'കൊറോണയെ പുകച്ച് പുറത്ത് ചാടിക്കാൻ ധൂമസന്ധ്യയുമായി കേരളത്തിലെ ഒരു നഗരസഭ അധികാരികൾ. കൊറോണയ്ക്കെതിരെ ഓംകാര മന്ത്രവുമായി ഒരു കാർഡിയാക് സർജൻ. കൊറോണയെ തോൽപ്പിക്കാൻ ഗ്ലൂക്കോസ് തുള്ളി മരുന്നുമായി ഇ എൻ ടി ഡോക്ടർ. ഒന്നുകിൽ നിസാരവൽകരിച്ച് കൊറോണയ്ക്ക് പുല്ലുവില കൊടുക്കുക, അല്ലെങ്കിൽ പേടിപ്പിച്ച്, ആശങ്കപ്പെടുത്തി ആൾക്കാരെ പാനിക്കാക്കുക...' ഡോ. മനോജ് വെള്ളനാട് കുറിക്കുന്നു
കോവിഡ് രണ്ടാം ഘട്ടം വ്യാപനം രാജ്യത്ത് അതിരൂക്ഷമായി തുടരുകയാണ്. ഈ സാഹചര്യത്തിലും സോഷ്യൽ മീഡിയ വ്യാജ വാർത്തകളും സന്ദേശങ്ങളും കൊണ്ട് നിറയുകയാണ്. അശാസ്ത്രീയമായ നിർദേശങ്ങളാണ് കോവിഡിനെ പ്രതിരോധിക്കാനായി ഇവർ മുന്നോട്ടുവയ്ക്കുന്നത് തന്നെ. ഈ വിഷയവുമായി ബന്ധപ്പെട്ട് മനോജ് വെള്ളനാട് പങ്കുവച്ച കുറിപ്പ് സമൂഹമാധ്യമങ്ങളിൽ ഏറെ ശ്രദ്ധേയമാണ്.
മനോജ് വെള്ളനാട് പങ്കുവച്ച കുറിപ്പ് വായിക്കാം;
1. കൊറോണയെ പുകച്ച് പുറത്ത് ചാടിക്കാൻ ധൂമസന്ധ്യയുമായി കേരളത്തിലെ ഒരു നഗരസഭ അധികാരികൾ.
2. കൊറോണയ്ക്കെതിരെ ഓംകാര മന്ത്രവുമായി ഒരു കാർഡിയാക് സർജൻ.
3. കൊറോണയെ തോൽപ്പിക്കാൻ ഗ്ലൂക്കോസ് തുള്ളി മരുന്നുമായി ഇ എൻ ടി ഡോക്ടർ.
4. രക്തത്തിൽ ഓക്സിജൻ കുറഞ്ഞോ എന്നറിയാൻ 30 വരെ എണ്ണിയാൽ മതിയെന്ന് ഏതോ നേഴ്സ്. എണ്ണാനറിയാത്തവന്റെ കാര്യം കട്ടപ്പൊക.
5. കൊറോണ വന്ന് രക്തം കട്ട പിടിച്ച് മരിക്കാതിരിക്കാൻ നടന്നാൽ മതിയെന്ന് അതേ നഴ്സ്. തലച്ചോറിലും ഹൃദയത്തിലുമൊക്കെ ഉണ്ടാവുന്ന ക്ലോട്ടുകളെ എന്തര് ചെയ്യും?
6. വാക്സിനെടുത്താലും കൊറോണ വരും. വന്നവർ മരിക്കുന്നുണ്ട്. അതുകൊണ്ട് വാക്സിനെടുത്തിട്ട് കാര്യമില്ലെന്ന് മറ്റൊരു കൂട്ടർ.
7. സിനിമാക്കഥ പറയുന്ന ലാഘവത്തോടെ പപ്പായ ഇലയുടെ മാന്ത്രിക ശക്തിയെ പറ്റി എഴുതുന്ന സംവിധായകൻ
ഒന്നുകിൽ നിസാരവൽകരിച്ച് കൊറോണയ്ക്ക് പുല്ലുവില കൊടുക്കുക, അല്ലെങ്കിൽ പേടിപ്പിച്ച്, ആശങ്കപ്പെടുത്തി ആൾക്കാരെ പാനിക്കാക്കുക. രണ്ടാണെങ്കിലും ആശാന്റെ നെഞ്ചത്തേക്ക് തന്നെ, ഒന്നും കളരിക്ക് പുറത്ത് പോവുന്നില്ല. ഇവരൊക്കെ ചെയ്യുന്നത്, ശരിക്കും കൊറോണ പ്രതിരോധ പ്രവർത്തനമല്ല, കൊറോണയെ കൊഞ്ഞനം കുത്തി കാണിക്കലാണ്.
അൽപ്പം മുമ്പൊരു സുഹൃത്ത് ചോദിച്ചതേയുള്ളൂ, ഈ ഉഡായിപ്പ് ടീംസിനെ പ്രതിരോധിക്കാൻ എന്താ വഴിയെന്ന്. പുള്ളിയോട് പറഞ്ഞത് തന്നേ, ഇതേ ചോദ്യം ചോദിക്കുന്ന എല്ലാവരോടും പറയാനുള്ളൂ, ഇമ്മാതിരി മെസേജുകൾ ഉണ്ടാക്കുന്നവർക്കും അന്തോം കുന്തോമില്ലാതെ പ്രചരിപ്പിക്കുന്നവർക്കും ഒരുമിച്ച് നല്ല ഒന്നാന്തരം വട്ടച്ചൊറി വരണം (ആശയത്തിന് ബഷീറിക്കയോട് കടപ്പാട്). ഇവന്മാർക്ക് സ്വന്തമായിട്ടെന്തേലും ചൊറിഞ്ഞോണ്ടിരിക്കാൻ ഇല്ലാത്ത കാലത്തോളം നമ്മൾ നിസഹായരാണ്.
PS : DRDO യുടെ പുതിയ കൊവിഡ് മരുന്നിനെ പറ്റി പലരും ചോദിച്ചു. സത്യം പറഞ്ഞാൽ, എനിക്കിപ്പോൾ ഒരൈഡിയയും ഇല്ലാ അതെന്താണെന്ന്.
https://www.facebook.com/Malayalivartha