ഈ ചൈനയെകൊണ്ട് മനുഷ്യന് കിടക്കപ്പൊറുതി ഇല്ലെന്ന് പറയുന്നത് അക്ഷരം പ്രതി ശ്രിയായാണ്. ഈ ചൈനീസ് കൊറോണ കാരണം മനുഷ്യന്‍ സ്വസ്ഥമായി പുറത്തിറങ്ങിയിട്ട് വര്‍ഷങ്ങളായി. നമ്മള്‍ ലോക് ഡൗണിലുമാണ്. ഇപ്പോഴിതാ നമ്മളെ മുള്‍മുനയിലാക്കി ചൈനീസ് റോക്കറ്റും.

നിയന്ത്രണം നഷ്ടപ്പെട്ട ചൈനീസ് റോക്കറ്റ് ഇന്ത്യന്‍ മഹാസുമദ്രത്തിലാണ് വീണതായാണ് റിപ്പോര്‍ട്ടുകള്‍ പുറത്തുവന്നത്. റിപ്പോര്‍ട്ടുകള്‍ ശരിവച്ചാല്‍ ഇന്ത്യന്‍ സമയം ഇന്നുരാവിലെ എട്ടുമണിയോടെയാണ് റോക്കറ്റ് ഇന്ത്യന്‍ മഹാസമുദ്രത്തില്‍ പതിച്ചത്.

മാലി ദ്വീപിന്റെ ഭാഗത്ത് വീണതായാണ് ചൈനീസ് സ്‌പേസ് ഏജന്‍സി അറിയിച്ചത്. ഇതനുസരിച്ച് കേരളത്തില്‍ നിന്നും 900 മൈല്‍ അകലെയായാണ് റോക്കറ്റ് പതിച്ചിരിക്കുന്നത്. റോക്കറ്റിന്റെ വേഗതയിലോ സഞ്ചാരപഥത്തിലോ എന്തെങ്കിലും മാറ്റമുണ്ടായിരുന്നെങ്കില്‍ കേരളത്തിലോ ഇന്ത്യയിലെ മറ്റു ജനവാസ പ്രദേശങ്ങളിലോ റോക്കറ്റ് പതിക്കാന്‍ സാദ്ധ്യതയുണ്ടായിരുന്നു.

റോക്കറ്റ് വീണ സ്ഥലത്തേക്ക് കൊച്ചിയില്‍ നിന്നു വായുമാര്‍ഗം 1448 കിലോമീറ്റര്‍ ദൂരമേയുള്ളു. യു.എസ് സ്‌പേസ് ഏജന്‍സിയും യൂറോപ്യന്‍ സ്‌പേസ് ഏജന്‍സിയും റഷ്യന്‍ സ്‌പേസ് ഏജന്‍സിയും റോക്കറ്റ് പതിക്കുന്ന കാര്യത്തില്‍ വ്യത്യസ്തമായ സ്ഥലങ്ങളാണ് പ്രവചിച്ചിരുന്നത്. എന്നാല്‍, ഇന്ത്യന്‍ മഹാസമുദ്രത്തിലാണ് വീഴുന്നതെന്നും അത് ഇന്ത്യയ്ക്ക് അരികിലാകുമെന്നും ആരും പറഞ്ഞിരുന്നില്ല.

ശനിയാഴ്ച രാത്രി 11.30 നോടടുത്ത് പതിച്ചിരുന്നുവെങ്കില്‍ അത് ന്യൂയോര്‍ക്ക് പ്രാന്തപ്രദേശത്തിലാകുമായിരുന്നുവെന്നാണ് യു.എസ് വ്യോമയാന വക്താവ് അറിയിച്ചിരുന്നത്. എന്നാല്‍ റോക്കറ്റിന്റെ വേഗത പ്രവചിക്കാന്‍ കഴിഞ്ഞിരുന്നില്ല. ബഹിരാകാശത്ത് അത് സെക്കന്‍ഡില്‍ നാലു മൈല്‍ വേഗതയിലാണ് പറന്നിരുന്നത്. ഇതിന്റെ ചിത്രങ്ങള്‍ യൂറോപ്യന്‍ സ്‌പേസ് ഏജന്‍സി പുറത്തു വിട്ടിരുന്നു.

