അങ്ങനെ കാത്തിരിപ്പിന് വിരാമമായി. സംസ്ഥാനത്തെ നിര്‍ണായകമായ തെരഞ്ഞെടുപ്പിലെ വോട്ടെണ്ണല്‍ തുടങ്ങി. ആദ്യം തപാല്‍ വോട്ടുകളാണ് എണ്ണിത്തുടങ്ങിയത്. ഇത്തവണ ഓരോ മണ്ഡലത്തിലും ശരാശരി നാലായിരം മുതല്‍ അയ്യായിരം വരെ തപാല്‍ വോട്ടുകളുണ്ട്. ഇവയെണ്ണാന്‍ അഞ്ച് മുതല്‍ എട്ട് വരെ മേശകള്‍ ക്രമീകരിച്ചിരുന്നു. എട്ടരക്ക് ഇലക്ട്രോണിക് വോട്ടിങ് യന്ത്രങ്ങള്‍ എണ്ണിത്തുടങ്ങും. കര്‍ശന കോവിഡ് സുരക്ഷയോടെ വിവിധ ജില്ലകളിലായി 633 ഹാളുകളിലായാണു വോട്ടെണ്ണല്‍.

തപാല്‍ ബാലറ്റുകള്‍ എണ്ണുന്നതിന് ഓരോ മേശയിലും എ.ആര്‍.ഒ.യെ നിയോഗിച്ചിട്ടുണ്ട്. ഇ.വി.എം. എണ്ണുന്നതുപോലെ ഉദ്യോഗസ്ഥരും ഏജന്റുമാരും ഇവിടേയുമുണ്ട്. ഒരുമേശയില്‍ 500 വോട്ടുകളാണ് എണ്ണുന്നത്. അസാധുവായ ബാലറ്റ് തള്ളും. സര്‍വീസ് വോട്ടുകള്‍ ക്യു.ആര്‍ കോഡുപയോഗിച്ച് നമ്പരും മറ്റും പരിശോധിക്കും. തപാല്‍ ബാലറ്റുകള്‍ പൂര്‍ണമായും എണ്ണിത്തീര്‍ന്ന ശേഷമേ ഇ.വി.എമ്മിലെ അവസാനറൗണ്ട് എണ്ണുകയുള്ളു.

വോട്ടെണ്ണല്‍ തുടങ്ങിയതോടെ കേരളത്തില്‍ എല്‍ഡിഎഫിന്റെ തുടര്‍ഭരണമോ, യുഡിഎഫിലൂടെ ഭരണമാറ്റമോ, അതോ ത്രിശങ്കുസഭയോ എന്ന് അറിയാന്‍ ഇനി മണിക്കൂറുകള്‍ മാത്രം ബാക്കി. 140 മണ്ഡലങ്ങളിലെയും മലപ്പുറം ലോക്‌സഭാ മണ്ഡലത്തിലെയും വോട്ടെണ്ണലാണ് നടക്കുന്നത്.

114 കേന്ദ്രങ്ങളില്‍ 633 ഹാളുകളാണ് വോട്ടെണ്ണുന്നതിനായി ഒരുക്കിയിരിക്കുന്നത്. കര്‍ശനമായ കോവിഡ് മാനദണ്ഡങ്ങളാണ് എല്ലാ വോട്ടെണ്ണല്‍ കേന്ദ്രത്തിലും പാലിക്കുന്നത്. വോട്ടെണ്ണല്‍ കേന്ദ്രങ്ങള്‍ക്ക് മുന്നില്‍ ആള്‍ക്കൂട്ടം അനുവദിക്കില്ല, ആഹ്ലാദ പ്രകടനങ്ങളും വിലക്കിയിട്ടുണ്ട്. ചരിത്ര വിജയത്തിലൂടെ തുടര്‍ഭരണമാണ് ഇടതുമുന്നണി പ്രതീക്ഷിക്കുന്നത്. എക്‌സിറ്റ് പോള്‍ ഫലങ്ങള്‍ മറികടന്ന് മികച്ച വിജയം ഉറപ്പിക്കുകയാണ് യുഡിഎഫ്. ബി.ജെ.പിയാകട്ടെ, അഞ്ചിലേറെ സീറ്റുകള്‍ നേടാനാകുമെന്ന ആത്മവിശ്വാസത്തിലാണ്.

7 മേശകളുള്ള 3 ഹാളുകളിലാണു മിക്കയിടത്തും യന്ത്രങ്ങളിലെ വോട്ട് എണ്ണുന്നത്. തപാല്‍ വോട്ട് 5 മുതല്‍ 8 വരെ മേശകളുള്ള മറ്റൊരു ഹാളിലും എണ്ണും. 16 റൗണ്ടില്‍ മെഷീനും 2 റൗണ്ടില്‍ തപാല്‍വോട്ടും എണ്ണിത്തീര്‍ക്കും.

ഒരു റൗണ്ടില്‍ 21 ബൂത്തുകളെണ്ണും. ലീഡ് നില തിരഞ്ഞെടുപ്പ് കമ്മിഷന്റെ എന്‍കോര്‍ എന്ന സോഫ്റ്റ്‌വെയറിലാണ് അപ്ലോഡ് ചെയ്യുന്നത്. പിന്നീട് വെബ്‌സൈറ്റിലേക്കും. കഴിഞ്ഞതവണ ട്രെന്‍ഡ് എന്ന സോഫ്റ്റ്‌വെയറായിരുന്നെങ്കിലും ഇത്തവണ അതില്ല. പകരമുള്ള സോഫ്റ്റ്‌വെയര്‍ വഴി വിവരം നല്‍കുമെന്നാണ് കമ്മിഷന്റെ വിശദീകരണം. ഭൂരിപക്ഷം കുറയുന്ന മണ്ഡലങ്ങളില്‍ തപാല്‍ വോട്ടുകള്‍ നിര്‍ണ്ണായകമാകും. ഇവിടെ തര്‍ക്കങ്ങള്‍ ഉണ്ടാകാനുള്ള സാധ്യതയുണ്ട്. ഇത്തരം മണ്ഡലങ്ങളിലെ ഫലം വൈകാനിടയുണ്ട്. തര്‍ക്കങ്ങളില്ലാത്ത മണ്ഡലങ്ങളില്‍ ഉച്ചയോടെ അന്തിമഫലം വരും.

957 സ്ഥാനാര്‍ഥികള്‍, 40,771 ബൂത്തുകള്‍ രണ്ട് കോടിയിലധികം വോട്ടുകള്‍. ദിവസങ്ങളുടെ കാത്തിരിപ്പ് അവസാന ലാപ്പിലേക്ക് കടന്നിരിക്കുകയാണ്.

തുടര്‍ഭരണം ലഭിക്കുമെന്ന ആത്മവിശ്വാസത്തിലാണ് ഇടതുമുന്നണി. 2016ല്‍ 91 സീറ്റിലാണ് എല്‍.ഡി.എഫ് വിജയിച്ചത്. പക്ഷേ ഇത്തവണ 25 ഓളം സീറ്റുകളില്‍ ഫലം എന്തായിരിക്കുമെന്ന് ആര്‍ക്കും പറയാനാവില്ല.