എണ്ണാമെങ്കില് എണ്ണിക്കോ... പരാതി നല്കിയതിന്റെ പേരില് പരാതിയും ബഹളവുമായി പടിയിറക്കിയ ഹരിത നേതാക്കള് ശക്തമായി മുന്നോട്ട്; ഹരിത മുന് നേതാവ് കോടതിയില് രഹസ്യമൊഴി നല്കി; നവാസിനെതിരേ കൂടുതല് വെളിപ്പെടുത്തലുകളുമായി ഹരിത മുന് ഭാരവാഹികള്
പരാതി പറഞ്ഞവരെ കൂട്ടത്തോടെ പുറത്താക്കി ഭീഷണിപ്പെടുത്തിയിട്ടും ഒട്ടും പിന്മാറാതെ പുലിക്കുട്ടികള് മുന്നോട്ട്. പിന്തുണയ്ക്കാന് ആരും ഇല്ലാതിരുന്നിട്ടും ശക്തമായി പോരാടുകയാണ് ഈ യുവതികള്.
അതേസമയം ഹരിത മുന് സംസ്ഥാന ജനറല് സെക്രട്ടറി നജ്മ തബ്ഷീറ കോഴിക്കോട് കോടതിയില് രഹസ്യമൊഴി നല്കി. ഇന്നലെ വൈകിട്ട് കോഴിക്കോട് ജുഡീഷ്യല് മജിസ്ടേറ്റ് ഒന്നാം ക്ലാസ് കോടതിയിലെത്തിയാണ് ജഡ്ജിക്ക് മുന്പാകെ രഹസ്യമൊഴി നല്കിയത്. എം.എസ്.എഫ്. സംസ്ഥാന പ്രസിഡന്റ് പി.കെ. നവാസിനെതിരേ പരാതി നല്കിയ ഒന്പതു പേരില് ഒരാളാണ് നജ്മ തബ്ഷീറ. രഹസ്യമൊഴി രേഖപ്പെടുത്തുന്നതിനായി ജഡ്ജിക്ക് മുന്നാകെ ഹാജരാകാന് അന്വേഷണ സംഘം ഇവര്ക്ക് നോട്ടീസ് നല്കിയിരുന്നു. വനിതാ കമ്മിഷന് ഇവര് നല്കിയ പരാതിയില് വെള്ളയില് പോലീസാണ് കേസെടുത്തത്.
ക്രിമിനല് നടപടിക്രമം164 പ്രകാരമാണ് നടപടി. വനിതകള് ആക്രമണത്തിനിരയാകുന്ന കേസുകളില് ഇരയുടെ മൊഴി മജിസ്ട്രേറ്റ് മുമ്പാകെ രേഖപ്പെടുത്തണമെന്ന സുപ്രീംകോടതി നിര്ദേശമുള്ളതിനാലാണ് പൊലീസ് രഹസ്യമൊഴി രേഖപ്പെടുത്താന് കോടതിയെ സമീപിച്ചത്.
ചെമ്മങ്ങാട് പൊലീസാണ് അന്വേഷണം നടത്തുന്നത്. നേരത്തേ പരാതി നല്കിയ 10 പേരുടെയും മൊഴി പൊലീസ് രേഖപ്പെടുത്തിയിരുന്നു. കേസന്വേഷിക്കുന്ന ചെമ്മങ്ങാട് ഇന്സ്പെക്ടര് അനിതകുമാരി സ്റ്റേഷനില് വിളിച്ചുവരുത്തി പ്രതി നവാസിനെ അറസ്റ്റ് ചെയ്തിരുന്നു. കഴിഞ്ഞ ജൂണില് എം.എസ്.എഫ് സംസ്ഥാന കമ്മിറ്റി ഓഫിസായ ഹബീബ് സെന്ററിലെ യോഗത്തിലാണ് പി.കെ. നവാസ് സ്ത്രീവിരുദ്ധ പരാമര്ശം നടത്തിയത്.
