4 ലക്ഷം രൂപയുടെ പണാപഹരണം നടത്തിയ കേസില്‍ പോസ്റ്റ് മിസ്ട്രസിന് മുന്‍കൂര്‍ ജാമ്യമില്ല. തിരുവനന്തപുരം ഒന്നാം അഡീഷണല്‍ ജില്ലാ സെഷന്‍സ് കോടതിയാണ് വര്‍ക്കല വെട്ടൂര്‍ പോസ്റ്റ് മിസ്ട്രസിന്റെ മുന്‍കൂര്‍ ജാമ്യ ഹര്‍ജി തള്ളിയത്.

വര്‍ക്കല പോസ്റ്റ് ഓഫീസിലെ പോസ്റ്റ് മിസ്ട്രസ് ഗീതാഭായി (52) സമര്‍പ്പിച്ച മുന്‍കൂര്‍ ജാമ്യഹര്‍ജിയാണ് കോടതി നിരസിച്ചത്.

കേസ് ഡയറിയും പോലീസ് റിപ്പോര്‍ട്ടും പരിശോധിച്ചതില്‍ ആരോപണം ഗൗരമേറിയതാണെന്നും കൃത്യത്തില്‍ പ്രതിയുടെ പങ്കും പങ്കാളിത്തവും പ്രഥമദൃഷ്ട്യാ വ്യക്തമാകുന്നതായും പ്രതിയെ കസ്റ്റഡിയില്‍ ചോദ്യം ചെയ്ത് അപഹരിക്കപ്പെട്ട തുക വീണ്ടെടുക്കേണ്ടതുണ്ടെന്നും നിരീക്ഷിച്ചാണ് ജഡ്ജി മിനി. എസ്. ദാസ് മുന്‍കൂര്‍ ജാമ്യം നിഷേധിച്ചത്.

3 നിക്ഷേപകര്‍ നിക്ഷേപിച്ച സ്ഥിര നിക്ഷേപ തുകയായ 4 ലക്ഷം രൂപ പോസ്റ്റ് ഓഫീസ് അക്കൗണ്ടില്‍ ചേര്‍ക്കാതെ നിക്ഷേപകര്‍ക്ക് വ്യാജ രസീത് നല്‍കി കൈവശപ്പെടുത്തി സ്വന്തം ആവശ്യങ്ങള്‍ക്ക് ദുര്‍വിനിയോഗം ചെയ്തുവെന്നാണ് കേസ്.

2020 ഫെബ്രുവരി 1 ന് ശാന്ത എന്ന സ്ത്രീ സ്ഥിര നിക്ഷേപമായി അടച്ച ഒരു ലക്ഷം രൂപ , 2019 സെപ്റ്റംബര്‍ രണ്ട് , മൂന്ന് തീയതികളിലായി മറ്റൊരു യുവതിയായ ഐഷാബീവി നിക്ഷേപിച്ച 3 ലക്ഷം രൂപയും ഉള്‍പ്പെടെ 4 ലക്ഷം രൂപ അപഹരിച്ച് നിക്ഷേപകരെ വഞ്ചിച്ച് സ്വന്തം ആവശ്യങ്ങള്‍ക്കുപയോഗിച്ചു.

നിക്ഷേപ രസീത് ചോദിച്ച സ്ത്രീകള്‍ക്ക് വ്യാജമായി ബാങ്ക് അക്കൗണ്ട് നമ്പരുകള്‍ നല്‍കുകയായിരുന്നു. ബാങ്കില്‍ ചെന്ന യുവതികള്‍ക്ക് ലഭിച്ചത് ഹിന്ദിക്കാരായ അപരന്‍മാരുടെ ബാങ്ക് സ്റ്റേറ്റ്‌മെന്റുകളായിരുന്നു. തുടര്‍ന്ന് യുവതികളുടെ പരാതിയില്‍ വര്‍ക്കല പോലീസ് ജാമ്യമില്ലാ കേസ് രജിസ്റ്റര്‍ ചെയ്യുകയായിരുന്നു.