സംസ്ഥാനത്ത് മഴ ശക്തമാകുന്ന സാഹചര്യത്തിൽ തിരുവനന്തപുരം പേപ്പാറ ഡാമിന്റെ ഷട്ടര്‍ ഇന്ന് രാത്രി പത്തുമണിയോടെ ഉയർത്തും. ഡാമിന്റെ നാല് ഷട്ടറുകള്‍ 200 സെ.മീ വരെ ഉയര്‍ത്തുമെന്ന് തിരുവനന്തപുരം ജില്ലാ കളക്ടര്‍ അറിയിച്ചിരിക്കുന്നത്. ഇന്ന് രാത്രി പത്ത് മണിയോടെ ഒന്നും നാലും ഷട്ടറുകള്‍ അഞ്ച് സെ.മീ വീതം ഉയര്‍ത്തും.

നാളെ രാവിലെ നാല് മണിക്ക് ഇതേ അളവില്‍ 30 സെ.മീ കൂടി ഉയര്‍ത്തും. ഡാം തുറക്കുന്ന സാഹചര്യത്തില്‍ പ്രദേശവാസികള്‍ അതീവ ജാഗ്രത പുലര്‍ത്തണമെന്നും ജില്ലാ കളക്ടര്‍ നിര്‍ദേശിച്ചു. ഡാമിന്റെ വൃഷ്ടി പ്രദേശങ്ങളില്‍ കനത്ത മഴയാണ് തുടരുന്നത്. തിരുവനന്തപുരം നെയ്യാര്‍ , അരുവിക്കര ഡാമുകളും തുറന്നിട്ടുണ്ട്.

അതേസമയം നീരൊഴുക്ക് ശക്തമായതോടെ നാളെ രാവിലെ 11 മണിക്ക് ഇടുക്കി ഡാമിന്റെ ഷട്ടറുകള്‍ ഉയര്‍ത്താനും തീരുമാനമായി. രണ്ട് ഷട്ടറുകള്‍ 50 സെ.മീ വീതം ഉയര്‍ത്തും. 64 കുടുംബങ്ങളെ മാറ്റിപ്പാര്‍പ്പിക്കും. വെള്ളം ഒഴുകുന്നതിനുള്ള തടസം നീക്കും.

ജില്ലാ ഭരണകൂടം ഇടുക്കി അണക്കെട്ടിനു സമീപ വാസികള്‍ക്ക് ജാഗ്രതാ നിര്‍ദേശം പുറപ്പെടുവിച്ചിട്ടുണ്ട്. ഡാം മേഖലയിലേക്ക് രാത്രികാല യാത്ര വേണ്ടെന്നും പെരിയാറിന്റെ തീരത്തുള്ളവര്‍ ജാഗ്രത പാലിക്കണമെന്നും മുന്നറിയിപ്പ് നൽകിയിരിക്കുകയാണ്.