ഹയർസെക്കണ്ടറി സേ, ഇംപ്രൂവ്‌മെന്റ് പരീക്ഷകള്‍ ഓഗസ്റ്റ് 11 മുതല്‍ ആരംഭിക്കും. ഈ മാസം 31 വരെ അപേക്ഷിക്കാം. പുനര്‍മൂല്യനിര്‍ണയം, ഉത്തരക്കടലാസിന്റെ പകര്‍പ്പ്, സൂക്ഷ്മപരിശോധന എന്നിവയ്ക്കും ഈ സമയത്തിനുള്ളില്‍ അപേക്ഷ നല്‍കാം. ഹയര്‍സെക്കന്ററി പ്രായോഗിക പരീക്ഷ ഓഗസ്റ്റ് അഞ്ച്, ആറ് തീയതികളില്‍ നടക്കും. വൊക്കേഷനല്‍ ഹയർസെക്കണ്ടറി തലത്തിലെ പ്രാക്ടിക്കല്‍ പരീക്ഷകള്‍ അടുത്ത മാസം ആറ് മുതല്‍ 18 വരെ നടത്തുമെന്ന് വിദ്യാഭ്യാസമന്ത്രി വി ശിവന്‍കുട്ടി അറിയിച്ചു.

അതേസമയം, കേരള ഹയര്‍ സെക്കന്‍ഡറി, വൊക്കേഷനല്‍ ഹയര്‍ സെക്കന്‍ഡറി ഒന്നാം വര്‍ഷ പ്രവേശനം ഓഗസ്റ്റ് ആദ്യയാഴ്ച മുതല്‍ ആരംഭിക്കുമെന്നു പൊതു വിദ്യാഭ്യാസ ഡയറക്ടര്‍ ജനറല്‍ അറിയിച്ചു. പ്ലസ് വണ്‍ സീറ്റുകള്‍ വര്‍ധിപ്പിക്കും. പാലക്കാട് മുതല്‍ വടക്കോട്ടുള്ള ജില്ലകളില്‍ 20 ശതമാനം സീറ്റും തൃശൂര്‍ മുതല്‍ തിരുവനന്തപുരം വരെ 10 ശതമാനം സീറ്റുമാണു കൂട്ടുക.

ഹയര്‍ സെക്കന്‍ഡറി രണ്ടാം വര്‍ഷ പരീക്ഷയില്‍ റെക്കോര്‍ഡ് വിജയമാണ് ഇക്കുറി രേഖപ്പെടുത്തിയത്, 87.94%. സംസ്ഥാനത്ത് 3,28,702 പേര്‍ ഉപരിപഠനത്തിന് യോഗ്യത നേടി. സയന്‍സ് 90.52%, ഹ്യുമാനിറ്റീസ് 80.04%, കൊമേഴ്‌സ് 89.13%, ആര്‍ട് 89.33% എന്നിങ്ങനെയാണ് വിജയം. സേ പരീക്ഷ, പുനഃപരിശോധന എന്നിവയ്ക്ക് ജൂലൈ 31 വരെ അപേക്ഷിക്കാം.