ചൈനീസ് റോക്കറ്റ് ഇന്ത്യന്‍ മഹാസമുദ്രത്തില്‍ ഇന്ത്യയ്ക്ക് അരികിലായി പതിക്കുമെന്ന കാര്യം ഇന്നു പുലര്‍ച്ചെ വരെ അവ്യക്തമായിരുന്നു. ഇന്തോനേഷ്യയ്ക്ക് സമീപം വീഴുമെന്നാണ് റഷ്യന്‍ സ്‌പേസ് ഏജന്‍സി ഇന്നലെ രാത്രിയോടെ പ്രവചിച്ചിരുന്നത്. എന്നാല്‍, റോക്കറ്റിന്റെ കാര്യത്തില്‍ ഭയപ്പെടേണ്ടതില്ലെന്നും ഭൂരിഭാഗവും അന്തരീക്ഷത്തില്‍ വച്ചു തന്നെ കത്തിപ്പോകുമെന്നും അവശേഷിക്കുന്നത് സമുദ്രത്തില്‍ പതിക്കുമെന്നുമായിരുന്നു ചൈനീസ് വാദം.

ലോകത്തെ മുള്‍മുനയില്‍ നിര്‍ത്തിയ ഈ സംഭവത്തിനെതിരേ ചൈനയ്‌ക്കെതിരെ വ്യാപക പ്രതിഷേധം ഉയര്‍ന്നുകഴിഞ്ഞു. ഇപ്പോള്‍ കടലില്‍ പതിച്ച ലോംഗ് മാര്‍ച്ച് 5 ബി റോക്കറ്റിന് 21 ടണ്ണോളം വിക്ഷേപണസമയത്ത് ഭാരമുണ്ടായിരുന്നു. നിയന്ത്രണം നഷ്ടപ്പെട്ട് ഭൂമിയിലേക്ക് പതിക്കുമ്പോള്‍ 18 ടണ്ണായിരുന്നു ഭാരം. റോക്കറ്റിന്റെ വരവ് ലോകത്തെമ്പാടുമുള്ള വിവിധ സ്‌പേസ് ഏജന്‍സികള്‍ ട്രാക്ക് ചെയ്യുന്നുണ്ടായിരുന്നു.

പ്രതീക്ഷിച്ചതിലും എട്ടു മണിക്കൂര്‍ കഴിഞ്ഞാണ് ഇത് ഭൂമിയില്‍ പതിച്ചത്. എന്നാല്‍ സമയം നീണ്ടു പോയിരുന്നുവെങ്കില്‍ ഇത് ഓസ്‌ട്രേലിയയുടെയോ ന്യൂസിലന്‍ഡിന്റെയോ ജനവാസമേഖലയില്‍ വീഴുമായിരുന്നുവെന്ന നിഗമനവും പുറത്തു വന്നിട്ടുണ്ട്. 108 അടി ഉയരവും 40,000 പൗണ്ട് ഭാരവുമുള്ള ഈ റോക്കറ്റ് ഏപ്രില്‍ 29 ന് ഒരു പുതിയ ചൈനീസ് ബഹിരാകാശ നിലയത്തെ ഭ്രമണപഥത്തിലെത്തിച്ചിരുന്നു.

എന്തായാലും മലയാളികള്‍ തികഞ്ഞ ആശ്വാസത്തിലാണ്. കടലില്‍ വീണ റോക്കറ്റ് ഉണ്ടാക്കിയ നഷ്ടം എന്തെന്ന് വ്യക്തമല്ല. വീഴ്ചയുടെ ആഴത്തില്‍ വെള്ളം ഉയര്‍ന്നു പൊങ്ങിയുണ്ടായ ആപത്തില്‍ നഷ്ടം വിലയിരുത്തി വരുന്നതേയുള്ളൂ.