കേരളത്തില്‍ കുറച്ചു കാലം മന്ത്രിയായിരുന്നെങ്കിലും ഗണേഷ് കുമാര്‍ നല്ല ഗതാഗത മന്ത്രിയെന്ന പേരെടുത്തു. ഗണേഷ് കുമാര്‍ കെഎസ്ആര്‍ടിസിയില്‍ കൊണ്ടു വന്ന പല പരിഷ്‌കാരങ്ങളും ഇപ്പോഴും തുടരുകയാണ്.

നഷ്ടത്തിലായ ഡിപ്പോകളെ ലാഭത്തിലാക്കാന്‍ കൊണ്ടുവന്ന സൂപ്പര്‍ മാര്‍ക്കറ്റുകള്‍ പകുതി വഴിയിലാണ്. ബസിലെ ടിക്കറ്റ് മെഷീനും ഗണേഷ് കുമാറിന്റെ സംഭാവനയാണ്. അങ്ങനെയുള്ള ഗണേഷ് കുമാറിനെ കുടുംബ പ്രശ്‌നങ്ങളും വിവാദങ്ങളുമാണ് അകറ്റിയത്. പിന്നീട് പലവട്ടം മന്ത്രിയാകാന്‍ ശ്രമിച്ചെങ്കിലും യുഡിഎഫ് സമ്മതിച്ചില്ല. അവസാനം അച്ഛന്‍ ബാലകൃഷ്ണ പിള്ളയും ഗണേഷ്‌കുമാറും എല്‍ഡിഎഫിലായി.

ഇപ്പോള്‍ ഗണേഷ് കുമാറിന് നല്ല കാലമാണ്. എല്‍ഡിഎഫില്‍ വന്നപ്പോള്‍ അച്ഛന് നല്‍കിയ വാക്ക് പാര്‍ട്ടി നിറവേറ്റുമെന്നാണ് കരുതുന്നത്. ഗണേഷ് കുമാര്‍ ഏകാംഗ കക്ഷിയാണെങ്കിലും മന്ത്രി സ്ഥാനം നല്‍കുമെന്നാണ് സൂചന.

ഘടകകക്ഷികളുമായി ഒരു റൗണ്ട് ചര്‍ച്ച പൂര്‍ത്തിയാക്കിയ സി.പി.എം. തീരുമാനത്തിലേക്കു നീങ്ങുന്നു. 21 അംഗ മന്ത്രിസഭയായിരിക്കും അധികാരമേല്‍ക്കുക. മുന്നണിയില്‍ ഉള്‍പ്പെട്ടതും സഹകരിക്കുന്നതുമായ ആറു കക്ഷികള്‍ക്ക് ഒറ്റ എം.എല്‍.എ.മാര്‍ മാത്രമുള്ളതിനാല്‍ ആദ്യപടിയായി കേരള കോണ്‍ഗ്രസ് ബിയില്‍നിന്ന് കെ.ബി. ഗണേഷ്‌കുമാറിനെയും ജനാധിപത്യ കേരള കോണ്‍ഗ്രസില്‍നിന്ന് ആന്റണി രാജുവിനെയും മന്ത്രിമാരാക്കാനുള്ള തീരുമാനത്തിലേക്കാണ് മുന്നണിനേതൃത്വം നീങ്ങുന്നത്.



എന്നാല്‍, ഇതിനൊരു പൊതുനയം രൂപപ്പെടുത്തിയേക്കും. മറ്റു ഘടകകക്ഷികള്‍ക്ക് ഊഴംവെച്ച് മന്ത്രിപദം പങ്കിടണമോയെന്ന കാര്യത്തില്‍ അന്തിമധാരണയായിട്ടില്ല. എല്ലാ ഘടകകക്ഷികളുമായുള്ള ചര്‍ച്ചയുടെ വിശദാംശങ്ങള്‍ സി.പി.എം. നേതൃത്വം സി.പി.ഐ. നേതൃത്വത്തെയും അറിയിച്ചുപോരുന്നു.

സി.പി.എം.12, സി.പി.ഐ. 4, കേരള കോണ്‍ഗ്രസ് (എം)1, ജെ.ഡി.എസ്.1, എന്‍.സി.പി.1 എന്നിങ്ങനെയാണ് ഏകാംഗ കക്ഷികളെ ഒഴിച്ചുള്ള മന്ത്രിപദ വിഹിതമെന്നാണു സൂചന.

സ്പീക്കര്‍ സി.പി.എം. അംഗം തന്നെയാകും. ഡെപ്യൂട്ടി സ്പീക്കര്‍ സി.പി.ഐ.ക്കു തന്നെയെന്നാണു സൂചന. കഴിഞ്ഞ സര്‍ക്കാരിന്റെ ഇടക്കാലത്ത് സി.പി.എമ്മിന് 13ാം മന്ത്രിയെ ലഭിച്ചപ്പോഴാണ് സി.പി.ഐ.ക്ക് ചീഫ് വിപ്പ് നല്‍കിയത്. ഇപ്രാവശ്യം ചീഫ് വിപ്പ് കേരള കോണ്‍ഗ്രസിനായിരിക്കും. സത്യപ്രതിജ്ഞയ്ക്കു മുന്നോടിയായി ചേരുന്ന എല്‍.ഡി.എഫ്. യോഗത്തിനുമുമ്പ് ഘടകകക്ഷികളെ വീണ്ടും ബന്ധപ്പെടാമെന്നാണ് സി.പി.എം. നേതൃത്വം അറിയിച്ചിരിക്കുന്നത്.

എന്‍.എസ്.എസും എല്‍.ഡി.എഫും തമ്മില്‍ അകന്നുനില്‍ക്കുന്നതുകൂടി കണക്കിലെടുത്താണ് ഗണേഷ്‌കുമാറിനെ മന്ത്രിസ്ഥാനത്തേക്കു പരിഗണിക്കുന്നത്. അച്ഛന്‍ ആര്‍. ബാലകൃഷ്ണപിള്ളയുടെ പാതയില്‍ ഗണേഷ് കുമാറും എന്‍.എസ്.എസ്. ഭാരവാഹിയായിരുന്നു. ഗണേഷിനെ മന്ത്രിയാക്കുന്നത് എന്‍.എസ്.എസിനുകൂടിയുള്ള സന്ദേശമായി കാണാമെന്നാണ് വിലയിരുത്തല്‍.

ആഴക്കടല്‍ മീന്‍പിടിത്ത കരാര്‍ പ്രതിപക്ഷം വലിയ ആരോപണമായി ഉയര്‍ത്തിയെങ്കിലും ലത്തീന്‍ കത്തോലിക്കാ സഭ ഇടതുമുന്നണിയെ കൈവിടാഞ്ഞത് ആന്റണി രാജുവിനെ പരിഗണിക്കാന്‍ കാരണമാകുന്നു. ഇതുവഴി ലത്തീന്‍ കത്തോലിക്കാ പ്രാതിനിധ്യവും ഉറപ്പാകും.

സെന്‍ട്രല്‍ സ്‌റ്റേഡിയത്തിലാണ് സത്യപ്രതിജ്ഞ. അതിനുശേഷം രാജ്ഭവനില്‍ പുതിയ മന്ത്രിമാര്‍ക്ക് ഗവര്‍ണറുടെ സത്കാരമുണ്ടാകും. സത്കാരത്തിനുള്ള വേദിയായി രാജ്ഭവനില്‍ പന്തലിടാന്‍ തുടങ്ങി. എന്തായാലും അടുത്തയാഴ്ച ആദ്യം കല്ലും നെല്ലും തിരിയും.