എം പി രാജ്‌മോഹൻ ഉണ്ണിത്താൻ ഇരട്ട സഹോദരന്മാരുടെ വിവാഹത്തിൽ പങ്കെടുത്ത് ആശംസ അറിയിച്ച് കൊണ്ടുള്ള ചിത്രം ഫെയ്‌സ്ബുക്ക് പേജിൽ പോസ്റ്റ് ചെയ്തതോടെ നിരവധിപേർ കമെന്റുമായി എത്തിയതും സമൂഹമാധ്യമങ്ങളിൽ ചർച്ച ആയതുമാണ്.

ഗേ വിവാഹത്തിന് എം പി പിന്തുണ നൽകുന്നു എന്ന് പറഞ്ഞായിരുന്നു നിരവധിപേർ രംഗത്ത് എത്തിയത്. എന്നാൽ, നിരവധിപേർ വിമർശനങ്ങളുമായും എത്തിയിരുന്നു. പക്ഷെ, സംഭവത്തിലെ യാഥാർഥ്യം എന്തെന്നാൽ, ഇതൊരു സ്വവർഗ വിവാഹം ആയിരുന്നില്ല എന്നതാണ്.

തുടർന്ന്, ഇരട്ട സഹോദരന്‍മാരുടെ വിവാഹത്തില്‍ പങ്കെടുത്ത് ആശംസ അറിയിച്ചുകൊണ്ടുള്ള ചിത്രം ഔദ്യോഗിക ഫേസ്ബുക്ക് പേജില്‍ പോസ്റ്റ് ചെയ്തത് രാജ്മോഹന്‍ ഉണ്ണിത്താന്‍ എം.പിയുടെ അറിവില്ലാതെയെന്ന് വിശദീകരണം. 'എംപി യുടെ അറിവോ സമ്മതമോ ഇല്ലാതെ ഇന്നലെ ചെയ്ത പോസ്റ്റ് പിന്‍വലിച്ചിരുന്നു, ഇതില്‍ ക്ഷുഭിതനായ അദ്ദേഹം നല്‍കിയ ശക്തമായ നിര്‍ദേശത്തിന്റെ അടിസ്ഥാനത്തില്‍ വധു വരന്മാരുടെ അടക്കം മുഴുവന്‍ ഫോട്ടോയും ഒരിക്കല്‍ കൂടി പോസ്റ്റ് ചെയ്യുന്നു'- എന്ന കുറിപ്പോടെയാണ് പുതിയ പോസ്റ്റ് വന്നിരിക്കുന്നത്. പുതിയ പോസ്റ്റില്‍ വധുവരന്‍മാര്‍ ഒരുമിച്ച്‌ നില്‍ക്കുന്ന ഫോട്ടോയും ഉള്‍പ്പെടുത്തിയിട്ടുണ്ട്.

അതേസമയം വിവാഹാശംസ ചിത്രം ഫേസ്ബുക്കില്‍ പങ്കുവെച്ചതിനെ ട്രോളുന്നവര്‍ക്കെതിരെ ആഞ്ഞടിച്ച്‌ രാജ്മോഹന്‍ ഉണ്ണിത്താന്‍ എം.പി രംഗത്തെത്തിയിരുന്നു. വിമര്‍ശിക്കുന്നവര്‍ ലൈംഗിക ദാരിദ്ര്യം അനുഭവിക്കുന്ന മനോരോഗികളാണ് രാജ്മോഹന്‍ ഉണ്ണിത്താന്‍ പറഞ്ഞു. മുസ്ലിം വിവാഹത്തേക്കുറിച്ച്‌ ധാരണയുള്ള ആര്‍ക്കും ആശയക്കുഴപ്പമുണ്ടാകാനുള്ള ഒന്നും ആ ചിത്രത്തിലില്ലെന്നും ലൈംഗികദാരിദ്ര്യം അനുഭവിക്കുന്ന മനോരോഗികളാണ് വിമര്‍ശനത്തിന് പിന്നിലെന്നും അദ്ദേഹം പറഞ്ഞു.

മഞ്ചേശ്വരത്തെ ഇരട്ട സഹോദരന്മാരുടെ വിവാഹത്തില്‍ പങ്കെടുത്ത് വരന്മാര്‍ക്കൊപ്പമുള്ള ചിത്രം രാജ്മോഹന്‍ ഉണ്ണിത്താന്‍ എം. പി ഫേസ്ബുക്കില്‍ പങ്കുവെച്ചതാണ് വിവാദമായത്. ഇരട്ട സഹോദരന്‍മാരുടെ വധുമാര്‍ ഇല്ലാതെ വരന്മാരുടെ മാത്രം കൂടെയുള്ള ഫോട്ടോയാണ് എംപി പങ്കുവെച്ചത്. ഈ ചിത്രത്തിന് 'ഇന്ന് വിവാഹിതരായ സിനാനും ഷഫീഖ്നുമൊപ്പം' എന്നായിരുന്നു ഉണ്ണിത്താന്‍ നല്‍കിയ അടിക്കുറിപ്പ്. 'ഗേ വിവാഹത്തിന് പിന്തുണ അറിയിച്ച എംപി നല്ല മാതൃക ആണ്. ഇനിയും സ്വവര്‍ഗ വിവാഹങ്ങള്‍ ഉണ്ടാകട്ടെ' എന്ന് എംപിയുടെ പോസ്റ്റില്‍ പരിസ്ഥിതി പ്രവര്‍ത്തകനും പ്രമുഖ അഭിഭാഷകനുമായ ഹരീഷ് വാസുദേവന്‍ അഭിപ്രായം രേഖപ്പെടുത്തി.

എന്നാല്‍ രൂക്ഷമായ വിമര്‍ശനങ്ങളും ട്രോളുകളും വരാന്‍ തുടങ്ങിയതോടെ രാജ്മോഹന്‍ ഉണ്ണിത്താന്‍ പോസ്റ്റ് എഡിറ്റ് ചെയ്യുകയും പിന്നീട് പിന്‍വലിക്കുകയും ചെയ്തു. മറ്റ് ചില പരിപാടികളില്‍ പങ്കെടുക്കേണ്ടതിനാല്‍ വരന്മാര്‍ക്കും വേദിയിലുണ്ടായിരുന്ന മറ്റുള്ളവര്‍ക്കുമൊപ്പം ചിത്രങ്ങളെടുത്ത് മടങ്ങിപ്പോയി. മുസ്ലിം വിവാഹ ചടങ്ങുകളേക്കുറിച്ച്‌ ധാരണയുള്ള ആര്‍ക്കും തന്നെ ഉണ്ടാവാന്‍ ഇടയില്ലാത്ത സംശയങ്ങളാണ് ആ ചിത്രത്തിന് കമന്‍റുകളായി എത്തിയത്.