കുടുംബസമേതം നടക്കാനിറങ്ങിയ ഉദ്യോഗസ്ഥര്‍ക്ക് നേരെ ബൈക്കില്‍ എത്തിയവരുടെ ആക്രമണം. ഭാര്യമാരെ കടന്നുപിടിച്ചത് ചോദ്യം ചെയ്തതിന് തിരുവനന്തപുരം ഏജീസ് ഓഫിസിലെ ഉദ്യോഗസ്ഥരെ വെട്ടിപ്പരിക്കേല്‍പിച്ചു. നഗരത്തില്‍ പേട്ടയ്ക്ക് സമീപം ഇന്നലെ രാത്രി ഒമ്ബത് മണിയോടെയാണ് സംഭവം. ഏജീസ് ഓഫിസിലെ സീനിയര്‍ അക്കൗണ്ടന്റും ഹരിയാന സ്വദേശിയുമായ രവി യാദവ്, ഡാറ്റ എന്‍ട്രി ഓപ്പറേറ്റര്‍ ജസ്വന്ത് എന്നിവര്‍ക്കാണ് സംഭവത്തില്‍ പരിക്കേറ്റത്. അക്രമിസംഘം ഉദ്യോഗസ്ഥരുടെ ഭാര്യമാരെ റോഡില്‍ വച്ച് കടന്നുപിടിക്കുകയായിരുന്നു. ഇത് ചോദ്യം ചെയ്തതിനെ തുടര്‍ന്നാണ് വെട്ടിപ്പരിക്കേല്‍പ്പിച്ചത്. സംഭവം അറിഞ്ഞെത്തിയ പോലീസ് അക്രമികള്‍ ഉപയോഗിച്ച ആയുധം സംഭവസ്ഥലത്ത് നിന്നും കണ്ടെടുത്തു. പ്രതികളെക്കുറിച്ച് സൂചന ലഭിച്ചതായും വിശദമായ അന്വേഷണം നടത്തുമെന്നും പൊലീസ് അറിയിച്ചു.