ലാവ്‌ലിന്‍ കേസില്‍ പിണറായിയെ സ്റ്റാന്റില്‍ പിടിക്കാന്‍ കേന്ദ്ര സര്‍ക്കാര്‍ തയ്യാറെടുക്കുന്നു. സ്വര്‍ണ്ണക്കടത്തില്‍ കേന്ദ്ര ഏജന്‍സികള്‍ക്കെതിരായ ജുഡീഷ്യല്‍ അന്വേഷണവുമായി സംസ്ഥാന സര്‍ക്കാര്‍ മുന്നോട്ട് പോകാന്‍ തീരുമാനിച്ചതോടെയാണ് ലാവലിന്‍ കേസില്‍ പിടിമുറുക്കി മുഖ്യമന്ത്രി പിണറായി വിജയന് എട്ടിന്റെ പണി കൊടുക്കാന്‍ ബി ജെ പി ആലോചിക്കുന്നത്.

തിങ്കളാഴ്ച ഉച്ചയോടെയാണ് ജുഡീഷ്യല്‍ അന്വേഷണം പ്രഖ്യാപിച്ച് കൊണ്ടുള്ള വിജ്ഞാപനം കേരള സര്‍ക്കാര്‍ ഇറക്കിയത്. ഇലക്ഷന് മുമ്പ് ജുഡീഷ്യല്‍ അന്വേഷണം നടത്താന്‍ സര്‍ക്കാര്‍ തീരുമാനിച്ചിരുന്നു. എന്നാല്‍ വിജ്ഞാപനം ഇറക്കിയില്ല. തെരഞ്ഞടുപ്പിന് മുമ്പ് വലിയ ധൈര്യമാണ് പിണറായി സര്‍ക്കാര്‍ കാണിച്ചത്. തുടര്‍ഭരണം ലഭിക്കുമെന്ന് പിണറായിക്ക് ഉറപ്പുണ്ടായിരുന്നത് കൊണ്ടാണ് അദ്ദേഹം ജുഡീഷ്യല്‍ അന്വേഷണത്തിന് ഉത്തരവിട്ടത്.

മുഖ്യമന്ത്രിയെയും മന്ത്രിമാരെയും സ്പീക്കറെയും പ്രതി ചേര്‍ക്കാന്‍ ഇ ഡി ഗൂഡാലോചന നടത്തിയോ എന്നാണ് പ്രധാനമായും അന്വേഷിക്കുക. ഇതിന് പിന്നില്‍ ആരൊക്കെ എന്നതടക്കമുള്ള കാര്യങ്ങള്‍ പരിഗണനാ വിഷയമാക്കിയാണ് സര്‍ക്കാര്‍ വിജ്ഞാപനം പുറത്തിറക്കിയിരിക്കുന്നത്.

ചില ബി ജെ പി നേതാക്കള്‍ മുഖ്യമന്ത്രിയെയും സ്പീക്കറെയും സ്വര്‍ണ്ണക്കടത്ത് കേസില്‍ പ്രതിചേര്‍ക്കാന്‍ ശ്രമിച്ചെന്ന ആരോപണത്തിന്റെ വെളിച്ചത്തിലാണ് അന്വേഷണ പരിധിയില്‍ ഇത്തരമൊരു കാര്യം ഉള്‍പ്പെടുത്തിയത് .

സ്വര്‍ണ്ണക്കടത്ത് വിവാദത്തില്‍ കേന്ദ്രവുമായുള്ള ഏറ്റുമുട്ടലില്‍ ഒരു വിട്ടുവീഴ്ചയ്ക്കും സംസ്ഥാനസര്‍ക്കാര്‍ തയ്യാറല്ല എന്നാണ് ഈ നടപടിയിലൂടെ തെളിയിക്കുന്നത്. സ്വര്‍ണ്ണകടത്തില്‍ മന്ത്രിമാര്‍ക്കോ സ്പീക്കര്‍ക്കോ ബന്ധം ഉണ്ടായിരുന്നെങ്കില്‍ എന്തു കൊണ്ട് അവരെ കേസില്‍ പ്രതിയാക്കിയില്ല എന്ന കാതലായ ചോദ്യമാണ് സംസ്ഥാന സര്‍ക്കാര്‍ ഉന്നയിക്കുന്നത്.

തെരഞ്ഞെടുപ്പിന് മുമ്പ് ദേശീയ അന്വേഷണ ഏജന്‍സികള്‍ക്കെതിരെ ജുഡീഷ്യല്‍ അന്വേഷണം പ്രഖ്യാപിച്ച സര്‍ക്കാരിന്റെ അസാധാരണ നടപടി വലിയ ചര്‍ച്ചയായിരുന്നു. തെരഞ്ഞടുപ്പ് കഴിയുമ്പോള്‍ അതെല്ലാം വെള്ളത്തില്‍ പോകുമെന്നാണ് എല്ലാവരും കരുതിയിരുന്നത്.

