ട്രെയിനില്‍ യുവതിയെ ആക്രമിച്ച കേസിലെ പ്രതി നൂറനാട് സ്വദേശി ബാബുക്കുട്ടന്‍ വീണ്ടും ആശുപത്രിയില്‍. അപസ്മാരമുണ്ടായതിനെത്തുടര്‍ന്നാണ് ആശുപത്രിയില്‍ പ്രവേശിപ്പിച്ചത്.

ശനിയാഴ്ച തിരുവനന്തപുരത്ത് എത്തിച്ച്, അക്രമം നടന്ന ട്രെയിനില്‍ തെളിവെടുപ്പ് നടത്തിയിരുന്നു. കൂടുതല്‍ തെളിവെടുപ്പിന് എറണാകുളത്തേക്ക് കൊണ്ടുവരുന്നതിനിടെ വര്‍ക്കലയില്‍ എത്തിയപ്പോഴാണ് അപസ്മാരമുണ്ടായത്. ഇതേ തുടര്‍ന്ന് സമീപത്തെ താലൂക്ക് ആശുപത്രിയിലും വിദഗ്ധ ചികിത്സക്ക് കോട്ടയം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.

24 മണിക്കൂര്‍ നിരീക്ഷണത്തിലാണ് ഇയാള്‍. ചിറ്റാറില്‍നിന്ന് അറസ്റ്റിലായ പ്രതിക്ക് ആദ്യ ദിവസവും അപസ്മാരമുണ്ടായിരുന്നു. ആശുപത്രിയില്‍നിന്ന് ഡിസ്ചാര്‍ജ് ചെയ്തപ്പോഴാണ് കസ്റ്റഡിയില്‍ വാങ്ങിയത്.

ആക്രമിക്കാന്‍ ഉപയോഗിച്ച സ്‌ക്രൂെ്രെഡവര്‍ വാങ്ങിയ ആലപ്പുഴ മുല്ലക്കലെ കടയിലും മുളന്തുരുത്തിയിലെ സംഭവസ്ഥലത്തും എത്തിച്ച് തെളിവെടുക്കാനിരിക്കെയാണ് ഇയാള്‍ ആശുപത്രിയിലായത്. സംഭവശേഷം ഒളിവില്‍ കഴിഞ്ഞ സ്ഥലങ്ങളിലും എത്തിക്കാനുണ്ട്.

ആവശ്യമെങ്കില്‍ കസ്റ്റഡി കാലാവധി നീട്ടിലഭിക്കാന്‍ അപേക്ഷ നല്‍കുമെന്ന് പൊലീസ് പറഞ്ഞു. ഏപ്രില്‍ 28നാണ് മുളന്തുരുത്തി കാരിക്കോട് സ്വദേശിനി ആശ മുരളീധരന്‍ (32) ഓടുന്ന ട്രെയിനില്‍ ആക്രമണത്തിനും കവര്‍ച്ചക്കും ഇരയായത്.