ഐഷ സുല്ത്താന ഇന്ന് അന്വേഷണ സംഘത്തിന് മുന്നില് ഹാജരാകും; ലക്ഷദ്വീപിനു വേണ്ടിയുള്ള പോരാട്ടത്തില് നിന്നും ഒരടി പോലും പിന്നോട്ടു പോകിലെന്ന് ഐഷ
ഐഷ സുല്ത്താന ഇന്ന് അന്വേഷണ സംഘത്തിന് മുന്നില് ഹാജരാകും. ലക്ഷദ്വീപ് ഭരണകൂടം രാജ്യദ്രോഹക്കുറ്റം ചുമത്തിയ കേസില് അറസ്റ്റ് ചെയ്താല് ഐഷക്ക് ഇടക്കാല ജാമ്യം നല്കണമെന്ന് ഹൈക്കോടതി നേരത്തെ കവരത്തി പൊലീസിന് നിര്ദേശം നല്കിയിട്ടുണ്ടായിരുന്നു.
നീതി പീഠത്തില് പൂര്ണ വിശ്വാസം ഉണ്ടെന്നും സത്യം മനസ്സിലാക്കുമെന്ന് പ്രതീക്ഷിക്കുന്നതായും ഐഷ സാമൂഹ്യ മാധ്യമങ്ങളിലൂടെ വ്യക്തമാക്കി. ലക്ഷദ്വീപിനു വേണ്ടിയുള്ള പോരാട്ടത്തില് നിന്നും ഒരടി പോലും പിന്നോട്ടു പോകില്ലെന്നും ഐഷ വ്യക്തമാക്കി.
രാവിലെ പതിനൊന്നരയോടെ കൊച്ചിയില് നിന്ന് അഗത്തിയിലേക്ക് പോകുന്ന ഐഷ കവരത്തിയിലെത്തി ഇന്നുതന്നെ അന്വേഷണ സംഘത്തിനു മുന്നില് ഹാജരാകും.
അതേസമയം, ലക്ഷദ്വീപ് ഭരണകൂടത്തിന്റെ ജനദ്രോഹ നടപടികള്ക്കെതിരേ ശക്തമായ പ്രതിഷേധം തുടരുന്നതിനിടെ ലക്ഷദ്വീപ് തലസ്ഥാനമായ കവരത്തിയില് ബിജെപി ഓഫീസിന് നേരെയും മോദിയുടെയും അഡ്മിനിസ്ട്രേറ്ററുടെയും ഫോട്ടോ പതിച്ച ഫ്ളക്സുകള്ക്ക് നേരെയും കരിഓയില് പ്രയോഗം.
ഇന്നലെ രാത്രിയിലാണ് കവരത്തിയിലെ ബിജെപി ഓഫീസിന് നേരെ കരിഓയിലൊഴിച്ചത്. അതിനു പുറമെ പലയിടങ്ങളിലായി സര്ക്കാര് സ്ഥാപിച്ച നരേന്ദ്ര മോദിയുടെയുടെയും ലക്ഷദ്വീപ് അഡ്മിനിസ്ട്രേറ്റര് പ്രഫുല് ഘോട പട്ടേലിന്റെയും ഫോട്ടോ പതിച്ച 4 ഫ്ളക്സുകളിലും കരിഓയില് ഒഴിച്ചു. പോലീസ് അന്വേഷണം തുടരുന്നു.
കരി ഓയില് പ്രയോഗത്തിനു ശേഷം രാത്രി പുറത്തിറങ്ങിയവരെയെല്ലാം പോലിസ് പിടികൂടുകയാണെന്നാണ് ലക്ഷദ്വീപില് നിന്നും ലഭിക്കുന്ന വിവരം.
https://www.facebook.com/Malayalivartha
