ഉത്രവധക്കേസിലെ പ്രതി സൂരജിനും കുടുംബാംഗങ്ങള്‍ക്കുമെതിരായ ഗാര്‍ഹിക പീഡനക്കേസില്‍ ് കുറ്റപത്രം സമര്‍പ്പിച്ച് കൊല്ലം റൂറല്‍ ക്രൈം ബ്രാഞ്ച്.
്
സൂരജിന് പുറമേ അച്ഛന്‍ അടൂര്‍ പറക്കോട് ശ്രീസൂര്യയില്‍ സുരേന്ദ്രന്‍, അമ്മ രേണുക, സഹോദരി സൂര്യ എന്നിവരെ പ്രതികളാക്കി ഗാര്‍ഹിക പീഡനം, വിശ്വാസ വഞ്ചന, തെളിവ് നശിപ്പിക്കല്‍ എന്നീ വകുപ്പുകള്‍ ചുമത്തിയാണ് കുറ്റപത്രം.

കഴിഞ്ഞ വര്‍ഷം മേയ് 6ന് രാത്രിയിലാണ് ഉത്ര പാമ്പുകടിയേറ്റ് കൊല്ലപ്പെട്ടത്. മൂര്‍ഖന്‍ പാമ്പിനെക്കൊണ്ട് ഭര്‍ത്താവ് സൂരജ് കടിപ്പിച്ച് കൊലപ്പെടുത്തിയെന്നാണ് കേസ്.


സ്വത്തുക്കള്‍ ലക്ഷ്യമിട്ടാണ് ഉത്രയെ സൂരജിനെ കൊണ്ട് വിവാഹം കഴിപ്പിച്ചതെന്ന് കുറ്റപത്രത്തില്‍ പറയുന്നു. മൂന്നര ഏക്കര്‍ വസ്തുവും നൂറ് പവനും കാറും പത്തുലക്ഷം രൂപയും സ്ത്രീധനമായി നല്‍കി. എന്നിട്ടും പണം അവശ്യപ്പെട്ടുകൊണ്ടേയിരുന്നു. ഒടുവില്‍ 8000 രൂപ വീതം മാസം ചെലവിന് നല്‍കി. അതുപോരാഞ്ഞും പണം ആവശ്യപ്പെട്ടു. ലഭിക്കാതെ വന്നതോടെ ഉത്രയെ വീട്ടില്‍ കൊണ്ടാക്കി.

ഉത്രയുടെ സ്വര്‍ണം സൂരജിന്റെ വീട്ടുകാര്‍ തങ്ങളുടെ ആവശ്യങ്ങള്‍ക്ക് ഉപയോഗിച്ചിരുന്നു. കൊലപാതക ശേഷം ഉത്രയുടെ സ്വര്‍ണം ഒളിപ്പിച്ചു. സൂരജ് ഇടയ്ക്കിടെ ഉത്രയെ മര്‍ദ്ദിക്കുമായിരുന്നു. ഇതിനിടയില്‍ അടൂരിലെ വീട്ടില്‍ വച്ചും അണലിയെ കൊണ്ട് കടിപ്പിച്ചിരുന്നു.

അന്വേഷണ ഉദ്യോഗസ്ഥനായ ക്രൈംബ്രാഞ്ച് ഡിവൈ.എസ്.പി എ. അശോകന്‍ സര്‍വീസില്‍ നിന്ന് വിരമിക്കുന്നതിന് തൊട്ടുമുമ്പ് മാര്‍ച്ച് അവസാനമാണ് ഇരുന്നൂറോളം പേജുകളുള്ള കുറ്റപത്രം പുനലൂര്‍ കോടതിയില്‍ സമര്‍പ്പിച്ചത്. കേസിന്റെ വിചാരണ പ്രത്യേകം നടക്കും.

ഉത്രയെ കൊലപ്പെടുത്തിയ കേസില്‍ പ്രോസിക്യൂഷന്റെ വിസ്താരം പൂര്‍ത്തിയായി. പിന്നീട് ആരംഭിച്ച പ്രതിഭാഗത്തിന്റെ സാക്ഷിവിസ്താരം കൊവിഡ് രണ്ടാം വ്യാപനത്തെ തുടര്‍ന്ന് മുടങ്ങി. പ്രതിഭാഗത്തിന്റെ വിസ്താരം പൂര്‍ത്തിയായ ശേഷം അന്തിമവാദം കൂടി നടക്കാനുണ്ട്.