ഭര്‍ത്താവ് വീട്ടില്‍ ഇല്ലെന്ന് മനസിലാക്കി അര്‍ധരാത്രി വീട്ടില്‍ കയറി നഴ്‌സിനെ ലൈംഗികമായി പീഡിപ്പിക്കാന്‍ ശ്രമിച്ചതിന് ആംബുലന്‍സ് ഡ്രൈവര്‍ അറസ്റ്റിലായി. പന്നിവിഴ കാറ്റാടിയില്‍ വിജേഷിനെയാണ് (സച്ചു- 40) ഏനാത്ത് പോലീസ് പിടികൂടിയത്.

ജൂണ്‍ 19ന് പുലര്‍ച്ചെ രണ്ടരയോടെയാണ് വീട്ടില്‍ കയറി നഴ്സിനെ ലൈംഗികമായി പീഡിപ്പിക്കാന്‍ ശ്രമിച്ചത്. പത്തനംതിട്ട ജനറല്‍ ആശുപത്രിയില്‍ കരാര്‍ അടിസ്ഥാനത്തില്‍ ജോലി ചെയ്യുന്ന മാരൂര്‍ സ്വദേശിനിയായ നഴ്സിനു നേരെയാണ് പീഡനശ്രമമുണ്ടായത്. ഒരേ ആശുപത്രിയില്‍ ജോലി ചെയ്യുന്ന ഇരുവരും തമ്മില്‍ മുന്‍പരിചയമുണ്ടായിരുന്നു. രാത്രിയില്‍ പരാതിക്കാരിയുടെ ഭര്‍ത്താവ് വീട്ടില്‍ ഇല്ലെന്ന് മനസിലാക്കിയ വിജേഷ് അവിടെ എത്തുകയായിരുന്നു. യുവതിയെ ഫോണില്‍ വിളിച്ച്‌ കതകു തുറക്കാന്‍ ആവശ്യപ്പെട്ടു. എന്നാല്‍ കതക് തുറക്കാന്‍ യുവതി കൂട്ടാക്കിയത്. ഇതോടെ അക്രമിക്കുമെന്ന് ഭീഷണിപ്പെടുത്തുകയായിരുന്നു. ഇതോടെയാണ് യുവതി കതക് തുറന്നത്. വീടിനുള്ളില്‍ കയറിയ പ്രതി യുവതിയെ കടന്നുപിടിക്കുകയും, ബലമായി പീഡിപ്പിക്കാന്‍ ശ്രമിക്കുകയായിരുന്നു. എന്നാല്‍ യുവതി ഉറക്കെ നിലവിളിച്ചതോടെ പീഡനശ്രമം ഉപേക്ഷിച്ച്‌ പ്രതി ഓടി രക്ഷപെടുകയായിരുന്നു.

സംഭവത്തില്‍ കഴിഞ്ഞ ദിവസം ഏനാത്ത് പോലീസ് സ്‌റ്റേഷനില്‍ എത്തി യുവതി പരാതി നല്‍കുകയായിരുന്നു. തുടര്‍ന്ന് നടത്തിയ അന്വേഷണത്തിലാണ് പ്രതിയെ പൊലീസ് വീട്ടില്‍ നിന്ന് കസ്റ്റഡിയിലെടുത്തത്. ചോദ്യം ചെയ്യലില്‍ ഇയാള്‍ കുറ്റം സമ്മതിച്ചതോടെ അറസ്റ്റ് രേഖപ്പെടുത്തുകയായിരുന്നു. കോടതിയില്‍ ഹാജരാക്കിയ ഇയാളെ 14 ദിവസത്തേക്ക് റിമാന്‍ഡ് ചെയ്തു.