അന്ന് യോഗത്തില് പങ്കെടുത്ത ഏക ഹരിത ഭാരവാഹിയാണ് നജ്മ. പരാതിയില് ഉറച്ചുനില്ക്കുന്നതായി മൊഴി രേഖപ്പെടുത്തിയശേഷം നജ്മ മാധ്യമപ്രവര്ത്തകരോട് പറഞ്ഞു.
അതേസമയം പി.കെ. നവാസിനെതിരേ കൂടുതല് വെളിപ്പെടുത്തലുകളുമായി ഹരിത മുന് ഭാരവാഹികള് രംഗത്തെത്തി. നവാസ് നടത്തിയത് ലൈംഗീക അധിക്ഷേപം തന്നെയെന്ന് മുന് ഭാരവാഹികള് പറഞ്ഞു. പി.കെ. നവാസിന്റെ വിവാദ പരാമര്ശം അവര് മാധ്യമങ്ങള്ക്ക് മുമ്പാകെ വെളിപ്പെടുത്തുകയും ചെയ്തു.
ഇതുമായി ബന്ധപ്പെട്ട് അഞ്ച് പേജുള്ള പരാതിയാണ് പാര്ട്ടിക്ക് നല്കിയത്. അന്പത് ദിവസം നേതൃത്വത്തിന്റെ തീരുമാനത്തിന് കാത്തിരുന്നു. എന്നാല് നടപടി ഉണ്ടായില്ല. തുടര്ന്നാണ് വനിതാ കമ്മിഷനെ സമീപിച്ചതെന്നും മുഫീദ് തസ്നി അടക്കമുള്ള നേതാക്കള് വിശദീകരിച്ചു.
പരാതി നല്കിയതിന് പിന്നാലെ നിരന്തരം സൈബര് ആക്രമണം നേരിട്ടു. ഇപ്പോഴും അത് തുടരുകയാണ്. ഹരിതയ്ക്കെതിരേ സംഘടിത വിദ്വേഷ പ്രചാരണം നടത്തി. പരാതി നല്കാന് വൈകിയെന്ന് പറയുന്നത് തെറ്റാണ്. തെറ്റിദ്ധാരണ പരത്തുന്നത് നേതാക്കള് അവസാനിപ്പിക്കണമെന്നും അവര് ആവശ്യപ്പെട്ടു.
അതേസമയം എം.എസ്.എഫ്. നേതാവില് നിന്നുണ്ടായ ലൈംഗിക അധിക്ഷേപം സംബന്ധിച്ച് വനിതാ കമ്മിഷനില് പരാതിപ്പെട്ട ഹരിത നേതാക്കളോടൊപ്പം നിലകൊണ്ട എം.എസ്.എഫ്. സംസ്ഥാന വൈസ് പ്രസിഡന്റ് പി.പി. ഷൈജലും പുറത്ത്.
ഷൈജലിനെ എം.എസ്.എഫ്., മുസ്ലിംലീഗ് എന്നിവയുടെ എല്ലാ ഭാരവാഹിത്വങ്ങളില്നിന്നു നീക്കിയതായി മുസ്ലീം ലീഗ് സംസ്ഥാന കമ്മിറ്റി അറിയിച്ചു. മുസ്ലീം ലീഗ് വയനാട് ജില്ലാ കമ്മിറ്റിയുടെ ശിപാര്ശ പ്രകാരമാണ് നടപടി. ഹരിത നേതാക്കള്ക്ക് നീതി ലഭിച്ചില്ലെന്നും ഈ വിഷയത്തില് ലീഗ് സംസ്ഥാന നേതൃത്വം ശരിയായ നിലപാട് സ്വീകരിച്ചില്ലെന്നും ഷൈജല് പരസ്യമായി വിമര്ശിച്ചിരുന്നു.
ലീഗ് നേതൃത്വത്തെ വിമര്ശിച്ചുകൊണ്ടുള്ള ഷൈജലിന്റെ ഫോണ് സംഭാഷണം പുറത്താവുകയും ചെയ്തതോടെയാണ് ജില്ലാ കമ്മിറ്റി ഷൈജലിനെതിരേ റിപ്പോര്ട്ട് നല്കിയത്.
"
https://www.facebook.com/Malayalivartha