സംസ്ഥാനത്ത് നവംബര് ഒന്നു മുതല് സ്കൂളുകള് തുറക്കും... എല്ലാ ക്ലാസുകളും ആരംഭിക്കുന്നതിന് തയ്യാറെടുപ്പുകള് നടത്താനും 15 ദിവസം മുന്പ് മുന്നൊരുക്കങ്ങള് പൂര്ത്തീകരിക്കാനും മുഖ്യമന്ത്രി നിര്ദ്ദേശം നല്കി
സംസ്ഥാനത്ത് നവംബര് ഒന്നു മുതല് സ്കൂളുകള് തുറക്കാന് കോവിഡ് അവലോകന യോഗത്തില് തീരുമാനമായി. ഒന്നു മുതല് ഏഴ് വരെയുള്ള പ്രൈമറി ക്ലാസുകളും 10, 12 ക്ലാസുകളും നവംബര് ഒന്നു മുതല് തുടങ്ങും. നവംബര് 15 മുതല് എല്ലാ ക്ലാസുകളും ആരംഭിക്കുന്നതിന് തയ്യാറെടുപ്പുകള് നടത്താനും 15 ദിവസം മുന്പ് മുന്നൊരുക്കങ്ങള് പൂര്ത്തീകരിക്കാനും മുഖ്യമന്ത്രി പിണറായി വിജയന് നിര്ദ്ദേശിച്ചു.
പ്രൈമറി ക്ലാസുകള് ആദ്യം തുറക്കണമെന്നാണ് ആരോഗ്യ വിദഗ്ധരുടെ അഭിപ്രായമെന്ന് മുഖ്യമന്ത്രി പറഞ്ഞു. സ്കൂളുകള് തുറക്കുന്നതുമായി ബന്ധപ്പെട്ട് വിദ്യാഭ്യാസ വകുപ്പും ആരോഗ്യവകുപ്പും സംയുക്തമായി യോഗം ചേര്ന്ന് ആവശ്യമായ തയ്യാറെടുപ്പ് നടത്തണം.
രോഗപ്രതിരോധ ശേഷി കുറവുള്ള കുട്ടികള് സ്കൂളുകളില് ഹാജരാകേണ്ടതില്ലെന്ന നിലയെടുക്കുന്നതാവും ഉചിതം. വാഹനങ്ങളില് കുട്ടികളെ എത്തിക്കുമ്ബോള് പാലിക്കേണ്ട ക്രമീകരണങ്ങള് ചര്ച്ച ചെയ്യേണ്ടതുണ്ട്.
സ്കൂള് ഹെല്ത്ത് പ്രോഗ്രാം പുനഃസ്ഥാപിക്കുന്നതിനുള്ള നടപടികള് സ്വീകരിക്കണം. സ്കൂളുകള് തുറക്കുമ്ബോള് രോഗം പടരാതിരിക്കാനുള്ള മുന്കരുതല് സ്വീകരിക്കണം. കുട്ടികള്ക്കുവേണ്ടി പ്രത്യേക മാസ്കുകള് തയാറാക്കണം. സ്കൂളുകളിലും മാസ്കുകള് കരുതണം. ഒക്ടോബര് 18 മുതല് കോളജ് തലത്തില് വാക്സിനേഷന് സ്വീകരിച്ച വിദ്യാര്ത്ഥികളുടെ എല്ലാ ക്ലാസ്സുകളും ആരംഭിക്കുമെന്നും മുഖ്യമന്ത്രി പറഞ്ഞു.
മുഖ്യമന്ത്രിയുടെ അധ്യക്ഷതയില് ശനിയാഴ്ച നടന്ന കോവിഡ് അവലോകന യോഗത്തിലാണ് സ്കൂളുകള് തുറക്കാനുള്ള തീരുമാനം എടുത്തത്. കോവിഡ് വ്യാപനത്തെ തുടര്ന്ന് ഒന്നരമാസം അടച്ചിട്ട ശേഷമാണ് സ്കൂളുകള് തുറക്കുന്നത്. സ്കൂള് തുറക്കുന്നതിന് മുമ്ബായി നല്കേണ്ട മുന്നൊരുക്കങ്ങള്ക്കുള്ള നിര്ദ്ദേശങ്ങളും അവലോകന യോഗത്തില് ഉയര്ന്നു വന്നിരുന്നു. സ്കൂളുകള് തുറക്കുന്ന കാര്യം പരിഗണനയിലുണ്ടെന്ന നേരത്തെ തന്നെ മുഖ്യമന്ത്രി വ്യക്തമാക്കിയിരുന്നു. ആരോഗ്യ വിദഗ്ദ്ധര് ഉള്പ്പെടെയുള്ളവരുമായി ഇക്കാര്യത്തില് സര്ക്കാര് നിരവധി ചര്ച്ചകളും നടത്തിയിരുന്നു.നിലവില് പ്ലസ് വണ് പരീക്ഷാ നടത്തിപ്പിന് കൂടുതല് ശ്രദ്ധ നല്കാനാണ് വിദ്യാഭ്യാസ വകുപ്പിന് നല്കിയിരിക്കുന്ന നിര്ദ്ദേശം.
https://www.facebook.com/Malayalivartha