ഭാരത് ബയോടെക്കിൻ്റെ കൊവിഡ 19 വാക്സിനായ കൊവാക്സിൻ ആദ്യഘട്ടത്തിൽ 18 സംസ്ഥാനങ്ങള്‍ക്ക് കമ്പനി നേരിട്ട് വിതരണം ചെയ്യും. ആദ്യഘട്ടത്തിൽ വാക്സിൻ ലഭിക്കുന്ന 18 സംസ്ഥാനങ്ങളുടെ പട്ടികയിൽ കേരളത്തെ ഉള്‍പ്പെടുത്തിയിട്ടില്ല. വാക്സിൻ്റെ ലഭ്യതയനുസരിച്ചാണ് വിതരണം നടത്തുന്നതെന്നും മറ്റു സംസ്ഥാനങ്ങളെയും പിന്നീട് പരിഗണിക്കുമെന്നും ഭാരത് ബയോടെക് അറിയിച്ചു. മറ്റ്‌ സംസ്ഥാനങ്ങൾക്ക് മെയ് ഒന്ന് മുതൽ വാക്സിൻ ലഭിച്ചു തുടങ്ങി

ആന്ധ്രാ പ്രദേശ്, അസം, ബിഹാര്‍, ഛത്തീസ്ഗഡ്, ഡൽഹി, ഗുജറാത്ത്, ഹരിയാന, ജമ്മു കശ്മീര്‍, ജാര്‍ഖണ്ഡ്, കര്‍ണാടക, മധ്യപ്രദേശ്, മഹാരാഷ്ട്ര, ഒഡീഷ, തമിഴ്നാട്, തെലങ്കാന,ഉത്തര്‍ പ്രദേശ്, പശ്ചിമ ബംഗാള്‍ എന്നീ സംസ്ഥാനങ്ങള്‍ക്കാണ് ആദ്യഘട്ടത്തിൽ കൊവാക്സിൻ നേരിട്ടു ലഭിക്കുന്നത്.

സംസ്ഥാനങ്ങള്‍ക്കും സ്വകാര്യ ആശുപത്രികള്‍ക്കും വാക്സിൻ നേരിട്ടു വാങ്ങാൻ അനുവദിക്കുന്ന കേന്ദ്രനയത്തിൻ്റെ ഭാഗമായാണ് വാക്സിൻ ബുക്ക് ചെയ്ത സംസ്ഥാനങ്ങള്‍ക്ക് കമ്പനികള്‍ നേരിട്ട് വാക്സിൻ വിതരണം ചെയ്യുന്നത്. ഒരു കോടി ഡോസ് കൊവിഷീൽഡും കൊവാക്സിനും വാങ്ങാനാണ് കേരള സര്‍ക്കാര്‍ നീക്കം. ഇതിൽ ആദ്യഘട്ടത്തിൽ മൂന്നര ലക്ഷം ഡോസ് കൊവിഷീൽഡ് സംസ്ഥാനത്ത് എത്തിയിരുന്നു.

അതേസമയം, ചില സംസ്ഥാനങ്ങൾ തങ്ങളെപ്പറ്റി പരാതിപ്പെടുകയാണെന്നും കമ്പനിയുടെ അൻപതോളം ജീവനക്കാർ കൊവിഡ് ബാധിച്ച് അവധിയിൽ പ്രവേശിക്കുമ്പോഴാണ് ഇത്രയധികം വാക്സിൻ വിതരണം ചെയ്യതെന്നും കമ്പനി വിശദീകരിച്ചു. ചെറിയ അളവിൽ മാത്രം വാക്സിൻ കൊടുത്ത സംസ്ഥാനങ്ങളെപ്പോലും പട്ടികയിൽ ഉൾപ്പെടുത്തിയിട്ടുണ്ടെന്നും കമ്പനി ജോയിൻ്റ് മാനേജിങ് ഡയറക്ടർ സുചിത്ര എല്ല വ്യക്തമാക്കി.

അതേസമയം, ആവശ്യത്തിനനുസരിച്ച് ഉത്പാദനം വര്‍ധിക്കാത്തതിനാൽ രാജ്യത്ത് കടുത്ത വാക്സിൻ ക്ഷാമം തുടരുകയാണ്. വിദേശത്തു നിന്ന് വാക്സിൻ ഇറക്കുമതി ചെയ്യുമ്പോഴുള്ള നികുതി കേന്ദ്രസര്‍ക്കാര്‍ എടുത്തു നീക്കിയ സാഹചര്യത്തിൽ വിവിധ സംസ്ഥാനങ്ങള്‍ വാക്സിനു വേണ്ടി ആഗോള ടെൻഡര്‍ വിളിക്കാൻ ശ്രമം തുടങ്ങിയിട്ടുണ്ട്

. ഡൽഹി, കര്‍ണാടക, മഹാരാഷ്ട്ര, പശ്ചിമ ബംഗാള്‍, തെലങ്കാന, രാജസ്ഥാൻ തുടങ്ങിയ സംസ്ഥാനങ്ങളാണ് വാക്സിൻ ഇറക്കുമതി ചെയ്യാനുള്ള തീരുമാനം അറിയിച്ചത്. സംസ്ഥാന സര്‍ക്കാരുകള്‍ വിദേശത്തു നിന്ന് നേരിട്ട് ഇറക്കുമതി ചെയ്യാനാണെങ്കിൽ കേന്ദ്രസര്‍ക്കാരിൻ്റെ പ്രസക്തിയെന്താണെന്ന് ഡൽഹി ഉപമുഖ്യമന്ത്രി മനീഷ് സിസോദിയ ചോദിച്ചു.