കേരളത്തിൽ ലോക്ഡൗൺ മെയ് 23വരെ നീട്ടി. കൊവിഡ് അവലോകന യോഗത്തിന് ശേഷം മുഖ്യമന്ത്രി പിണറായി വിജയൻ നടത്തിയ വാർത്താ സമ്മേളനത്തിലാണ് സംസ്ഥാനത്ത് ലോക്ഡൗൺ നീട്ടുന്ന കാര്യത്തിൽ പ്രഖ്യാപനം ഉണ്ടായത്.

മെയ് എട്ടിന് രാവിലെ 6 മുതല്‍ മെയ് 16 വരെ ഒമ്പതു ദിവസത്തേക്കാണ് സംസ്ഥാനത്ത് ആദ്യഘട്ട ലോക്ഡൗൺ പ്രഖ്യാപിച്ചത്. എന്നാൽ ദിനം പ്രതിയുള്ള കൊവിഡ് കേസുകൾ വർധിച്ചതും കൊവിഡ് ടെസ്‌റ്റ് പോസിറ്റിവിറ്റി നിരക്ക് വർധിച്ചതുമാണ് ലോക്ഡൗൺ തുടരാൻ സർക്കാരിനെ പ്രേരിപ്പിച്ചത്.

നാല് ജില്ലകളിൽ ട്രിപ്പിൾ ലോക്ഡൗൺ പ്രഖ്യാപിച്ചു. കൊവിഡ് പോസിറ്റിവിറ്റി നിരക്ക് കൂടിയ തോതിലുള്ള തിരുവനന്തപുരം, തൃശൂർ, എറണാകുളം, മലപ്പുറം ജില്ലകളിലാണ് ട്രിപ്പിൾ ലോക്ഡൗൺ. നിലവിലെ ലോക്ഡൗൺ മെയ് 16വരെ തുടരുന്നതിനിടെയാണ് സംസ്ഥാനത്ത് വീണ്ടും ലോക്ഡൗൺ നീട്ടിയത്.

കൂടുതൽ നിയന്ത്രണങ്ങൾ ഏർപ്പെടുത്താതെ നിലവിലുള്ള എല്ലാ നിയന്ത്രണങ്ങൾ അതേപടി തുടരും. കൊവിഡ് വ്യാപനം രൂക്ഷമായുള്ള സ്ഥലങ്ങളിലാണ് കടുത്ത നിയന്ത്രണങ്ങൾ ഏർപ്പെടുത്തുകയെന്ന് മുഖ്യമന്ത്രി പറഞ്ഞു.

ട്രിപ്പിൾ ലോക്ഡൗൺ ഏർപ്പെടുത്തുന്ന ജില്ലകളിൽ ഇപ്പോഴുള്ള പൊതു ഇളവുകളിൽ കുറവ് ഏർപ്പെടുത്തും. എന്നാൽ മറ്റ് പ്രദേശങ്ങളിൽ നിലവിലെ നിയന്ത്രണങ്ങൾ കർശനമായി തുടരുകയും

ചെയ്യും. കൊവിഡ് രോഗവ്യാപനം കുറയ്ക്കാനാണ് കടുത്ത നിയന്ത്രണങ്ങൾ കൊണ്ടുവരുന്നതെന്നും ടിപിആ‍ർ കൂടുതലുള്ള ജില്ലകളിൽ ജില്ലകളിൽ കടുത്ത നിയന്ത്രണം ഉണ്ടാവുമെന്ന് മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു.