സീറോ മലബാര്‍ സഭ പാലാ രൂപതയുടെ തീരുമാനം ഏറെ നാളായി കേരളത്തില്‍ നിലനില്‍ക്കുന്ന ക്രൈസ്തവ - മുസ്ലിം മത വിഭാഗങ്ങള്‍ തമ്മിലുള്ള സംഘര്‍ഷത്തിന്റെ ഭാഗമാണെന്ന് ജനാധിപത്യ വിശ്വാസികള്‍.

അഞ്ചിലധികം കുട്ടികള്‍ ഉള്ളവര്‍ക്ക് ധനസഹായം നല്‍കാനുളള തീരുമാനത്തില്‍ ഉറച്ച് നില്‍ക്കുന്നുവെന്ന് പാലാ രൂപതാ മെത്രാന്‍ മാര്‍ ജോസഫ് കല്ലറങ്ങാട്ട് പ്രഖ്യാപിച്ചതിന് പിന്നാലെ സംസ്ഥാനത്ത് ഇത്തരത്തിലുള്ള ചര്‍ച്ചകളും സജീവമായി . ക്രൈസ്തവ തത്വങ്ങള്‍ അനുസരിച്ചുള്ള തീരുമാനമാണിതെന്നാണ് മെത്രാന്‍ പറഞ്ഞത്.

സമുദായത്തിന്റെ അംഗബലം വര്‍ധിപ്പിക്കാന്‍ ഇക്കാലമത്രയും പ്രയത്‌നിച്ചിട്ടുള്ളത് മുസ്ലീം മത വിശ്വാസികളാണെന്നാണ് ക്രൈസ്തവര്‍ അടക്കം പറയുന്നത്. സഭയുടെ തീരുമാനം തീര്‍ത്തും യാദ്യച്ഛികമല്ല . ഏറെ നാളായി സഭക്കുള്ളില്‍ ഇത്തരമൊരു നീക്കത്തിന്റെ തീക്കനല്‍ എരിയുന്നുണ്ടായിരുന്നു. യഥാര്‍ത്ഥത്തില്‍ മുസ്ലീം വിഭാഗത്തിന്റെ അംഗബലം കൂടിയതോടെയാണ് ഈ നീക്കത്തിലേക്ക് ക്രൈസ്തവരും തിരിഞ്ഞത്.

നേരത്തേ സിറോ മലബാര്‍ സഭയ്ക്ക് കീഴിലുള്ള പാലാ രൂപതയുടെ ഫേസ്ബുക്ക് പേജില്‍ പ്രത്യക്ഷപ്പെട്ട പോസ്റ്ററില്‍ ആശയക്കുഴപ്പമുണ്ടെന്നും, വീണ്ടും വിശദീകരണം നല്‍കാമെന്നുമാണ് സഭാ വക്താവ് അറിയിച്ചിരിക്കുന്നത്. എന്നാല്‍ ഒരു ആശയക്കുഴപ്പവുമില്ലെന്നും, തീരുമാനത്തില്‍ ഉറച്ച് നില്‍ക്കുന്നെന്നും മെത്രാന്‍ മാര്‍ ജോസഫ് കല്ലറങ്ങാട്ട് പറയുന്നു.

അഞ്ചില്‍ കൂടുതല്‍ കുട്ടികളുണ്ടെങ്കില്‍ കുടുംബത്തിന് ധനസഹായവും സ്‌കോളര്‍ഷിപ്പും നല്‍കുമെന്ന് സിറോ മലബാര്‍ സഭയ്ക്ക് കീഴിലുള്ള പാലാ രൂപത ഇടവകക്കാര്‍ക്കായി സംഘടിപ്പിച്ച ഒരു ഓണ്‍ലൈന്‍ യോഗത്തിലാണ് പ്രഖ്യാപനം നടത്തിയത്. സമൂഹമാധ്യമങ്ങളില്‍ രൂക്ഷ വിമര്‍ശനമാണ് രൂപതയ്ക്ക് നേരെ ഉയര്‍ന്നത്.

അഞ്ച് കുട്ടികളുണ്ടെങ്കില്‍ വമ്പന്‍ ഓഫറാണ് പാലാ രൂപത വാഗ്ദാനം ചെയ്യുന്നത്. 2000-ത്തിന് ശേഷം വിവാഹിതരായ അഞ്ചു കുട്ടികളില്‍ കൂടുതല്‍ ഉള്ള കുടുംബത്തിന് പ്രതിമാസം 1500 രൂപ സാമ്പത്തിക സഹായം നല്‍കും. ഒരു കുടുംബത്തില്‍ നാലാമതായും തുടര്‍ന്നും ജനിക്കുന്ന കുട്ടികള്‍ക്ക് പാലായിലെ സെന്റ് ജോസഫ് കോളേജ് ഓഫ് എന്‍ജിനീയറിംഗ് ആന്‍ഡ് ടെക്‌നോളജിയില്‍ സ്‌കോളര്‍ഷിപ്പോടെ പഠനം ലഭിക്കും. ഒരു കുടുംബത്തില്‍ നാല് മുതലുള്ള കുട്ടികളുടെ ജനനവുമായി ബന്ധപ്പെട്ട ആശുപത്രി സൗകര്യങ്ങള്‍ രൂപതയ്ക്ക് കീഴിലെ മാര്‍ സ്ലീവ മെഡിസിറ്റി സൗജന്യമായി നല്‍കും. 'പാലാ രൂപതയുടെ കുടുംബ വര്‍ഷം 2021'ന്റെ ഭാഗമായാണ് പദ്ധതികള്‍ പ്രഖ്യാപിച്ചത്.



'അല്‍പ സ്വല്‍പം വകതിരിവ്' എന്ന ക്യാപ്ഷനോടെ പാലാരൂപതയുടെ തീരുമാനത്തിന്റെ പോസ്റ്റര്‍ പങ്ക് വെച്ചുകൊണ്ടാണ് സംവിധായകന്‍ ജിയോ ബേബിയുടെ വിമര്‍ശിച്ചത്. സമുദായത്തിന്റെ അംഗബലം കൂട്ടാന്‍ പരസ്യനോട്ടീസെന്ന് ചിലരുടെ വിമര്‍ശനം. ഇതോടെ സഭ വെട്ടിലായി. ഫേസ്ബുക്ക് പോസ്റ്റര്‍ അപ്രത്യക്ഷമായി.പക്ഷേ തീരുമാനത്തില്‍ മാറ്റമില്ലെന്നാണ് അറിയുന്നത്.

മുമ്പ് ലൗ ജിഹാദിനെതിരെയും പാലാ രൂപത രംഗത്തെത്തിയിരുന്നു. മുസ്ലീങ്ങള്‍ തന്നെയാണ് ലൗ ജിഹാദ് വിവാദത്തിലും പ്രതിസ്ഥാനത്തുള്ളത്. മാര്‍ ജോര്‍ജ് ആലഞ്ചേരിയും ലൗ ജിഹാദ് വിഷയത്തില്‍ അതിശക്തമായാണ് രംഗത്തെത്തിയത്.ലൗ ജിഹാദിനെതിരെ നടപടി ആവശ്യപ്പെട്ട് ബിഷപ്പ് ജോര്‍ജ് ആലഞ്ചേരി പ്രധാനമന്ത്രിയെ വരെ കണ്ടിരുന്നു. ഇതിന്റെ അടിസ്ഥാനത്തില്‍ ചില സുപ്രധാന തീരുമാനങ്ങളും കേന്ദ്ര സര്‍ക്കാര്‍ കൈക്കൊണ്ടിട്ടുണ്ട്. എന്നാലും അംഗബലം വര്‍ധിപ്പിച്ച് ജിഹാദികളെ നേരിടാന്‍ തന്നെയാണ് ക്രൈസ്തവരുടെ തീരുമാനം.

സീറോ മലബാര്‍ സഭക്ക് പിന്നാലെ മറ്റ് ക്രൈസ്തവ സഭകളും ഇതേ വഴിക്ക് വരുമോ എന്ന സംശയമാണ് ഇപ്പോള്‍ കേരളത്തിനുള്ളത്. അങ്ങനെ സംഭവിച്ചാല്‍ ബി ജെ പിയും അതേ വഴിക്ക് തന്നെ തിരിയുമെന്നുറപ്പാണ്.