മുഖ്യമന്ത്രിയെ പ്രതിചേര്‍ക്കാന്‍ ഗൂഡാലോചന നടന്നുവെന്ന സ്വപ്നാ സുരേഷിന്റെ ശബ്ദരേഖ, മന്ത്രിമാരെയും സ്പീക്കറെയും പ്രതിയാക്കാന്‍ ശ്രമം ഉണ്ടായെന്ന് കാണിച്ച് സന്ദീപ് നായര്‍ എറണാകുളം ജില്ലാ സെഷന്‍സ് ജഡ്ജിക്ക് കത്ത് നല്‍കിയത് എന്നിവയാണ് ജസ്റ്റിസ് വി കെ മോഹന്‍ കമ്മീഷന്റെ പരിഗണനാ വിഷയങ്ങള്‍. കേസില്‍ ഉന്നത നേതാക്കളെ പ്രതിചേര്‍ക്കാന്‍ ഗൂഡാലോചന നടന്നെങ്കില്‍ ഇതിന് പിന്നില്‍ ആരാണെന്നും കണ്ടെത്തണമെന്നതും കമ്മീഷന്റെ മുന്നിലുണ്ട്.

ആറു മാസമാണ് കമ്മീഷന്റെ കാലാവധി. സ്വര്‍ണ്ണക്കടത്തിലും ഡോളര്‍ കടത്തിലും വിവിധ കേന്ദ്ര ഏജന്‍സികള്‍ സംസ്ഥാന സര്‍ക്കാറിനെ വരിഞ്ഞുമൂറുക്കിയപ്പോള്‍ പ്രതിരോധം എന്ന നിലക്കാണ് സംസ്ഥാനം തിരിച്ചും അന്വേഷണം പ്രഖ്യാപിച്ചത്. തെരഞ്ഞെടുപ്പ് കാലത്ത് സര്‍ക്കാര്‍ സ്വീകരിച്ച ആ നിലപാട് ജനങ്ങള്‍ക്കിടയില്‍ കേന്ദ്ര ഏജന്‍സികളുടെ നടപടിയെ സംശയത്തിന്റെ നിഴലിലാക്കാന്‍ ഇത് സഹായിച്ചെന്നാണ് സര്‍ക്കാര്‍ വിലയിരുത്തല്‍. സമാന വിഷയത്തില്‍ ഇഡിക്കെതിരായെ ക്രൈം ബ്രാഞ്ച് അന്വേഷണം തുടരുന്നതിനിടെയാണ് ജൂഡീഷ്യല്‍ അന്വേഷണ നടപടിയും വേഗത്തിലാക്കുന്നത്.

ചുരുക്കത്തില്‍ കേന്ദ്ര ഏജന്‍സികളിലെ ഉദ്യോസ്ഥരെ അകത്താക്കാന്‍ പോന്ന അന്വേഷണമായിരിക്കും സര്‍ക്കാര്‍ നടത്തുക. ഇതില്‍ ചിലപ്പോള്‍ ബി ജെ പി നേതാക്കളും കുരുങ്ങാന്‍ സാധ്യതയുണ്ട്. അന്വേഷണ കമ്മീഷനെ നിയമിച്ചത് പോലും പിണറായിയുടെ കൃത്യമായ മേല്‍നോട്ടത്തിലായിരുന്നു. റിട്ടയേഡ് ജസ്റ്റിസ് വി.കെ. മോഹനന്‍ സി പി എമ്മുമായി ഏറെ അടുപ്പം പുലര്‍ത്തുന്ന ന്യായാധിപനാണ്. വിദ്യാര്‍ത്ഥിയായിരുന്ന കാലത്ത് അദ്ദേഹം ഇടതുപക്ഷ സഹയാത്രികനായിരുന്നുവെന്നാണ് സി പി എമ്മുമായി ബന്ധപ്പെട്ടവര്‍ പറയുന്നത്. വി.കെ. മോഹനനെ അത്ര വിശ്വാസമാണ് പാര്‍ട്ടിക്ക്.

ലാവ്‌ലിന്‍ കേസ് മാത്രമാണ് കേന്ദ്ര സര്‍ക്കാറിന് മുന്നിലുള്ള പോംവഴി. പിണറായിയെ കുറ്റവിമുക്തനാക്കിയ കേരള ഹൈക്കോടതി വിധി റദ്ദാക്കാന്‍ കഴിഞ്ഞാല്‍ പിണറായിയെ നിലയ്ക്ക് നിര്‍ത്താന്‍ കഴിയുമെന്ന് കേന്ദ്ര സര്‍ക്കാര്‍ കരുതുന്നു.