ജാഗ്രതൈ! വാഹനമോാടിക്കുമ്പോള്‍ ബ്ലൂടൂത്ത് സംവിധാനത്തിലൂടെ മൊബൈല്‍ ഫോണില്‍ സംസാരിച്ചാലും പോലീസിന്റെ പിടിയിലാവും. 'ഹാന്‍ഡി ഫ്രീ' ആയതുകൊണ്ടു മാത്രം ഇളവുകിട്ടില്ലെന്നും സംശയം തോന്നിയാല്‍, ഫോണ്‍ പരിശോധിച്ച് ഉറപ്പുവരുത്താന്‍പോലും മടിക്കില്ലെന്നും പോലീസ് അറിയിച്ചു.

ഫോണ്‍ കൈയില്‍പ്പിടിച്ച് സംസാരിച്ചാലുള്ള അതേ ശിക്ഷതന്നെ ഇവിടെയും നേരിടേണ്ടി വരും. വാഹനം നിര്‍ത്തിയിട്ട് ബ്ലൂടൂത്ത് വഴി സംസാരിക്കാന്‍ മാത്രമാണ് അനുവാദമുള്ളത്.

ഫോണ്‍വിളികളില്‍മാത്രം ഒതുങ്ങിയിരുന്ന ബ്ലൂടൂത്ത് ഉപയോഗം ലോക്ഡൗണ്‍ കാലമായതോടെ ഗൂഗിള്‍ മീറ്റ്, സൂം മീറ്റിങ് തുടങ്ങിയവയിലേക്കും മാറിയിട്ടുണ്ട്.

ഡ്രൈവിങ്ങിനിടെ സംസാരിക്കുന്നത് ഏതുവിധത്തിലായാലും അപകടകാരണമാവുമെന്നാണ് മോട്ടോര്‍വാഹനവകുപ്പ് പറയുന്നത്. മാസ്‌ക് ധരിച്ച് വണ്ടിയോടിക്കുമ്പോള്‍ ബ്ലൂടൂത്ത് വഴിയുള്ള സംസാരം കണ്ടുപിടിക്കാനാവുന്നില്ല എന്ന പരിമിതിയുണ്ടെന്ന് പോലീസ് പറയുന്നു.

സംസാരിക്കുന്നതായി കണ്ടാല്‍മാത്രമേ പരിശോധനയുണ്ടാവൂ. ഡ്രൈവര്‍ നിഷേധിച്ചാല്‍ കോള്‍ഹിസ്റ്ററി പരിശോധിക്കും.