ഇന്ന് ഓസോൺ സംരക്ഷണ ദിനമെന്ന് ഐ ബി സതീഷ് എം എൽ എ. ഭൂമിയുടെ സാധാരണ നിലയിലുള്ള നിലനിൽപ്പിനെ , മനുഷ്യന്റെ അതിജീവനത്തിനായുള്ള ഈ പ്രപഞ്ചത്തിന്റെയും ആവാസവ്യവസ്ഥയുടെയും സംരക്ഷണത്തിന്റെ പ്രാധാന്യത്തേയും ഓർമിപ്പിക്കുന്ന ഒരു ദിനം കൂടിയെന്ന് അദ്ദേഹം തന്റെ ഫെയ്‌സ്ബുക്ക് കുറിപ്പിൽ പറയുന്നു. കുറിപ്പിന്റെ പൂർണ്ണ രൂപം ഇങ്ങനെ ;

ഇന്ന് ഓസോൺ സംരക്ഷണ ദിനം. ഭൂമിയുടെ സാധാരണ നിലയിലുള്ള നിലനിൽപ്പിനെ , മനുഷ്യന്റെ അതിജീവനത്തിനായുള്ള ഈ പ്രപഞ്ചത്തിന്റെയും ആവാസവ്യവസ്ഥയുടെയും സംരക്ഷണത്തിന്റെ പ്രാധാന്യത്തേയും ഓർമിപ്പിക്കുന്ന ഒരു ദിനം കൂടി ....

ഭൂമിയുടെ സംരക്ഷണ കവചമാണ് ഓസോൺ പാളി. ഭൂമിയിലെ മനുഷ്യനുൾപ്പെടെയുള്ള ജീവജാലങ്ങൾക്ക് ഹാനീകരമാകുന്ന അൾട്രാവയലറ്റ് രശ്മികളെ ആഗിരണം ചെയ്ത് പ്രപഞ്ചത്തെ പൊതിഞ്ഞു സൂക്ഷിക്കുന്ന ഈ കവചത്തിന്റെ കനം അനുദിനം കുറഞ്ഞു വരുന്നുവെന്ന് ശാസ്ത്രലോകം.

കുറച്ച് നാളുകൾക്ക് മുൻപ് യു.എൻ ന്റെ ഇന്റെർ ഗവൺമെന്റ് പാനൽ ഓൺ ക്ലൈമറ്റ് ചേഞ്ച് ജനീവയിൽ പുറത്തുവിട്ട റിപ്പോർട്ട് ഹരിതഗൃഹവാതകങ്ങൾ പുറംതള്ളുന്നതിന്റെ അളവ് ഗണ്യമായി കുറച്ചില്ലെങ്കിൽ വലിയ അപകടത്തിലേക്കാവും മനുഷ്യരാശി ചെന്നെത്തുക എന്ന യാഥാർത്ഥ്യത്തിലേക്ക് വിരൽ ചൂണ്ടുന്നതാണ്.

ഓസോൺ പാളിയിൽ വിള്ളലുകൾ സൃഷ്ടിക്കുന്ന സി.എഫ്.സി വാതകങ്ങളുടെ പുറന്തള്ളൽ നിയന്ത്രിച്ചാൽ മാത്രമേ വരാൻ പോകുന്ന വലിയ അപകടങ്ങളിൽ നിന്നും നമുക്ക് ഈ പ്രപഞ്ചത്തെ രക്ഷിക്കുവാനാകൂ.
വനനശീകരണത്തിനും , പ്രകൃതിക്കു മേലുള്ള മനുഷ്യന്റെ ചൂഷണങ്ങൾക്കും കടന്നുകയറ്റത്തിനും അവസാനമുണ്ടായേ മതിയാകൂ.

ആവാസവ്യവസ്ഥയുടെ സ്വാഭാവികത നിലനിർത്തുന്നതിനുള്ള പ്രയത്നങ്ങളിൽ ഏർപ്പെടുക എന്നുള്ളതാണ് കാലം നമ്മിൽ നിന്നും ആവശ്യപ്പെടുന്നത്. ജൈവവൈവിധ്യങ്ങളും ജലാശയങ്ങളും സംരക്ഷിക്കപ്പെടണം, വൻതോതിൽ മരങ്ങൾ വച്ചുപിടിപ്പിക്കണം, വ്യാവസായിക മേഖലകളിലടക്കം പ്രകൃതിക്കിണങ്ങിയ നൂതന ശാസ്ത്രീയ മാർഗ്ഗങ്ങൾ ഉപയോഗിക്കണം.

പ്രകൃതിസംരക്ഷണത്തിന്റെ ആവശ്യകതയും, പ്രകൃതിവിഭവങ്ങളുടെ സംരക്ഷണത്തിനും ഉതകുന്ന പ്രവർത്തനങ്ങളെയും കുറിച്ചുള്ള പൊതുബോധം സൃഷ്ടിക്കുന്നതിന് ഇത്തരം ദിനങ്ങൾ നൽകുന്ന സന്ദേശം പ്രയോജനപ്പെടുത്താം. ശുഭദിനം. ഐ.ബി സതീഷ്