക്ക് രാജ്യത്ത് ഏറ്റവും കൂടുതല്‍ ചാര്‍ജ് ഈടാക്കുന്ന സംസ്ഥാനമെന്ന പഴികേട്ടതിനു പിന്നാലെയാണ് നിരക്ക് 500 രൂപയായി കുറച്ചത്.

കോവിഡിന്റെ തുടക്കത്തില്‍ ആര്‍.ടി.പി.സി.ആര്‍ നിരക്ക് 2750 രൂപയായിരുന്നു. പിന്നീട് 1700 ആക്കി. പിന്നാലെ 1500 ആക്കിയെങ്കിലും ലാബുകള്‍ ഹൈക്കോടതിയെ സമീപിച്ചതോടെയാണ് വീണ്ടും 1700 ആയി ഉയര്‍ത്തിയത്.

വാക്‌സിന് കേന്ദ്രസര്‍ക്കാര്‍ പണം ഈടാക്കുമെന്ന പ്രസ്താവന വന്നതോടെയാണ് സംസ്ഥാനത്തെ ആര്‍.ടി.പി.സി.ആര്‍ കൊള്ള ബിജെപിക്കാര്‍ ഉയര്‍ത്തിക്കൊണ്ടു വന്നത്. അത് ചാനലുകള്‍ ഏറ്റെടുത്തതോടെ ഫലവും കണ്ടു.



അതേസമയം രാജ്യത്ത് 18 മുതല്‍ 44 വയസ്സ് വരെയുള്ളവര്‍ക്കായുള്ള വാക്‌സീന്‍ വിതരണം ഇന്ന് തുടങ്ങും. എന്നാല്‍ ആവശ്യത്തിന് വാക്‌സീന്‍ ഇല്ലാത്തതിനാല്‍ നിരവധി സംസ്ഥാനങ്ങള്‍ വാക്‌സീന്‍ വിതരണം ഇന്ന് തുടങ്ങാന്‍ കഴിയില്ലെന്ന നിലപാട് അറിയിച്ചിട്ടുണ്ട്.

കേരളത്തില്‍ 18 വയസിന് മുകളില്‍ ഉള്ളവരുടെ വാക്‌സിനേഷന്‍ ഇന്ന് തുടങ്ങില്ല. സര്‍ക്കാര്‍, സ്വകാര്യ മേഖലകളില്‍ വാക്‌സീന്‍ എത്താത്തതും മാര്‍ഗ നിര്‍ദേശങ്ങള്‍ വരാത്തതും ആണ് കാരണം.