ഒരാഴ്ചക്കിടെ മഴയിലും കാറ്റിലും സംസ്ഥാനത്ത് 370.48 കോടിയുടെ കൃഷി നാശം. 9237.27 ഹെക്ടറിലെ കൃഷി നശിച്ചതായാണ് കൃഷി വകുപ്പിന്റെ പ്രാഥമിക കണക്ക്.

മഴക്കെടുതി 84,507 കര്‍ഷകരെ ബാധിച്ചു. പത്തനംതിട്ട ജില്ലയിലാണ് കൃഷി നാശം ഏറ്റവും കൂടുതല്‍. 1494.18 ഹെക്ടറിലെ 69.03 കോടിയുടെ കൃഷിയാണ് ജില്ലയില്‍ നശിച്ചത്.

ഒരാഴ്ചത്തെ മഴയില്‍ സംസ്ഥാനത്ത് 18.74 കോടിയുടെ പച്ചക്കറി കൃഷിയാണ് നശിച്ചത്. വാഴ 143.05 കോടി, മരച്ചീനി 103.26 കോടി, നെല്ല് 23.72 കോടി, തെങ്ങ് 5.15 കോടി, റബര്‍ 4.74 കോടി, കുരുമുളക് 4.16 കോടി എന്നിങ്ങനെയാണ് മറ്റ് പ്രധാന വിളകള്‍ക്കുണ്ടായ നഷ്ടം.

കാലാവസ്ഥ വ്യതിയാനം മൂലമുണ്ടായ ഉല്‍പാദനത്തകര്‍ച്ചയും തുടര്‍ന്നുണ്ടായ വിലയിടിവും കര്‍ഷകരെ വന്‍ പ്രതിസന്ധിയിലാക്കിയതിന് പിന്നാലെയാണ് മഴയും കാറ്റും വ്യാപകനാശം വിതച്ചത്.

മുന്‍വര്‍ഷങ്ങളിലെ പ്രളയവും വരള്‍ച്ചയും സൃഷ്ടിച്ച തകര്‍ച്ചയില്‍നിന്ന് കര്‍ഷകര്‍ക്ക് ഇനിയും കരകയറാനായിട്ടില്ല. ഇടുക്കിയടക്കം ജില്ലകളില്‍ വന്യമൃഗശല്യവും ഭീഷണിയായി നിലനില്‍ക്കുന്നു. കോവിഡ് രണ്ടാംഘട്ട വ്യാപനവും ലോക്ഡൗണും കാര്‍ഷിക മേഖലയുടെ നട്ടെല്ല് ഒടിച്ചിരിക്കുകയാണ്.

വിളവെടുക്കാനും വിറ്റഴിക്കാനും കഴിയാതെ കടക്കെണിയിലേക്ക് നീങ്ങുന്നതിനിടെയാണ് മഴ കര്‍ഷകരുടെ പ്രതീക്ഷ തകര്‍ത്തത്. വിളവെടുപ്പിന് പാകമായ വാഴയും പച്ചക്കറിയും വന്‍തോതില്‍ നശിച്ചത് ചെറുകിട കര്‍ഷകരെയാണ് കൂടുതല്‍ ബാധിക്കുക.

ഭൂരിഭാഗം പേരും ബാങ്ക് വായ്പയെടുത്ത് കൃഷി ചെയ്തവരാണ്. കൃഷിനാശം സംഭവിച്ചവര്‍ക്ക് യഥാസമയം അര്‍ഹമായ നഷ്ടപരിഹാരം നല്‍കുന്നതിലെ സര്‍ക്കാര്‍ വീഴ്ചയും കര്‍ഷകര്‍ക്ക് തിരിച്ചടിയാണ്.